[1617/5/65]¹

Ratification to Schir Gedeoun Murray, Williame and Walter Murrayis, his sones

Oure soverane lord and estaittis of this present parliament ratifies and approvis the lettres of gift and pensioun maid and grantit be his majestie under his hienes previe seall, with advyse and consent of his hienes right traist cousing and counsellor Johne, erle of Mar, lord Erskyne and Garioche etc., his hienes thesaurer, comptroller, collectour and thesaurer of his hienes new augmentatiounes of the kingdome off Scotland, and als with advyse and consent of the remanent lordis of his majesties secreit counsell of the same kingdome, his hienes commissoneris, to his majesties trustie and weilbelovit counsellor Schir Gedeoun Murraye of Elibank, knicht, his hienes thesaurer depute of the said kingdome of Scotland, in lyverent during all the dayis of his lyiftyme, and efter his deceis to Williame and Walter Murrayes, his lauchfull sounes equalie betuix thame dureing all the dayis of thair lyiftymes, and to the langest levar of thame thrie, off ane yeirlie pensioun of the soume of tua thousand and four hundreth pundis usuall money off the said kingdome of Scotland yeirlie to be upliftit be the said Schir Gedeoun Murray during his lyiftyme and efter his deceis be the saidis Williame and Walter Murrayes, his sones, equalie betuix thame dureing all the dayis of thair lyvetymes, and be the langest levar of thame thrie, furth of the reddiest of his hienes proper rentis and casualities of the said kingdome of Scotland fra his hienes thesaureris, comptrollaris and collectoures present and to cum at tua termes in the yeir, Witsonday and Mertimes in winter, be equall portiones, off the date at Quhyithall, the tuentye fourt day off December, the yeir of God j^M vj^C and sextene yeiris. And siclyik, oure soverane lord and estaittis foirsaidis ratefies and approvis the lettres of gift maid and grantit be his majestie under his hienes previe seall, with advyis and consent of the lordis of his hienes previe counsell and chekquer and of the lordis commissionaris of his hienes rentis of the said kingdome, to the said Schir Gedeoun Murray of Elibank, knicht, for all the dayes off his lyiftyme off the libertie and fredome to bring in yeirlie within the said kingdome of Scotland be him selff, his freindis, factoures and servandis in his name, threttie tunes of wyne frie but payment of ony kynd of impoist, custome or uther dewtie to be payit be him or his foirsaidis thairfore, off the date at New Market, the first day off Februare, the yeir of God j^M vj^C and sextene yeiris. And lyikwayis oure said soverane lord and estaittis foirsaidis ratefeis and apprevis the letteris of gift maid and grantit be his majestye under his hienes previe seall, with advyise and consent of the said Jhonne, erle of Mar, thesaurer, comptroller, collectour and thesaurer of his hienes new augmentatiounes off the said kingdome of Scotland, and als with advyis and consent off the remanent lordis of his hienes previe counsell of the samen kingdome, his majesties commissioneris foirsaidis, to the said Schir Gedeoun Murray of Elibank, knight, in yearlye pensioun during all the dayes of his lyiftyme, off all and sindrie the fewfermes, fewmaillis, augmentatioun, kaynes, custumes and dewties addebtit to his majestie furth of all and haill the toun and landis and manse of Ballincreif and mylne thairoff, with the pertinentis, lyand within the constabularie of Hadingtoun and schirrefdome off Edinburgh, pertening heretablie to Schir Archibald Murray of Dernehall, knight, for the tyme, and now to the said Schir Gedeoun Murray, extending to the particular quantities following, to wit: thrie chalderis, tuelff bollis beir, tuentye nyne capones, ane quarter capone, ane hundereth fyve scoir sex pultrie, halff pultrie, thrie hundereth pair of dowes, ane thousand chirries, and the soume of fourtie pundis, ten schillingis money foirsaid with all uther dewties quhatsumevir addettit to his majestie furth of the landis and mylne abovewrittin, with the pertinentis, pertening to the said Schir Archbald Murraye for the tyme and now to the said Schir Gedeoun Murray as said is, off the date at Quhitehall, the tuentie fourt day off December, the yeir of God j^M vj^C and sextene yeiris foirsaid, in all and sindrie poyntis, passis, heiddis, articles, clauses, conditiones and circumstances quhatsumevir conteanit in the lettres of gift and pensioun respective abovespecifit efter the formes and tennoures thairoff, with all that hes followit or may follow thairupoune. Lyik as his majestie and estaittis foirsaidis willes, grantis, decernis and declairis that this present ratificatioun off the letteris of gift and pensioun respective abovementionat is and salbe als valide, effectuall and sufficient in all respectis as giff the samen lettres of gift and pensioun respective abovespecifit war at lenth and worde be worde insert and ingrost in this present act, nochtwithstanding the not inserting thairoff; quhairanent his majestie and estaittis foirsaidis have dispensit and be thir presentis dispenses for evir. And farder oure said soverane lord and estaittis foirsaidis willis and declairis that the said Schir Gedeoun Murray during his lyvetyme, and, efter his deceis, the saidis Williame and Walter Murrayis, his sounes, sall peciablie bruke, jois and possess the maillis, fermes, dewties, sowmes of money and utheris abovespecifit, togidder with the foirsaid libertie and fredome to inbring within this realme of Scotland off the saidis threttie tunnes wyne, custome frie as said is, during thair lyvetymes respective in maner specifit in the lettres off gift and pensioun respective above specifit grantit to thame thairanent; and that nochwithstanding of quhatsumevir actis of annexatioun of landis, maillis and customes to the croun or of quhatsumevir act of parliament quhairby giftis and pensiounes disponit be his majestie furth of his hienes propertie annexit or utheris his hienes casualities ar declairit null and ineffectuall, quhilkis sall mak na dirogatioun to the lettres of gift and pensioun respective abovementionat. Lyikas his majestie and estaittis foirsaidis willis and declairis that thir presentis salbe ane effectuall and lauchfull dissolutioun to the effect abovewrittin and all to this effect: that his majestie may of new geve and dispone the saidis yearlie pensiounes, fewfermes and utheris abovespeit to the said Schir Gedeone Murraye and his saidis sones in maner and during the space respective above designit.