Act in favour of the minister of Colbrandspeth

Oure soverane lord, with advyse and consent of the thrie estates of this present parliament, ratifies and approves the act or decreit pronuncit and maid be the lords and uthers of the commissioun for surranders and teinds anent the plantatione of the kirk of Colbrandspeth, of the dait the tuentie aucht day of Januar, the yeir of God jM vjC threttie ane yeirs, quhairby they modifiet the soume of ane hundreth punds to be payit be the Earle of Home to the minister of the said kirk of Colbrandspeth and his successors as ane pairt of the stipend of the said kirk; quhilk soume of ane hundreth punds thairby augmentit, being joyned to the former stipend of the said kirk quhairof Maister George Sydserffe, minister thairat, was in possessione of befor, extending to four chalders victuall and ane hundreth punds of silver, quhairof tuentie thrie bolles aittes, nynteine bolles beir and four bolles quheitt payit be the said Earle of Home, and auchteine bolles victuall, quhairof nyne bolles beir and nyne bolles aittes, with ane hundreth punds of silver, payit be the persone of Auldhamestockes, besyde the small teinds callit the viccarage teinds estimat to be worth yeirlie ane hundreth markes, quhilkes the said minister intrometts with and uplifts, will mak the stipend of the said kirk to be four chalders victuall and four hundreth markes of silver, comprehending thairin the viccarage teinds quhilkes ar estimat to be ane hundreth markes, in all pointes, articles and clauses thairin contenit, effir the forme and tennor thairof, except in sa far as the samyne is innovat and dischargit in manner following; and declairs and ordaines this present ratificatioune thairof to be als sufficient in all respects as if the samyne wer at lenth and word be word insert and ingrossit heirine. And forsameikle as be the said decreit the making of ane particular locall assignatione for payment of the said soume of ane hundreth punds augmentit as said is, and the directing of letters and chairges for payment of the samyne, was superseidit and continewit till the actes and proceidings of the saidis commissioners in executione of the commissioune grantit wnto thame war exhibit to the estaits of parliament and approvine be thame, againes the quhilk suspensione and continewatione thair was ane protestatione maid in presence of the saidis commissioners, of the dait the nynt day of Februar, jM vjC threttie ane yeirs forsaid, be Johne, bischope of Murray, Adame, bischope of Dumblane and Johne, bischope of Caithnes, in thair awin name and in name of the remanent bischopes and ministers throuchout this kingdome, and appellatione maid to his majestie for redres, as the protestatione maid thairanent beirs at lenth. And his majestie and estates of this present parliament, being willing that the said haill stipend, alsweill auld stipend as augmentatione thairof forsaid, be payit to the said minister and his successors, alsweill of the said crope and yeir of God jM vjC threttie ane yeirs as of all yeirs and cropes sensyne and perpetuallie in all tyme coming, thairfor his majestie, with advyse and consent forsaid, be thir presents, rescinds, annulls and dischairges the forsaid superceiding and continewatione contenit in the said decreit or act anent the plantatione of the said kirk, and decernes and ordaines the said haill stipend, alsweill ald stipend as augmentation thairof abonespecifiet, to be payit to the said minister and his successors conforme to the said decreit of plantatione, alsweill of the said crope jM vjC threttie ane yeirs and of the crope jM vjC threttie tua yeirs lastbypast as of this instant crope jM vjC threttie thrie yeirs, and in all tyme coming. And ordaines the said decreit of plantatione and this present ratificatioun thairof to be sufficient richt and secuiritie to the said minister and his successors for bruiking and joysing of thair said stipend, baith ald stipend and new augmentatione thairof forsaid, perpetuallie in all tyme coming, ordaining thir presents to be ane sufficient warrant to the clerk of register and his deputtes for extending of ane act of parliament heirupon in dew forme.

  1. NAS, PA2/21, f.132r-v.