[1617/5/69]¹

Ratificatioun to Schir Patrik Murray

Oure soverane lord and estaittis of this present parliament ratefeis and apprevis the lettiris off gift and pensioun maid and grantit be his majestye under his hienes previe seall, with advyse and consent off his hienes thesaurer, comptroller, collectour and thesaurer off his hienes new augmentatiounes off the kingdome of Scotland, to his majesties lovit Schir Patrik Murray off Langschaw, knight, eldest lauchfull sone and appeirand air to his hienes trustie and weilbelovit counsellor, Schir Gedeone Murray of Elibank, knight, his hienes thesaurer depute, in pensione yeirlie dureing all the dayis of his lyfetyme off the soume of ane hundreth pundis sterling money yeirlie to be upliftit be the said Schir Patrik dureing all the dayis of his lyvetyme off the reddiest of his hienes proper rentis and casualityes of the said kingdome off Scotland frome his hienes thesaureris, comptrollaris and collectoures of the said kingdome of Scotland, present and to cum, at tua termes in the yeir, Witsonday and Mertimes in winter, be equall portiounes, off the date at Tybollis, the tuentie ane day of September, the yeir of God j^M vj^C and fyiftene yearis, in all and sindrie poyntis, passes, heidis, articles, clauses, conditiounes and circumstances quhatsumevir thairin conteanit efter the forme and tennour thairoff, with all that hes followit or maye thairupoun. Lyikas his majestie and estaittis foirsaidis willis, grantis, decernis and declairis that this present ratificatioun of the lettres of gift and pensioun abovewrittin is and salbe als valide, effectuall and sufficient in all respectis as gif the samen lettre of gift and pensione wer at lenth and word be word insert and ingrossit heirintill, nochtwithstanding the not inserting thairoff, quhairanent his majestye and estaittis foirsaidis have dispensit and be the tennour heiroff dispenses for evir. And farder oure said soverane lord and estaittis foirsaidis willis and declairis that the said Schir Patrik Murray of Langschaw, knicht, sall peciablie brooke, jois and posses the yeirlie pensioune abovewrittin during the said space of his lyiftyme, nochtwithstanding quhatsumevir act of parliament quhairby giftis and pensiounes disponit be his majestie furth of his hienes propertie annexit, or utheris his hienes casualities, ar declarit null and ineffectuall, quhilkis sall mak na dirogatioun to the lettres of gift and pensioun abovewrittin. Lyik as his majestie and estaittis foirsaidis willis and declares that thir presentis salbe ane effectuall and lauchfull dissolutioun to the effect abovespecifit and als to this effect: that his majestie may of new giff and dispone the yeirlie pensioun abovewrittin to the said Schir Patrik Murray off Langschaw, knicht, dureing all the dayes of his lyiftyme in maner abovementionat.