[1633/6/60]¹

Act of dissolutione of the abbacies of Holyrudhous and Newabbay

Oure soverane lord, of certane knawledge and propper motive, and for some speciall causes and reassounes moving his majestie, hes, with consent of the thrie estates and haill bodie of this present parliament, exceptit and reservit to his sacred majestie the lands, kirks, teinds and uthers eftir specifict fra the act of annexatione maid at this present parliament, and fra all uther former annexationes maid be his majesties predicessors of happie memorie, and als fra all uther actes and statuits maid in this present parliament to the effect his majestie may dispose thairupon at his gratious pleasure, viz: all and haill the hous, precinct and yairds of Holyrudhous, with the houses, tenements and yairds lyand contigue thairto haldin of old of the said abbacie, with the richt of superioritie of the kirklands of Dunrode, Quhytkirk and Fuirde, with the maner places, houses, yairdes, annexis and connexis of the samyne quhilk pertenit of befor to the said abbacie of Halyrudhous, and als the paroche kirks of Sanct Cudbert, Libbertoun, Tranent, Crawfuirdlindsay, Dalgarno, Wr', Kirkcudbricht, Kirkcormok, Balmagie, Dunrod, Keltoun, Barro and Sanct Marteines, with the haill teinds of the saidis kirkes perteining to the said abbacie of Holyrudhous, and siclyk the abbacie of Newabbay, with the haill lands, baronies, kirkes, teinds, patronages and uthers perteining to the said abbacie, alsweill temporalitie as spiritualitie, of the samyne. And to that effect his majestie and estates forsaids hes dissolvit and be thir presents dissolves the saidis kirk lands, superiorities and uthers forsaids perteining of old to the said abbacie of Holyrudhous, togider with the haill lands, baronies and uther temporall lands quhatsumever quhilk pertenit of old to the said abbacie of Newabbay fra quhatsumever acts of annexatione annexing the samyne to the crowne maid in this present parliament or quhatsumever parliaments preceiding be his majestie, or any of his majesties predicessors of happie memorie, to the effect his majestie may dispoise thairupon at his pleasure. And siclyk his majestie and estates hes dissolvit and be thir presents dissolves the forsaids kirks, teinds, patronages and uthers abonewrittin, togider with the houses, precinctes, monasteries and yairds of the saidis abbacies, fra the saidis benefices and abbacies of Holyrudhous and Newabbay respective, and hes supprest and suppreses the saidis abbacies and ather of thame with the memorie thairof for ever, to the effect his majestie may dispone thairupon at his gratious pleasure as said is, and willes and declairs that it sall be lawfull to his majestie to dispone upon the premises to quhatsumever persone and in quhat maner his majestie pleases, notwithstanding of quhatsumever generall and originall lawes maid in the contrair, and speciallie notwithstanding of the act of annexatione maid in anno 1587 or of any act of annexatione maid of befor or sensyne or at this present parliament; and als notwithstanding of the act of parliament maid be his majesties umquhile darrest father of eternall memorie, parliament 10, cap. 11, anent the living of benefices in the same estate as they ar fund be the titular, and of the act maid in his majesties said umquhile darrest fathers 12 parliament, cap. 119, forbidding erectione of kirklands and teinds in temporall lordschipes, and notwithstanding of quhatsumever actes and statuites of parliament maid sensyne or at this present parliament, quhilk his majestie and estates declares to be null and ineffectuall in sua far as may concerne the lands, kirkes, teinds, patronages and uthers forsaids reservit to his majestie be this present act.