[1633/6/128]¹

Act in favour of Sir Johne Dalmahoy of that Ilk, knicht

Oure soverane lord and estates of this present parliament ordaines ane ratificatioun to be maid thairin in favours of his hienes lovitt Sir Johne Dalmahoy of that Ilk, knicht, ane of his majesties maisterhousholds in Scotland, ratifiand, approvand and, for his hienes and his successors, perpetuallie confirmand the chartor maid and grantit be his majesties umquhile darrest father, James than king of Scottes, thaireftir king of Great Britane, France and Ireland, defendar of the faith, of worthie memorie, to umquhile Alexander Dalmahoy, than of that Ilk, father to the said Sir Johne Dalmahoy, his airs and assignais quhatsumever heretablie, of all and haill the lands and baronies of Dalmahoy and Over Libbertoun, with thair pertinents, lyand within the shirefdome of Edinburgh, upon the said umquhile Alexander Dalmahoy his awin resignatioun thairof, maid be him in the hands of his hienes said umquhile darrest father, his superior thairof, and new gift thairincontenit, maid and grantit be his hienes said umquhile darrest father of worthie memorie to the said umquhile Alexander Dalmahoy of that Ilk and his forsaidis of the saidis lands and baronies, with the castells, tours, fortalices, maner places, houses, biggings, mylnes, wodes, fischings, tennents, tennandries, service of frie tennents and uthers pertinents thairof, and unioun of the samyn in ane haill and frie baronie, to be callit the baronie of Dalmahoy in tyme coming, to be haldine of our soverane lord and his hienes successors in fie heretage and frie baronie for ever, for payment of the richts and services usit and wont, quhairby the waird, releiff and mariage ar taxt and liquidat to the particular soumes of money mentionat in the said chartor, as the samyn wnder the great seale of the dait the tent day of August, the yeir of God j^M v^C fourscoir auchteine yeirs at mair lenth beirs. As also the chartor maid and grantit be the said umquhile Alexander Dalmahoy to the said Sir Johne Dalmahoy, his sone, his airs male and assignais thairin contenit heretablie, of all and haill the saidis lands and baronie of Dalmahoy, comprehending the particular lands, baronies and uthers mentionat in the said chartor, to be haldin fra the said umquhile Alexander and his airs of our soverane lord and his hienes successors in taxt waird as the said umquhile Alexander held the samyne himselff, in maner specifiet in the said chartor of the dait the tent day of Junii, j^M vj^C and ellevine yeirs, with all precepts and seasings following upon the saidis tua chartors or any of thame. And als the chartor of confirmatioun grantit be his hienes said umquhile darrest father of worthie memorie, with advyse and consent of his hienes lords of secreit counsall of Scotland, his hienes commissioners and of his hienes thesaurar deputt for the tyme, wnder his hienes great seale, of the dait at Edinburgh, the aucht day of Februar, the yeir of God j^M vj^C and fourteine yeirs, confirming the said last chartor grantit be the said umquhile Alexander Dalmahoy to the said Sir Johne Dalmahoy, his sone, in maner forsaid in all and sundrie the heads, pointes, clauses, articles, circumstances and conditiones thairin contenit and efter the formes and tennors thairof in all pointes. And our said soverane lord and estates of parliament wills and grants and, for his hienes and his successors, decernes and ordaines that this present ratificatioun of the saidis chartors, precepts and seasings following thairupon and confirmatioun abonewrittine is, and sall be, of als great force, strenth and effect to the said Sir Johne Dalmahoy, his airs male, successors and assignais for bruiking of the saidis lands, baronie and uthers abonewrittine, with the pertinents thairin contenit, according thairto in tyme coming as if the samyne war all at lenth speciallie and particularlie heirin contenit, ratifiet and approvin; quhairanent, and with all uther defects and imperfectiones quhilks may be proponit againes the saidis richts or any of thame or this present ratificatioun of the samyne and validities thairof, our said soverane lord and estates of parliament hes dispensit and, be thir presents, dispenses for ever, provyding alwayes that this present ratificatioun is, nor sall, nowayes be extendit to the richt of patronage of the prebendaries of half Dalmahoy, half Haltoun, half Bonyngtoun and half Plat situat in the colledge kirk of Corstorphine, alternatis vicibus, disponit be the said chartor, bot the said patronage of the saidis prebendaries to be expreslie reservit and exceptit furth of this present ratificatioun, and that the said ratificatioun be farder extendit with all clauses necessar.