Act in favour of Maister Andro Ayttoune of Logy, advocate

Oure soverane lord, with advyse of the estates of this present parliament, considering that be contract and appointment past betuix his majesties umquhile father and mother of happie and blissed memorie, with advyse and consent of the lords of counsall and officiars of estate for the tyme, takand the burdeine upon thame for umquhile Maistres Margaret Wincester, servetrice to his majesties said umquhile darrest mother, and the said Maistres Margaret, for hirselff one the ane pairt, and umquhile Andro Weymes of Myrcairnie, ane of the senators of the colledge of justice, and umquhile Johne Weymes, his eldest lawfull sonne and appeirand air, upon the uther pairt, of the dait at Halyrudhous and Edinburgh, the thride and saxt dayes of the moneths of November and Marche, the yeir of God jM vC fourscoure thretteine yeirs, anent the mariage than contracted and thaireftir solemnizat betuix the said umquhile Johne Weymes and the said umquhile Maistres Margaret, the said umquhile Andro Weymes was astricted to infeft and sais the said umquhile Johne Weymes, his sone, and the said umquhile Maistres Margaret, than his future spous, and the langer leivar of thame tua in conjunctfie and the airs male to have beine procreat of thair bodies, quhilks failyeing, the neirest lawfull airs male of the said umquhile Johne Weymes quhatsumever heretablie, in all and haill the said umquhile Andro Weymes lands of Myrcairnie, with the mylne, mylnelands, multors and suckine, houses, biggings, yeards, orcheards, pairts, pendicles and all thair pertinents lyand withine the shirefdome of Fyfe; and lykwayes to infeft and sais the said umquhile Johne Weymes, his said sone and his forsaidis in fie and heretage, in all and haill the lands of Wester Cruvie and Brighous, with the pertinents, in all and haill the lands of Logie, with thair mansioun houses, biggings, yeards, orcheards and thair pertinents, lyand withine the said shirefdome of Fyffe, to be haldine of the said umquhile Andro Weymes, his immediat superiors thairof, ather be resignatione or confirmatione as best sould please the said umquhile Johne Weymes and his airs; quhilk resignatioun his majesties said umquhile darrest father promised to receave for new infeftment to follow thairupon, and for to chainge the halding of the lands and uthers forsaidis fra waird to blensche ferme, and the haill lands of estate of the said Andro Weymes to erect, uneite and incorporat in ane frie baronie, as in the said matrimoniall contract of the dait foirsaid registrat in the buikes of counsall upon the fourteine day of Marche, jM vC fourscoir fourteine yeirs at mair lenth is contenit; conforme to the tennor of the quhilk contract, the said umquhile Johne Weymes and the said Maistres Margaret wer infeft and saisit in the lands and uthers respective forsaidis in maner aboneexprest, haldine of his majesties said umquhile darrest father and his successors in frie blensche ferme and frie baronie, callit the baronie of Myrcairnie. Lykas the said umquhile Johne Weymes resignit the forsaidis lands and baronie in the hands of his majesties said umquhile darrest father for new infeftment thairof to be givine to the said umquhile Andro Weymes, conforme to the quhilk resignatioun the said umquhile Andro Weymes was infeft in the forsaidis lands and baronie be his majesties said umquhile darrest father haldine in frie blensche ferme of his majestie. Lykas the said umquhile Andro Weymes sauld, disponit and annailyeit the forsaidis lands and baronie to umquhile Johne Weymes of Craigtoun, quha was also infeft in the forsaidis lands and baronie haldine of his majesties darrest father in frie blensche ferme and frie baronie, quhilk umquhile Johne Weymes and umquhile Sir Johne Weymes of Craigtoun, knicht, ane of the senators of the colledge of justice, having the full richt of the forsaidis lands and baronie establisched in thair persones be dispositioun and alienatioun of the said umquhile Andro Weymes and of umquhile Sir Johne Weymes, sone to the said umquhile Johne and oy to the said umquhile Andro, for the soume of fiftie thousand markes money of this realme of Scotland, payit to the said umquhile Johne Weymes of Craigtoun be his majesties weilbeloved Maister Andro Aytoune of Logy, advocate, befor the lordes of counsall and sessioune, they sauld and disponit the forsaidis lands and baronie of Myrecairnie comprehending all the forsaidis lands to the said Maister Andro Ayttoune, quhilk Maister Andro Ayttoune of Logy is lykwayes infeft in the samyne haldine of his majestie and his successors in frie blensche ferme and frie baronie. Lykas the said Maister Andro is infeft in the teinds, baith personage and viccarage, of the saidis lands of Logy, Cruvie and Brighous, upon resignatione of Johne lord Balmerinoche. Lykas the said Maister Andro is infeft in the lands of Haltounhill, Murieriges, Craigend Medow besyde Ebdie kirk, Clunie and uthers contenit in his infeftment thairof, lyand within the regalitie of Lindores, schirefdomes of Fyffe and Perth respective, with sundrie priveledges, liberties specifiet in the said Maister Andro, his infeftment of the samyne, togider with the teindscheives and viccarage teinds thairof upon resignatione of Patrick, lord Lindores, umquhile Robert Aytoune of Craigfudie and Maister Robert Aytoune, his sonne, and Maister Andro Murray of Balvaird. And siclyk the said Maister Andro Aytoune is infeft in all and haill the lands callit the Staine Haltoune, with the tua dealles of land lyand betuix the lands of Grainge and Haltounehill, with the lands callit Richards Insche besyide the loche of Woodmylne, togider with the haill aikers of land callit the Crofts, with thair pertinents, togider with the teindscheaves of the particular lands abonewrittine includit, lyand within the regalitie of Lindores and shirefdome of Fyffe forsaidis, be dispositioun and alienation of Maister Harie Chaipe of Ormestoun, advocate, and Rebecca Aisone, his spous, with sundrie liberties and priveledges contenit in the said Maister Harie Chaipe, his infeftment of the lands of Ormestoune. Lykas the said Maister Andro hes maid resignatioune of all the forsaidis lands and uthers particularlie abonementionat, quhilks ar all uneite and incorporat in ane frie baronie callit the baronie of Myrcairnie, and that in favours of Johne Aytoune of that Ilk, and his airs male to be procreat of his bodie, quhilks failyeing to the neirest airs male and of tailyie contenit in his said infeftment, and that wnder certane provisiones, conditiones, reservationes, reversiones speciallie contenit in the said procuratorie of resignatioune maid be the said Maister Andro in favours of the said Johne Aytoune and his forsaidis, and pairtlie speciallie and pairtlie generallie contenit in the said infeftment upon the said resignatioun. Thairfor oure said soverane lord, with advyse and consent of the estates forsaidis, ratifies, approves and confirmes the forsaid contract of mariage abonewrittine, and speciallie that pairt thairof anent the chainging of the halding of the saidis lands of Logie, Cruvie, Brighous, Myrcairnie, mylne and mylne lands thairof, fra waird in blensche; and lykwayes ratifies and approves the haill infeftments abonewrittine, grantit be his majesties father of blissed memorie, and be his majestie himselff, with the haill priveledges, liberties, provisiones, conditiones, reservationes, reversiones contenit in the saidis infeftments and procuratories of resignatioune quhairupon the saidis infeftments hes followit, togider with all uthers infeftments, richts and secuirities maid to the said Maister Andro, his authors and predicessors of the forsaidis lands, baronie, teinds and uthers contenit in the said Maister Andro, his infeftments, in the haill heads, clauses, articles, conditiones, provisiones, reservationes, reversiones contenit in the saidis infeftments generallie and speciallie abonewrittine, and in the procuratories of resignatioun quhairupon the samyne proceidit; and declairs the samyne ratificatioun and confirmatione to be als valeide, guid and effectuall as if everie particular wer insert and ingrossit heirintill, with the quhilk, oure said soverane lord, with the estates forsaidis, hes dispensit and be thir presents dispenses for ever. And siclyk his majestie, with consent of the estates forsaidis, declaires the forsaidis infeftments, richts and secuirities generallie and speciallie abonewrittine to be guid, valeid and sufficient richts and secuirities to the said Maister Andro and his successors, in the saidis lands, baronie and uthers abonewrittine, and confirmit in the richts and secuirities abonementionat and als to be guid richts to Elizabeth Lundie, spous to the said Maister Andro, sua far as schoe is provydit to the saidis lands and baronie, for bruiking and joysing of the forsaidis lands, baronie, haill priveledges and liberties contenit in the richts and secuirities thairof, and conforme thairto. And oure said soverane lord renunces all actioune competent or that may be competent to his majestie and his successors for reducing, annulling or anywayes away taking of the forsaid contract of mariage, infeftments following thairupon or of the foirnamit haill infeftments, richts and secuirities speciallie and generallie abonewrittine. And oure said soverane lord, with advyse and consent of the estates forsaidis, ordaines ane new infeftment to be past and exped be the thesaurar principall, thesaurar deputte and remanent lords of exchecker of the forsaidis lands, baronie, priveledges and liberties thairof and uthers abonewrittine, frilie and gratis to the said Maister Andro and to his successors succeiding in the saidis lands, baronie and uthers abonewrittine.

  1. NAS, PA2/21, f.113r-114r.