[1617/5/71]¹

Act in favoures of Jhonne Murray anent the erectioun of Haliewode

Oure soverane lord and estaittis of this present parliament, remembering the guid, trew, thankfull and faithfull service done be his hienes trustie and weilbelovit familiar servitour, Jhonne Murray of Lochmaben, not onlie in his hienes privat and particular service fra his majesties infancye to his hienes preferment to the kingdome of England, France and Ireland, and continewallie sensyne in attending upoun his hienes most sacred persoun at all tymes and occasiounes, bot also in the publict effairis of this realme of Scotland concredite to the said Jhonne gryitumlie tending to the commoun weill, peace and tranquillitie of the samen and liegis thairoff, quhilk service is sufficientlie knawin, verifiet and tryed be his majestie and haill estaittis off this present parliament to have bene verie proffitable to his majestie, this realme of Scotland and liegis thairoff, thairfore oure said soverane lord and estaittis of this present parliament hes dissolvit, lyik as his majestie and estatis foirsaidis dissolvis all and sindrie landis, baronies, castellis, toures, fortalices, maner places, milnes, multeris, woddis, fischeingis, annuelrentis, caynes, customes, casualities, emolimentis and dewties quhatsumevir of the temporalitie of the abbacie of Haliewode fra the act of annexatioun made in the parliament haldin at Edinburgh, the tuentye nynt day off Julii, the yeir of God j^M v^C fourscore sevin yeiris, annexand the temporalitie of all benefices within this realme to the patrimonie of his hienes croun, togidder with the paroche kirkis of Haliewode, Dunscore, Penpont, Tynrone and Kirkonell, lyand within the schirefdome of Dumfreis, personages and viccarages thairoff, with all and sindrie teindis, fruittis, rentis, emolimentis and dewties pertening and belonging thairto fra the said abbacie of Halywode and benefice thairoff, quhairunto the samen pertenis and pertenit of auld as ane pairt of the patrimonye thairoff, to the effect that his majestie may gif, grant and dispone to the said Jhonne Murray of Lochmaben, his airis and assigneyis heretablie all and sindrie the particular landis, baronyes, castellis, toures, fortalices, maner places, milnes, multeris, woddis, fischeingis, annuelrentis, kaynes, customes, casualities, emolimentis and dewties quhatsumevir pertening and belonging to the temporalitie off the said abbacye off Halywode; togidder with all and sindrie the teindschevis and utheris teindis, fructis, rentis, emolimentis and dewties quhatsumevir off the paroche kirkis and parochines respective above specifit, personages and viccarages thairoff, and with all right, tytill, entres and clame of right quhilk his majestie, his hienes predicessoures or successoures had, hes or onywayes may have or clame thairto, or ony pairt thairoff, be ony maner of way in tyme cuming; and als to the effect that the samen may be unitite, erectit, creat² and incorporat in ane haill and frie baronie to be callit now, and in all tyme cuming, the baronye off Haliewode; and siclyik to the effect that the said abbacye or monasterie off Haliewode maye be supprest and extinguischit perpetuallie in all tyme cuming, and that na persoun, nor persounes, be prowydit thairto in na tyme heirefter, renunceand and dischargeand all right and tytill quhilkis his majestie or his successoures had, hes or may have or pretend in and to the thriddis off the fructis off the said abbacie be quhatsumevir rightis, actis off parliament or lawis off this realme; dischargeand his hienes collectoures present and to cum off all uplifting of the saidis thriddis simpliciter and for evir, revoikand, dischargeand and annulland all pensiounes disponit furth of the thriddis of the said abbacye in anye tyme bigane, and decernand the samen to be null in all tyme cuming; and willing and granting that na monkis portiounes be upliftit furth of the samyne, quhilkis his majestie, for his hienes and his sucessoures, renunces and dischairgis simpliciter and for evir; and ordaning the place of Haliewode within the precine thairoff to be the principall messuage off the said baronie for taking of seasing thairat in all tyme heirefter, and that the samen seasing salbe sufficient for all and sindrie landis, baronyes, mylnes, multouris, woddis, fischeingis, castellis, toures, fortalices, maner place, anuelrentis and utheris foirsaidis quhilkis pertenit to the temporalitie of the said abbacye of Haliewode, togidder with all and sindrie the teyndschevis and utheris teyndis, fructis, rentis, emolimentis and dewties quhairsumevir off the paroche kirkis and parochines respective above specifit, personages and viccarages thairoff, and for everie pairt of the samen without ony uther speciall or particular seasing to be takin at onye uther pairt thairoff, nochtwithstanding that they ly not contigue togidder, to be haldin of oure said soverane lord and his successouris in frie blenche, frie heretage and frie baronye for evir, payand thairfore yearlie the said Jhonne Murraye, his airis and assigneyis foirsaidis to oure said soverane lord and his successoures the soume of tuentye poundis usuall money off the realme of Scotland at the feast of Witsonday in name of blenche ferme allanerlie; and als the said Jhone Murray and his foirsaidis payand to the ministeris present and to cum serveing the cure at the kirkis respective abovementionat the yearlie dewties and stependis to be modifiet be the commissionaris conforme to the commissioun maid and grantit be his majestie and estaittis to that effecte; and als the said Jhonne Murray and his foirsaidis biggand, beitand, repairand and uphaldand the saidis kirkis respective and queiris thairoff, and furnessing the elimentis off breade and wyne to the celebratioun of the communione within the saidis kirkis, and payand all taxatiounes and impositiounes imposit, or to be imposit, upoun the samen kirkis, teyndis, fructis and rentis thairoff, and relevand the saidis ministris, present and to cum, of the samen in all tyme cuming.