Ratificatione to Schir Robert Melvill of his infeftment off Lethame and Monymaill etc.

Oure soverane lord and estaittis of this present parliament, haveing sene and considderit the infeftment maid and gevin be his majestie under his hienes gryit seale off the date the fourtene day off August, the yeir of God jM vjC and threttene yeiris to his hienes trustie and familiare counsellour Schir Robert Melvill of Brunteland, knight, and Dame Jeane Hammiltoune, ladye Ross, his spous, and thair aires mentionat thairin off the toun and landis of Lethame and mylne off Monymaill, with the propertie, superioritie and few fermes off the said toun, landis and mylne, with thair pertinentis, lyand within the schirefdome of Fyiff, and of the landis of Monkismyre, and als of the landis and mure callit Edinismure, with thair pertinentis, and lyikwayes of the maner place of Monymaill, housis, biggingis, yairdis and grenes of the same; as als of the teindschevis and utheris teyndis, fruittis and rentis of the kirk and parochin of Monymaill, personage and viccarage thairoff, and erecting and uneitting all and sindrie the foirsaidis landis, teyndis and utheris above expressit in ane frie temporall baronye callit the baronie of Monymaill; and being ryiplie advysit thairwith, his majestie and estaittis foirsaidis hes ratiefiet and approvin and, be the tennour heiroff, ratiefies and approvis the foirsaid infeftment, dispositioun and erectioun thairin contenit in the haill heiddis, articles, clauses, conditiounes and circumstances quhatsumevir specifit and mentionat in the same and haill contentis thairoff; and decernis and ordanis the generalitie heiroff to be als guid, valide, effectuall and sufficient in the selff as gif the said infeftment wer at lenthe worde be worde insert heirin, dispensand thairanent be thir presentis; and decernis, declairis and ordanis the said Schir Robert and his said spous and thair aires to have full rycht to the saidis landis and baronie, milnes, maner places, orcheartis, yairdis, mures, teyndis and utheris, thair priviledges and pertinentis, to be bruikit and josit be thame efter the forme and tennour of the said infeftment in all poyntis.

  1. NAS, PA2/20, f.70v.