[1621/6/84]¹

Act in favoures of Schir Richert Cokburne, lord previe seill

Oure soverane lord and estaittis of parliament ratiefies and apprevis the chartour and infeftment grantit be his majestie, with avise of his hienes collectour generall and thesaurer of new augmentatiounes for the tyme, to his majesties trustie and weilbelovit counsellour Schir Richert Cokburne of Clerkingtoun, knicht, keiper of his hienes previe seale, and his airis maill specifit thairin, of all and haill the landis off Clerkingtoun, with the maner places, housis, biggingis, yairdis, orcheartis, coirnemilnes and walk milnes thairoff and all thair pertinentis lyand within the parochin and constabularie of Hadingtoune and schirefdome of Edinburgh, to be haldin off his majestie and his successouris in frie blenche for payment of ane pennie upoun the ground of the saidis landis at the feist of Witsonday yeirlie in name of blenche ferme, gif the samene beis askit allanerlie, nochtwithstanding that the saidis landis wer haldin in fewferme of before, daittit at Roystoun, the nyntene day off Januare, the yeir of God j^M vj^C and ten yeiris, with the precept and instrument of seasing following thairupoune, togidder with the act of his majesties parliament haldin at Edinburgh, the tuentie third day of October, the yeir of God j^M vj^C and tuelff yeiris, quhairby his hienes and estaittis ratifiet and approvit the said chartour and infeftment, precept and instrument of seasing following thairupoun, and decernit the said act to be ane sufficient dissolutione for securitie to the said Schir Richert and his foirsaidis of the landis and utheris abovewrittin, to be haldin blensche of his majestie in all tyme cuming in all and sindrie heiddis, articles, clauses and circumstances thairoff; and willis and declairis that this present generall ratificatioune is and salbe als sufficient as giff the saidis chartour, infeftment, precept and instrument of seasing and act wer at lenth worde be worde insert heirintill. And farder, oure said soverane lord and estaittis foisaidis, for the causes specifit in the said act, hes off new dissolvit and, be thir presentis, dissolvis the saidis landis off Clerkingtoune, with the maner places, housis, biggingis, yairdis, orcheartis, cornemilnes and walkmylnes thairoff and all thair partinentis, and als hes dissolvit and, be thir presentis, dissolvis the landis of Spittelrig with the pertinentis fra his majesties croune and fra all actis of annexatioun quhairby the samen ar and have bene annexit to his majesties croun at ony tyme heirtofoir; and specialie fra the act of parliament maid in the moneth of September, the yeir of God j^M v^C thriescore ellevin yeiris, anent the landis, roumes or possessiounes haldin of freiris or nunnes and fra the generall annexatioun of kirklandis maid in the monethe of Julii, the yeir of God j^M v^C fourscore sevin yeiris, to the effect the samene may be disponit be his majestie to the said Schir Richerd, his aires maill and assignais, to be haldin of his hienes and his successoures in frie blensche for payment of ane pennye upoun the ground of the saidis landis at the feist off Witsonday yeirlie in name of blensche ferme, gif the samen beis askit allanerlie, nochtwithstanding that the samene landis wer haldin in fewferme of before; and ordanis chartouris and infeftmentis to be past heirupoune to the said Schir Richard and his foirsaidis in sick dew and competent forme as effeiris.