[1633/6/169]¹

Act in favour of the kirk of Pittinweyme

Oure soverane lord and estates of this present parliament have ratifiet and approvine and, be the tennor of this present act, ratifies and approves the band and obligatioun maid and grantit be umquhile Alexander, lord Fentoun to the baillies and counsall of the burgh of Pittinweyme, quhairby he band and obleist him, his airs and successors to perfyt, subscryve and deliver to thame or to the minister at the kirk thairof ane sufficient secuiritie in sick ample forme as micht stand be law, be the quhilk he sould provyde the said minister serving the cure at the said kirk of Pittinweyme and his successors to ane yeirlie stipend of four hundreth merks and fyve hundreth merks money of this realme respective to be uplifted furth of the personage and viccarage teinds of the lordschip of Pittinweyme, or any pairt thairof, at the termes and in maner as is specifiet and sett downe in the said band, quhilk is of the dait the saxt day of Junii, the yeir of God j^M vj^C threttie tua yeirs, and registrat in the buikes of counsall and sessioun and ane decreit of the lords thairof interponit thairto upon the first day of Januar lastbypast, togider with the contract and appointment maid and perfyted betuix the baillies and counsall of the said burgh of Pittinweyme thairof, subscryvers for thameselffes and takand burdeine one thame for the commountie of the said burgh one the ane pairt, and Maister Johne Melvell, minister at the said kirk of Pittinweyme, one the uther pairt, of the dait the tuelf day of July, the yeir of God j^M vj^C threttie tua yeirs, and registrat in the saidis bookes of counsall and sessioun and ane decreit of the lords thairof interponit thairto upon the tuentie saxt day of Februar lastbypast, quhairby the saidis baillies and counsall of the said burgh of Pittinweyme provydit the said Maister Johne Melvell and his successors ministers at the said kirk thairof to ane yeirlie dewtie of ane hundreth and tuentie merks money forsaid farder nor the provisione abonespecifiet contenit in the said band, to be uplifted at the terme of Mertimes yeirlie furth of the reddiest of the grass, mealles, customes and commoun good of the said burgh, and designit to him the gleib specifiet in the said contract boundit in maner thairin contenit; quhairby the said Maister Johne Melvell, for him and his successors, accepted the provisione forsaid contenit in the said contract and band, with the designatione of the said gleib, in full satisfactione of all farder stipend, manse or gleib that could be cravit be him or his successors in any time thairefter, as the said band and contract in thameselfes at lenth beares. Attour, oure said soverane lord and estates of this present parliament statuites and ordaines the forsaidis tua provisiones of money contenit in the saidis band and contract and designatioun of the gleib designit be the said contract to stand and be ane perpetuall and sufficient locall stipend to the said Maister Johne Melvell and his successors ministers at the said kirk, and to serve him and thame in contentatione and full satisfactione of thair manse and gleib at the samyne kirk. And farder, forsameikle as his majesties wmquhile deirest father, King James the Saxt, of eternall memorie, be his letters of gift wnder the privie seale of the dait the last day of Junii, j^M v^C fourscoor and nyne yeirs, gave, grantit and disponit to umquhile Maister Nicoll Dalgleiss and his successors ministers at the said kirk of Pittinweyme certane quantities of victuall, silver and salt thairinmentionat, and that for yeirlie provisioun and stipend to the said umquhile Maister Nicoll, than minister at the said kirk, and his successors ministers thairat, quhilk gift beirs that the said kirk was than laitlie erectit in ane paroche kirk and sua ratifiet in the preceiding parliament, lykas the said umquhile King James the Saxt, be his signature superscryvit with his hand, beirand dait the saxteine day of August, the yeir of God j^M vj^C and ellevine yeirs, ratifiet and approvit the erectione of the said kirk in ane paroche kirk, notwithstanding quhairof, throw negligence of the pairties intrusted in the managing of the townes effairs, the said act of erectione is amissing, lykas the said signatur, be the lyk slaknes of thes quha wer imployed thairine, wes never prosecute nor exped; quhairwnto his majestie and estates of this present parliament, being most willing and cairfull to provyde remeid, thairfor they have of new erectit, creatt and constitute and, be thir presents, of new erects, creatts and constituites the said kirk of Pittinweyme in ane severall paroche kirk and designes the bounds of the parochine thairof to comprehend the burgh of Pittinweyme and haill lands lyand betuix the burgh of Anstruther Wester one the eist, the lands of Sanct Monance and Abercromie one the west, and the lands of Balcaskie and Grangemure one the north (exceptand alwayes fourscoor aikers of land perteining to the fewers of Anstruther and Mylnetoune, with thair commounties, be east the march stanes quhilk lyes in the parochine of Anstruther Wester); and to the effect that the said kirk of [...]ittinweyme may be ane severall paroche kirk, oure said soverane lord and estates of this present parliament have disjonit and dissolvit the said burgh of Pittinweyme and haill lands lyand within the bounds forsaidis quhilks ar comprehendit within the said parochine of Pittinweyme fra the said kirk and parochine of Anstruther Wester, to the effect they may remaine in all tyme coming heireftir tua severall and distinct paroche kirkes and parochines.