[1458/3/2]¹

Legislation

In primis, as to the artikill of the sessione, it is seyne speidfull to the king ande the thre estatis that it be contynuit quhill the nixt parliament in manir as eftir folowys. That is to say: the lordis of the sessione sall syt thryse in the yer, ilk tyme xl dais in thir thre placis - Edinburghe, Perthe and Abyrdene. The nowmir of the personis that sall sit salbe ix, haifande² wotis in the deliverance of causis of ilke estate thre and the clerk of the regestir. Nowe, the sessione nixt to be haldin at Abirdene the xv day of Junii and continuande xl dais; the secunde sessione to begyne at perthe thareftir the v day of October and continew vthir xl dais; the thride sessione to begyn in Edinburghe the xiij day of Februare next thar eftir and continew xl dais. The lordis that ar chosyne to the first sessione in Abyrdene ar thir: the bischoppis of Ross and Catness and Murray, the abbot of Derdue,³ Dauid Bane and maistir Waltir Ydyll for the clergy, the erle of Arrell, the lorde Glammys ande the lorde Forbass for the baronys, Jhone of Fyf, Andro Menyeis and Waltir Thomsone of Inuirnes, for the burrowys. The lordis that sall sit in the secunde sessione in Perthe: the bischope of Dunkeldin, the abbot of Lundoris, the archdene of Sanctandris for the clergy; the lorde Gray, Patrik of Rettree, Thomas of Abyrcrummy of that Ilk for the barounis, [Archebald Stewart, Robert Mersar and Dauid Spalding].⁴ The lordis for the thride sessione in Edinburghe to be haldyne: the bischoppis of Glasgw, Galloway, ane wthir bischope the quhilk the king sall charge tharto, the abbot of Halyrudhous' the provest of Linclowdane for the clergy, the lordis Lindissay, the lorde Halys for the baronys, Williame' of Cranstone, Alex' Naper and Robert Narne for the burowis. And at the shref of the schyre at the lordis sittis in be redy by thame far the tyme of thar sitting till wndirgang sik chargis as thai sall put till him togiddir with a masare to ministir in his office. The causis that the lordis of the sessione sall knaw apone: in the first all spoliacione done fra the first day of Januar' the yer of our lorde j^M iiij^C xlix yeris be cause that the act of spoliacione was maide that yere. And all uthir spoliacioune that salbe done enduring the yeris and tymis of the haldin of the sessione.

[1458/3/3]⁵

For the spoliacioune

Item the lordis of the sessione sall haif full powere to knawe and decide all spoliaciounis maide fra the day of the coronacione of our sovirane lorde the king to the saide first day of Januar' for the space of a yere nixt to cum. The quhilk yere gane and ourrwne of sik spoliacione maide befor the first day of Januar salbe decydit and determyt befor the ordinar jugis of the realme, the lordis of the sessione haifande na powere to knawe apone thame eftir that the saide yere be rwnnyn. The quhilk acciounis of spoilye consistis twa maniris: the first is spoliacion of movabill gudis nothir tuichinge fee nor heritage, the quhilk indeferent salbe decidyt befor the lordis of the sessione; the secunde spoliacione as that is to say done because of landis or possessiounis debatable' or grondyt apone fee and heritage. And apone that spoliacione the lordis sall procede thus: that is to say quhen the party spoilyeit complenyeis befor the lordis of the sessione, the lordis sall call the schiref ande furthwith sall ger restore the grownde without prejudice of ony party tuichande thar fee ande heritage. Ande retoure the landis [in]⁶ the kingis handis apon the quhilk spoiliacione is maide on to the tyme thai be lowsyt be the king.⁷ Ande the king to mak inquisicione to be tane be the schiref quha was last lauchfull possessoure of thai landis. And alsua the said lordis sall knawe apone all spoliacioune of takis ande mailingis. Ande alsua knawe apone all obligacionis, contrakis and all manir of dettis ande uthir civile acciounis the quhilkis concernys nothir fee nor heritage. Ande the parteis complenyeande to haif full fredome to folow thar acciounis befor the saidis lordis or thar ordinar jugis. And for till eschew maliciouse vexacione of ony party folowande or defendande befor the sessione the saidis lordis sall furthwithe ger the expensis be payit to the wranguise[ly]⁸ vexit be the modificacione of the saide lordis, etc.

[1458/3/4]⁹

The manere of the sessione

The maneris of the causis salbe brocht befor the lordis of sessione is th[is]¹⁰: the schireffis of the schyris quhare the saide lordis sall syt salbe new warnyt to proclame in ilkane of thar placis thre monethe befor the sessione gif ony parteis has ony acciounis to folow befor thame he sall warne thame to pass to the kingis chapell ande raise summondis peremptor' apone xl dais and call his party befor the lordis of the sessione the quhilkis sall minister thame justice as efferis. Ande this summondis to be undirstande apone acciounis done befor the proclamacione of this sessione. The party sall ansuere peremptourly apon schortir tyme eftir as thai beis summonde sua that the tyme of the summondis extende to xv dais. And gif ony accioune pertenys to the saide lordis knawlege be continewit in the tyme of the saide sessione in the schyr quhar the sessione sittis be ony persone thay furthwithe to be arestyt with a masare and justice to be done tharapone as efferis. And all uthir causis pertenande to the saidis lordis knawlege salbe wtirly decidyt and detirmyt be thame but ony remeide of appellacione to the king or to the parliament. Ande personis that evir purchess a summondis apone his party ande haif ony pruwys to leide, at he raise a summondis apone his pruwys and bring thame¹¹ with him to the sessione as he will be servit.

[1458/3/5]¹²

Expensis of the lordis of the sessione how thai salbe tane

Item as tuiching the expensis of the lordis befor writyne and the placis that thai sall syt in, and the gret gude of the realme considiryt, the lordis of the thre estatis thinkis that the saidis lordis of the sessione of thar awne benevolence sulde beir thar awne costis considiring the schortness of the tyme of the sitting, the quhilk is bot xl dais, and peraventor in vii yeris nocht to cum agane to thame. And to support sum part of expensis thai sall haif the kingis wnlawe of thar awin court, the quhilk salbe xl s. unforgiffyne to be devidit betuix thame and the clerk of the regestir be ewynly porciounis.

[1458/3/6]¹³

Item the saide thre sessiounis endit, our sovirane lorde and his daily consale sall ordane and name wthir lordis to syt at tymis and placis sene speidfull to him and his saide consale on to the tyme of the nixt parliament with sik power as thai hade of befor, etc.

[1458/3/7]¹⁴

Anent wapinschawingis

Item it is ordanyt and decretyt that wapinschawingis be haldin be the lordis ande baronys spirituale and temporale foure tymis in the yere, and at the futbawe¹⁵ ande the golf be utirly criyt doune and nocht wsyt, ande at the bowe merkis be maide at all parrochkirkis, a paire of buttis, and schuting be wsyt ilk Sunday. Ande that ilk man schut sex schottis at the lest wndir the payne to be raisit apone thame that cumis nocht at the lest ii d. to be giffin to thame that cumis to the bowe merkis to the drink. And for to be wsyt fra Pasche till Alhallomess entir, ande be the nixt mydsomir [to be reddy]¹⁶ with all thar geir¹⁷ without sonye. And that thar be a bowar and a flegir in ilk hede towne of the schyre, and at the towne furnyse of stuf and graithe eftir the nedis tharto that he may serve the cuntre with. And as tuichande the futbaw and the golf we ordane it to be punyst be the baronys wnlawe; and gif he takis it nocht, to be tane be the kingis officiaris. ¹⁸Ande gif the parrochin be mekill, that thar be iij or iiij payre of buttis in sik placis as best accordis tharfor. And ilk man within that parrochin passit xij yeris sall use schuting.¹⁹

[1458/3/8]²⁰

The mone

Item as to the mone thir ar the lordis that ar chosyne tharapone: the bischope of Murray, Ross or Catness, the abbot of Dunfermling, the abbot of Halyrudhouse, Maistir Patrik Yonge, and the lorde Grahame, the lorde Lindissay, the lorde Hammyltone, the larde of Cranstone, Johnne of Dalrympill or Archibalde Stewarde, Alexandre Naper, George of Fawla and Jhonne of Fyf. And thir persois to be chargyt be the kingis lettres to convene in the tyme of the nixt chekare in the place quhare the chekare is haldin or ony wthir place sene speidfull till our soverane lorde to commone and prowyde apon the matir of the mone for the profet of the realme. And in the meyn tyme it is sene speidfull that the strikin of the mone cese quhill wthir provisione be maide tharfor.

[1458/3/9]²¹

The reformacioune of golde

Item anent the reformacione of golde and silvir wrocht be goldsmytths, ande to eschewe the desaving done to the kingis liegis, thar salbe ordanyt in ilk burghe quhar goldsmytthis wirkis ane wndirstadande and cunnande man of gude conscience quhilk sall be dene of the craft. And quhen the werk is brocht to the goldsmyt and it be golde, quhat golde that evir it beis brocht till him he sall gif it furth agane in work [na wer]²² thaine xx carettis.²³ And of silvir quhat evir be brocht him he sall gif it furth agane na wer than xij granys.²⁴ And the said goldsmyt sall tak his werk or he gif it furthe and pass to the dene of the craft and ger him examyn sa that it sa fyne golde as is befor writtyn. And the said dene of the craft sall set his merk and taking tharto togiddir with the said goldsmythis. And gif faute be fundyne tharin eftirwartis, the dene forsaide and goldesmythis gudis salbe in eschet to the king and thare liffis at the kingis will. Ande the saide dene sall haif to his fee of ilk unce wrocht j d. And quhare thar is na goldsmyth bot ane in a towne he sall schawe that werk takinnit with his awne merk to the hede officiare of the towne quhilk sall haif a merk in lik wise ordanyt tharto and salbe set to the saide werk. And quhat goldsmyth that giffis furth his werk wthir wayis thane is befor writyne, his gudis salbe confyskyt to the king and his lif at the kingis will, etc.

[1458/3/10]²⁵

Anent litstaris and litting

Item it is sene speidfull that lit be criyt up and usyt as it was wont to be, and that na litstar be drapar nor by clayt and tholyt to sell agane wndir the payne of eschet, etc., etc.

[1458/3/11]²⁶

Restrictione of multitude of sailaris for merchandice

Item anent the estat of merchandice and restrictione of the multitude of sailaris, it is sene speidfull to the estatis of clergy and the baronys and statuyt be the king that thar saill na persounis bot hable and of gud fame and at he haif at the lest thre serplaris of his awne gudis or ellis committyt till him or the awaill tharof, and at the saylaris in merchandice be fre men of burowis, induellaris within the burghe.

[1458/3/12]²⁷

Anentis habitis of lordis in parliament

Item anentis the habitis of erlis and lordis in parliament, commissaris of burowis and men of lawe it is sene spedfull at thai be maide and wsit eftir the tenor of the act maide tharapone, and that the king mak a patrone of ilk habite, and all the laif be maide thareftir, etc, etc.

[1458/3/13]²⁸

The reformacioune of hospitalis

Item anentis the reformacione of hospitalys, it is sene spedfull that oure soverane lorde charge his chancellere quhilk of lawe aucht to wesy hospitalys fundyt be the king and june to him the ordinar of ilk diocese with wthiris twa personys of gude conscience and wesy the saide hospitalys. And quhar thai can get the fundacioun of thame, ger thame be kepyt. And quhar na fundacione can be gottin, to tak ane inquisicione of the cuntre and refere to the king to se remeide tharfor. Ande this to be put in execucione and to be done betuix this and Martynmes. Thir ar the personis folowande that salbe junyt to the chancellare: the ordinar in the diocese of Sanctandris, Robert of Levinstone and the archdene of Sanctandris; in the diocese of Glasgw the larde of Elyistone and the archdene of Glasgw; in the diocese of Dunkeldin the dene of Dunkeldin and Thomas of Abircrummy; in the diocese of Brechin Sir Jhonne of Ogilby ande the dene of Brechin; in the diocese of Abyrdene the lorde Forbas' and the abbot of Der'; in the diocese of Murray the larde of Dufhouse ande the abbot of Kynloss; in the diocese of Galloway the lorde Maxvell and Maistir John Olyuir; in the diocese of Ross the chancellare of Ross and Williame of Vrchad in Crumbathy; ande for the remanent of the diocesis the chancellare and quham he will tak with him.

[1458/3/14]²⁹

Item that sene that the realme in all estatis is gretumly puryt throu sumptuose clething bath of mem and wemen and in speciall within burowis and commonys to landwart, the lordis thinkis speidfull that the restriccione tharof be maide in this manir: that na man within burghe that levys be merchandice bot gif he be a persone constitute in dignite as auldirman, bailye or uthir gude worthi persounis that ar of the consale of the towne and thare wifis, weire clathis of silk nor costly scarlatis in gownys nor furringis of m[er]t[rik]is; and at thai mak thar wifis and dochteris in lik manir be abeilyeying ganeande and corespondande for thar estate, that is to say on thar hedis schort curchess with litill hudis as ar wsyt in Flandiris, Inglande and wthir cuntreis. And as to thar gownys that na woman weir m[er]t[rik]is nor letvise nor talys of wnsittande lenthe nor furryt undir bot on the haliday. And in lik manir without the burowis of wthir pur gentillmen and thar wifis that ar within xl li. of aulde extent. And as anentis the commonys that na lauboraris nor husbandis weire on the werk day bot gray and quhit, and on the haliday bot lycht blew or grene or rede, and thar wifis rychtsa and curchessis of thar awne making, and at it excede nocht the price of xl d. the elne. And at na woman cum to the kirk nor mercat with hir face hide nor musalyt that scho may nocht be kende undir the payne of eschet of the curche. And as to the clerkis, that nane sall weire gownys of scarlat nor furring of mertr[ik]is bot gif he be ane persone constitute in dignite in cathedrale or college kirkis or ellis that he may spende ij^C merkis or gret nobles or doctouris. And this to be now proclamyt and put to execucione be the first day of Maii wndir the pane of eschet of the habite, that is to say of the clerkis be the ordinaris and the laif be the kingis officiaris.

[1458/3/15]³⁰

Item it is sene speidfull that justice ayris be haldin and continewyt yerly out throu the realme for gude of the commownys, etc.

[1458/3/16]³¹

Item anentis feuferme, the lordis thinkis speidfull that the king begyne and gif exempill to the laif. And quhat prelate, barone or frehaldare that can accorde with his tenandis apone setting of fewferme of his awin lande in all or in part, our soverane lorde sall ratefy and appreif the said assedacioun, sa that gif the tenandry happynnis to be in warde in the kingis handis the saide tenande sall remane with his feuferme wnremovyt, payande to the king siklik ferme endurande the warde as he dide to the lorde sa that it be set to a competent awail without prejudice to the king.

[1458/3/17]³²

Item as to the regaliteis, it is ordanyt and statuyt that all priwalegis ande fredomys be kepit as thai war fowndyt, and gif ony lorde haifande regalite abusande it in prejudice of the kingis lawis and brekin of the cuntre, that thai be punyst be the king and be the lawe as efferis.

[1458/3/18]³³

Item it is sene speidfull and statuyt that na beggar be tholyt to beg nothir within burghe nor to lande betuix xiiij and lxx yeris bot thai be sene be the awyse of the commownys of the cuntre that thai may nocht wyn thar leving wthir wayis. And thai that salbe fundyn haif certane taking to landwart of the schireffis and in burowis be the auldirman ande bailyeis, wndir the payne of byrnyng on the cheik and banysyng of the cuntre. And at that be execut be the schirefis to landwart and be the auldirman and balyeis in the burowis.

[1458/3/19]³⁴

Item it is sene speidfull anent mettis and mesuris that sene we half bot a king and a lawe universale throu out the realme that we sulde half bot a met and mesure generale to serf all the realme. That is to say ane pynt quhilk was giffin be the ordinance of the thre estatis, Sir Jhonne Forester that tyme beande chawmerlane to the ayre of Strivilling as for standart, sall remane universale throu all the realme. And the ferlot salbe maide thareftir, that is to say ilk ferlot sall contene xviij pyntis of the sammyn mesure rownde and elik wyde wndir and abwne the twa burdis contenande ewyne o[vi]r in thikness ane inche and a half, ande the breide o[vi]r within the burdis xvj inchis ande a half, ande the half ferlotis and pekkis to folowe the sammyn kinde. And thir saide mesuris, that is to say pynt and ferlot, thar salbe maide thre standartis, ane to sende till Abyrdene, ane uthir to Perthe, and the thride to Edinburghe, to remane and now to be proclamyt that fra the fest of Sanct Michaell nixt to cum thir mesuris, pynt and ferlot, haif course and nane uthir, sua that in the menetyme all manir of persounis that thinkis to wse the said mesuris thai cum to the saide placis and furnys thame with the saide mesuris beande byrnt and selyt with the selys of the stedis as thai will wse and be servit thareftir. And gif ony persounis eftir the saide tyme wsys wthir mesouris than thir and thai may be taynt gottin tharof be dittay or wthir wayis, thai sall pay the wnlawe of the chawmerlane ayre doublyt. And gif ony man be foundyt of aulde or of newe of fyrmess of wthir mesuris than thir abwne writyne, thar foundacione sall stande in effect not ganestanding this statute. And the mesoure of thar fundacion salbe proporcionyt to this mesure that now is sua that the samyne quantite sall remane with the giffare and ressawere but prejudice of ony of thame, etc.

[1458/3/20]³⁵

Item anentis the contentacione plenzeande of parteis of diverse personis quhilkis has remissiounis of the king, it is sene speidfull for ony actione that is to be committyt in tyme to cum quhensumevir that the party quhame it is complenyeit of allegis till his remissione othir for spoilye of gudis or thift or ref, the party allegeande till his remissione sall fynde souer borowis to content the party plenyeande within xl dais nixt folowande. And gif he dois nocht he sall remane in the kingis presone quhill the saide xl dais be runnyne, and than his remissione to be expiriyt and to be of na walour. And as of actionis commyttit in tyme bigane, the party plenyeande sall haif recourse to the lordis of the sessione the quhilk sall haif powere to ger thame be restorryt eftir the tenor of the act of spoliacioun maide tharapone; or gif it plese the party to folow the process to the ferde ayr eftir the aulde use and custum and thareftir gif the party be nocht content, his remissione to be expiryt and of nane awaill as is befor saide.

[1458/3/21]³⁶

Item as anentis reformacione of chawmerlane ayris be the quhilkis all the estatis and specialy pure commownis ar sairly grewyt, the lordis in the name of the thre estatis exhortis oure soverane lorde that it plese him with sade consale of the thre estatis beande now present to haif piete and consideracioun of the mony and gret inconvenientis that fallys on his pure liegis thar throu, and of his grace to provyde and remeide for reformacione tharof.

[1458/3/22]³⁷

Item the lordis thinkis speidfull that na frehaldare that haldis of the king wndir the sowme of xx li. be constrenyeit to cum to parliament or generale consale as for presens bot gif he be a barone or ellis specialy of the kingis commandment be warnyt othir be officiare or be wryte.

[1458/3/23]³⁸

Item quhare the kingis constables, deputis and his mimistiris in tyme of sessione, generale consale or parliament takis distressis for constables feis of all manir of gudis, gret ande small, that cumis to the mercat to sell baith merchandice and wyttalys, it is sene speidfull at that wse be laide doune and forborne in tym [to] cum bot gif the constables feftment beire him tharto, and at that be schawin to the king and the the thre estatis at the nixt parliament or generale consale. And at in the mentyme the constabilis cese for thar can na law be fundyn accordande to that wse.

[1458/3/24]³⁹

Item our soverane lorde and his thre estatis ordanys and determys that gif ony of his officiaris as schirefis, maris, bailyeis, crownaris, serjandis, prowestis of burowis and thar ministeris baith to lande ande burghe be fundyn negligent or fautyce in the execucione of thar office and it may be lauchfully prowit on him or notourly kende, gif the saide office pertenys to him in fee and heritage he sall tyne his office and the profettis tharof for ane yer and a day, ande be punyst be the king in his persone⁴⁰ and gudis efir the quantite of his trespass. And gif his office pertenys nocht to him in fee and heritage, he sall tyne his office for all the tymis that he has it and punyst in his persone eftir the quantite of the trespass at the kingis will.

[1458/3/25]⁴¹

Item it is sene speidfull to the lordis that within the burowis throu out the realme na bandis nor ligis be maide nor yit na rasing of commownys in hindiring of the common lawe, bot at the commandment of thar hede officiaris. And gif ony dois in the contrary and knawlegis or taynt may be gottin tharof, thair gudis that ar fundyn gilty tharin to be confyskit to the king and thar lifis at the kingis will. And at na man duellande within burghe be fundyn in manrent nor ride nor rowt in feir of weir with na man bot with the king or his officiaris or with the lordis of the burghe that thai duell in, or with thare officiaris wndir the sammyn pane. And in lik maner that na induellare within the burghe purchess ony lordschipe in oppressione of his nychtburis in lik maner wndir the sammyne payne.

[1458/3/26]⁴²

Item anentis maisterfull men that schapis thame to occupy maisterfully lordis landis baith spirituale and temporale, the lordis thinkis speidfull that the personis complenyeande on sik men sall cum to the kingis schiref or bailye and ask grounde to be devodyt or to ask the party that occupyis the grownde quhat resone he pretendis for him. And gif the schiref fyndis na refone in the occupacione of the grownde he sall devoide the grownde baith of him and his gudis and charge him in the kingis name that he mak na mare distribulance to that grownde nor the in tym to cum wndir the payne of the kingis warde.⁴³

[1458/3/27]⁴⁴

Item the lordis thinkis speidfull that in all justice ayris the kingis justice ger tak inquisicione of sornaris, bardis, maisterfull beggaris or fenyeit fulys and othir bannys' thame the cuntre or sende thame to the kingis presone.

[1458/3/28]⁴⁵

Item anent plantacione of woddis and heggis and sawing of browme, the lordis thinkis speidfull that the king charge all his frehaldaris baith spirituale and temporale that in the makynge of Witsundais thai statute and ordane that all thar tenandis plant woddis and treis and mak heggis and sawe browme eftir the quantite of thar malingis in placis conveniente tharfor undir sik payne and wnlawe as the barone or lorde sall modify.

[1458/3/29]⁴⁶

Item anent the sawing of quheit, peyse and benyse, that ilk man erande with a plwche of viij oxin sall sawe at the lest ilk yer a f[irlot] of quheit,⁴⁷ peyse and xl benys wndir the payne of x s. to the barone of that lande quhar he duellis alse oft as he beis fundin fautice. And gif the barone sawis nocht the said corne in his demanys, he sall pay to the king x s. And gif the barone beis negligent in the rasing of the saide payne on his husbandis, thar salbe raisit on him xl s. alse oft as he defautis to the king but remissione.

[1458/3/30]⁴⁸

Item it is ordanyt and decretyt that in all justice ayris schiref courtis and generaly all courtis spirituale and temporale all personis that sall cum tharto, lordis spirituale and temporale, frehaldaris and all wthiris the kingis liegis sall cum in sobyr and quiet manir. And at na man bring with him ma personis than ar in his daily houshalde and familiaris, and fra he be cumin intill his innys he and thai sall lay thar wapynnis and harnesis fra thame gif thai bring ony with thame, and wse na wapynnis for that tyme bot his knyf. And gif ony man be fedyt that allegis feide or dreide of ony party, the schiref sall furthwithe of baith the parteis tak law borowis and forbide thame in the kingis name to distruble the kingis pece wndir the payne of law, the quhilk payne the king sall execute without remissione apone the brekaris of the pece forsaide. Ande gif the schiref be negligent tharin he salbe punyst eftir the forme of the statute maide of the reformacioun of fautis and negligent officiaris within the realme, etc.

[1458/3/31]⁴⁹

Item that na man mak yardis nor heggis of dry staikis na rys' or stykis nor yit of na hewyn wode, bot allanirly of liande wode.⁵⁰

[1458/3/32]⁵¹

Item anentis the keping of birdis and wylde foulys that ganis to eit for the sustentacione of man as pertrikis, pluvaris, wilde dukis and sik lik fowlys, it is ordanyt that na man distroy thar nestis nor thar eggis nor yit sla wilde foulys in mouting tyme quhen thai may not fle, and that all men eftir thair powere distroy nestis, eggis and birdis of foulys of reif.

[1458/3/33]⁵²

Item, anentis rukis crawys and wthir foulys of reif as ernys, bussardis, gleddis and myttallis, the quhilkis distroyis baith cornis and wilde foulys sik as pertrikis, pluvaris and wthiris. And as to the rukis and crawys bigande in orchardis, kirk yardis or wthir placis, it is sene speidfull that thaim that sik treis pertenys to let thame to big and distroy thame with all thar powere, and on na wyse that thar birdis fle away. And quhare it is tayntit at thai big and the birdis be flowyne and the nestis fundin in the treis at Beltan, the treis salbe forfaltit to the king, bot gif thai be redemyt agane. And thai that aucht the saide treis in v s. of wnlaw to the king. And at the saide foulis of reif be wttirly distroyit be all manir of man be all ingyne and manir of way that may be fundyne tharto for the slauchtir of thame sall cause gret multitude of diverse kyndis of wilde foulys for mannis sustentacioune.

[1458/3/34]⁵³

Item anentis rede fische, it is ordanyt that quha sa beis convickit of slauchtir of rede fische in tyme forbodyn be the lawe, the doar and he that biddis it be done sall pay x li for the wnlawe but remissione. And at the thride tyme ande he be convickit of sik trespass he fall by his lyf. And gif ony man be infeft of fredome to fische in forbodyn tyme, sik privilege sall cese quhill the nixt parliament. And gif ony dois the contrary he sall pay ane wnlawe befor the justice, apone the quhilk trespass the justice clerk sall inquyre at the resaving of the dittay as of wthir poynttis belangand his offyse.

[1458/3/35]⁵⁴

Item that na man in smolt tyme set veschellis, crelys, were or ony wthir ingyne to lat the smoltis to pass to the sey wndir the payne of x li to the king. And at the schiref of the lande distroy thame that ar maide.

[1458/3/36]⁵⁵

Item it is ordanyt for the distruccione of wolfis that in ilk cuntre quhar ony is the schiref or the bailzeis of that cuntre sall gadir the cuntre folk thre tymis in the yere betuix Sanct Merkis day and Lammes for that is the tyme of the quhelpis, and quhat evir he be that ryssis nocht with the schiref or the bailye or barone within him self he sall pay wnforgevin a weddir as is contenyt in the aulde act maide tharapone. And he that slays ane wolf than or ony wthir tyme he sall haif of ilk house haldis of that parrochin that the wolf is slayne within j d. And gif it happynnis ony wolf to cum in the cuntre that witting is gottyne [tharo]f the cuntre salbe redy hwnt thame ilk houshaulde wndir the payne forsaide. And he that slays a wolf sall bring the hede to the schiref, bailye or barone and he salbe dettour to the slaar for the sowme forsaide. And quha evir he be that slays a wolf⁵⁶ and bringis the hede to the lorde, bailye or baron sall haif vj d.

[1458/3/37]⁵⁷

Item anentis the slaaris of harys in snawe tyme and distruccione of cunnyis, the thre estatis declarys that it salbe a poynte of dittay.

[1458/3/38]⁵⁸

Item quhare it was act and statuyt befor in the parliament in our soverane lordis tyme that last discessit the yere of our Lorde j^M iiij^MC [x]xiiij⁵⁹ yeris that all lesyng makaris and tellaris of thame the quhilkis ingeneris discorde betuix the king and his pepill, quhare evir thai may be taynt gottin of thame thai salbe chalangyt befor thame that power haise and tyne lifis and gudis to the king, that be this present parliament is apprevyt, confirmyt and ordanyt to be conservyt and execute in tyme to cum.

[1458/3/39]⁶⁰

Item quhare it was statuyt in a parliament of or soverane lord that last decessyt the xxvj day of May the yere of our Lorde j^M iiij^MC xxiiij yeris that na man mak murebirne eftir the monethe of Merche quhill all cornys be schorne wndir the payne of xl s. to be raisit to the lorde of the lande of the birnare, and gif he has nocht to pay that he be punyst xl dais in presone, and gif the lorde of the lande raisis nocht the payne na punysis nocht the trespassour as it is befor saide, the justice clerkis be indictmentis sal ger sik trespassouris be correkit befor the justice and punyst as is befor writyne, in this parliament the thre estatis apprewys this statute and ordanys it to be kepit in tyme to cum.

[1458/3/40]⁶¹

Item the lordis thinkis speidfull that our soverande lorde commande all his schirefis ande commissaris of burowis to cum to the clerk of his regestre and ger copy all thir acts, articulis and statutis abwne writtynge and ger proclame thame out throu thar schyris and burowis sa that nane of his liegis allege ignorance of thame in tyme to cum. And alsua that all the actis and ordinance abwne writinge quhilkis ar necessary till his baronys and frehaldaris to be schawin at thar Witsundais making or in thar barone courtis rychtsa be takin and copyit and schawin to his tenandis sa that nothir the frehaldaris nor the tenandis be negligent nor pretermyt the obseruynge of the saidis decretis, and at the paynis set tharapone be sa deuly raisit that the saide actis and decretis be observyt and kepit as efferis, etc.

[1458/3/41]⁶²

⁶³Ande heir attoure sene Gode of his grace has send our soverane lorde sik progress and prosperite that all his rebellys and breikaris of his justice ar removit of his realme, and na maistirfull men nor party remanande th[at] may cause ony breking in his realme, sa that his hieness be inclinyt in himself and his ministeris to the quiet and commowne profett of his realme, justice [to] be kepit amang his liegis,⁶⁴ his thre estatis with all humilite exhortis ande requiris his hieness to be inclynit with sik diligence to the execucione of thir statutis and actis abwne writynge that God may be emplesit of him and all his liegis spirituale and temporale may be sa content of him that thai haif cause to pray allmychtthy Gode for his prosperite and gif hertly thankynge to Gode that sende thame sik a prince to thar governour and defendour, etc.⁶⁵