[1633/6/147]¹

Act in favour of Sir Johne Spottiswod of Dairsie

Oure soverane lord and estates of this present parliament ratifies and approves the chartor maid and grantit be his hienes umquhile darrest father to Sir Johne Spottiswode of Dairsie, knicht, his airs male and assignais quhatsumever heretablie of the kirklands of Dairsie and the paroche kirk thairof, togider with the personage and viccarage teinds of the samyne manse and gleib thairof, fruites, rents and emoluments quhatsumever perteining to the said kirk, lyand withine the regalitie of Sanct Androis and shirefdome of Fyffe, togider with the paroche kirk and parochine of Dalgarno, personage and viccarage thairof, with manse, gleib and kirklands of the samyne and uthers fruites, rents and emoluments belonging thairwnto, lyand withine the shirefdome of Drumfreis, be the quhilk chartor his hienes said umquhile darrest father dissolved and dismemberit the saidis tua paroche kirks of Dairsie and Dalgarno, with thair forsaidis, fra the lordschipes of Sanct Androis and Halyrudhous respective, to the quhilk they wer annexit of befor as ane pairt of the patrimonie and spiritualitie thairof, and erected the saidis tua paroche kirkes in tua severall and distinct benefices be thameselffes. And lykwayes ratifies and approves the new gift and dispositioune thairin contenit maid to the said Sir Johne Spottiswode and his forsaidis of the saidis kirklands of Dairsie and the saidis paroche kirkes of Dairsie and Dalgarno, with advocatioun, donatioun and richt of patronage of the saidis tua kirks unitit and annexit to the saidis kirklands of Dairsie to be haldine of oure said soverane lord and his hienes successors in frie blensche ferme, as at mair lenth is specifiet in the said chartor wnder the great seale, of the dait at Quhytehall, the fyft day of Junii, j^M vj^C tuentie ane yeirs, with the precept of sasing and instrument of sasing following thairupon, procuratories and instruments of resignatioun and dimissioun quhairupon the said chartor proceidit in all and sundrie the heads, pointes, pases, clauses, articles circumstances and conditiones thairin contenit. And oure said soverane lord and estates of parliament allowes and grants and, for his hienes and his successors, decernes and ordaines that this present ratificatioun of the saidis infeftments, precept and sasing following thairupon, procuratories and instruments of resignatioun and dimissioun quhairupon the samyne proceidit, is and sall be of als great force, strenth and effect to the said Sir Johne Spottiswode and his forsaidis for bruiking of the saidis kirklands, teinds, kirks and uthers forsaidis, advocatioun, donatioun and richt of patronage of the samyne as if the samyne haill chartor wer at lenth speciallie and particularlie heirin sett downe; quhairanent, and with all uther defects and imperfectiones that may be proponit or alledgit againes the samyne or this present ratificatioun thairof, oure said soverane lord and estates of parliament hes dispensit and, be thir presents, dispenses for ever, and that the said ratificatioun be farder extendit in the best forme with all clauses necessar.