[A1516/11/5]¹

Letter: of safe conduct for Queen Margaret Tudor, under the great seal

Jacobus Dei gracia rex Scotorum universis et singulis terre et mari prefectis civitatum consulibus et oppidorum decurionibus aliisque magistratibus et officiariis subditis nostris salutem. Volentes illustrissimam regni nostri reginam matrem principem serenissimam pro aspectu intueri et rursus ab eadem ad ipsius et nostrum solamen confoveri ex consanguinei nostri Johannis ducis Albanie etc., tutoris nostri ac regni gubernatoris ac trium statuum consilio et assensu per presentes nostras litteras concedimus et permittimus regine charissime matri ex Anglia in hoc regnum nostrum pacifice et libere cum suo comitatu honesto ex Scotis ligiis nostris quot volverit ex exteris vero et aliunde genitis ut pro numero et personarum qualitate consanguineus noster et regni status concedent intrare et in hoc regno nostro pacifice et secure cum sua comitiva residere sine cuiusuis hominis molestia, impedimento aut contradictione. Insuper nostre mentis fuit, est et erit et ex consanguinei nostri tutoris et gubernatoris ac statuum parliamenti nostri decreto volumum ut charissima nobis genitrix gaudeat et potiatur omnibus et singulis redditibus, proventibus, juribus et emolumentis quibuscumque dotis sue in hoc regno sitis eisdem modis et forma et libertate quibus dos ipsa ad matrem nostram ratione jure et equitate spectet. Et favoris diligentiam et assistenciam ad matris nec usus et dotis sue exactione fieri jubemus ut pro juribus et rebus nostris inferendis prestatur. Ad hec mobilia preciosa et alia quevis bona ad charissimam nobis matrem spectantia sibi integra absque ulla dilatione aut contradictione reddi jubemus charissima nobis matre que ad nos pertinent et que detinet etiam nobis reponente. Insuper nolumus ut charissime nobis genitrici aut comitive sue supra memorate arresta, damnum, nocumentum aut impedimentum in bonis aut corpore ex quacumque occasione inferatur aut fiat, quinetiam hanc nostram concessionem et permissionem, salvum conductum et securitatem amplissima et securissima forma que excogitari poterit charissime matri nostre ac omnibus et singulis personis ex sua comitiva ut prefertur fore et esse decernimus. Proviso semper ne charissima nobis mater aut persona aliqua ex suis officiariis et assistentibus et aliis in eius comitiva agant aut agi procurent quovismodo quicquam prejudicii adversus nos, consanguineum tutorem et gubernatorem, aut regnum nostrum, quo tamen casu nolumus nec intelligimus prejudicium generari aut imponi personis non offendentibus sed presentes litteras non offendentibus personis in robore vigore et effectum perdurare. Idcirco vobis omnibus et singulis cuiuscumque status, ordinis aut condicionis mandamus honorem, reverentiam et placentiam charissime nobis genitrici non aliter quam nobis ipsis ac consilium honestum et bonum ubi requisiti fueritis exhibere ut nobis gratificari et desuper sub omni pena respondere et indignationem nostram fugere cupitis et intenditis. Datum sub nostro magno sigillo apud Edinburgum anno sexto decimo.