[1617/5/60]¹

Act in favoures of the Lord Sanquhare

Oure soverane lord and estaittis of parliament, haveing at lenth sene and considderit the submissioun maid to his sacred majestie be Williame Crichtoun, sone naturall to umquhile Robert, lord Sanquhair, and his curatoures, and Williame Crichtoun of the Hill, on the ane pairt, and Williame Crichtoun of Ryhill, now styillit Williame, lord Crichtoun of Sanquhare, James Crichtoun of Carco, with consent of his curatouris, and be Maister Alexander Seytoun of Gargunno, on the uther pairt, quhairby all the saidis pairties referrit thame to his majestie anent all rycht, tytill and clame of right quhilk they or ony of thame had or micht pretend to the lordschip and leving of Sanquhair, or to the guidis, geir, takis or teindis and to utheris rightis pertening to the said umquhile Robert, lord Sanquhar; quhilk submissioun is of the daite at Edinburgh, Cannowgate, Sanctandros, Drumlangrig, Sanquhar, Hempisfeild and Mylne of Entirkin respective, the tuentie aucht and penult dayis of Julii, the first, fyift and fourtent of August and fyiftene day of September, the yeir of God j^M vj^C and threttene yeiris, togidder with the decreit arbitrall gevin and pronuncit be his majestie, quhairby his majestie hes for the causes at lenthe specifit in the said decreit found the reasounes off reduction proponit and alledgit for the pairt off the said Williame, now lord Sanquhare, James Crichtoun of Carco and Maister Alexander Seytoun for reduceing and annulling of the pretendit ordoure of redemptioun useit be the said umquhile Robert, lord Sanquhar, in the monethe of August, the yeir of God j^M v^C fourescoir and nyntene yeiris, for redemptioun of the said lordschip and leving of Sanquhar fra the said James Crichtoun of Carco and of the declaratoure of redemptioun following thairupone, to be relevant and provin; and thairfore hes decernit the said ordoure of redemptioun with declaratoure thairoff, togidder with all infeftmentis following thairupoun maid to the said umquhile Robert, lord Sanquhare, or maid be him or upoun his resignatioun to quhatsumevir persoun or persounes of the said lordschip and leving of Sanquhare or anye pairt thairoff since the monethe of August, the yeir of God j^M v^C fourescore nyntene yeiris; and namelie the infeftment, precept and instrument of seasing grantit be his majestie to David Crichtoun of Lugtoun upoun the resignatioun of the said umquhile Robert, lord Sanquhar, proceiding, with the procutorie and instrument of resignatioun quhairupoun the samen dependit, togidder with the pretendit procutorie and instrument of resignatione of the said lordschip and leving maid be the said David Crichtoun of Lugtoun in his majesties handis to and in favoures of the said umquhile Robert, lord Sanquhare and for new infeftment to be gevin to him and to the airis maill lauchfullie to be gottin of his bodie, quhilkis failyeing, to the said Williame Crichtoun, his sone naturall, with his majesties infeftment, precept and instrument of seasing grantit conforme thairto and new infeftment thairin conteanit, to be null, invalide and ineffectuall in thame selffis with all that hes followit or may follow thairupoun, as in the said decreit arbitrall conteaning dyvers utheris heidis, articles and conditiounes of the daite at Theobaldis, the secund day of Maii, the yeir of God j^M vj^C and fourtene yearis at mair lenth is conteanit. Quhilk decreit, efter the pronunceing thairoff be his majestie, togidder with the said submissioun, quhilk is the warrand of the samyne, wes not onlie registrat be his majesties expres warrand direct to his majesties advocate to that effect and be consent of procutoures compeirand for the saidis haill pairties submittaris in the bookis of his majestyes counsell upoun the auchtene day off Maii, the yeir of God j^M vj^C and fouretene yeiris, bot also be expres warrand gevin be his majestie to Alexander, earle of Dumfermeling, his majesties chancelar, the extract of the saidis lordis decreit of registeratioun wes ordanit to be gevin furth and extractit to the saidis pairties under his majesties gryit seall. And his majestye, efter the reiding and consideratioun of the said submissioun and decreit, haveing at gryit lenth exponit in presence of the haill thrie estaittis the maist just, ressonable and wechtye causes and argumentis foundit baith upoun law, equitie and conscience, quhairby his majestie wes moved to decyid and determine in favoures of the said Williame, lord Sanquhare and his saidis colligis in maner conteaned in the said decreit, quhilkis the saidis thrie estaittis all in ane voce acknawledgit to be most just, lauchfull and equitabill, thairfore his majestie and thrie estaittis hes ratefiet and approvin and be thir presentis ratefies and apprevis the said decreit arbitrall togidder with the said decreit of the lordis of counsall interponit thairto, to the quhilk his majestyes gryit seall is ordanit to be appendit for gryiter solemnitie as said is, in the haill heiddis, articles and clauses thairoff, quhilkis his majestie and estaittis haldis as heirin expressed, and findis and declairis the said decreit to be maist ordourelie, justlie and lauchfullie gevin and to be aggreable to the foirsaid submissioun in all poyntes.