The Records of the Parliaments of Scotland to 1707, K.M. Brown et al eds (St Andrews, 2007-2024), date accessed: 29 March 2024
[1617/5/54]1
Ratificatioune to the Erle of Argyill
Oure soverane lord and estaittis of parliament, haveing sene and considderit the infeftment grantit be his majestie to his hienes traist cousing Archbald, earle of Argyill, his airis maill and assignais of all and haill the landis and lordschip of Kintyre, comprehending the Yle of Jura and utheris particular landis, yles, fischeingis and utheris thairin mentionat, all unite and annexit in ane lordschip callit the lordschip of Kintyre, to be haldin of his majestie and his hienes successoures in feuferme for payment of the fewmaillis, feufermes, caynis, customes and utheris dewties thairin expressit, as in the said infeftment off the date the penult day of Maii jM vjC and sevin yeiris at mair lenth is conteanit; and als haveand sene and considderit the act of the lordis of his majesties exchequer off the date the [...] day of [...] yeiris, quhairby the saidis lordis, efter dew and mature consideratioun, hes liquidat and sett doun the pryces of the malt, meill, cheis and utheris customes mentionat in the said infeftment, to be payit to his majestie and his successoures in all tyme cuming for the prices of the saidis victuellis and customes, viz: the soume of threttie ane2 schillingis for the pryce of ilk boll of malt, the soume of sevin schillingis, fourpennis for the pryce of ilk stane of meill, the soume of ellevin schillings for the pryce of ilk stane of cheis, the soume of sevin pundis, sex schillingis, aucht pennies for the pryce of ilk mart, the soume of sevin pundis, sex schillingis, aucht pennies for the pryce of ilk kow, and the soume of ellevin schillingis for the pryce of ilk wodder, according to the quhilk thair is a signatur suprascryvit be his majesties hand ordaning ane new infeftment to pas of the saidis landis and lordschip of Kintyre and Yle of Jura with the haill particular landis and iles and utheris of before annexit to the said lordschip of Kintyre to the said Archbald, erle of Argyill and to James Campbell, his eldest lauchfull sone, procreat betuix him and Dame Anna Carnewallis, countes of Argyill, his spous, to be haldin of his majestie and his successouris in fewferme for payment of the feuferme dewties conteaned in the foirsaid first infeftment or of the pryces of the said victuell and custumes conteanit in the said act and ordinance of chekquer in the optioun of the said erle, his said sone and thair foirsaidis. And his majestie and estaittis of parliament, perfyitlie understanding the gryit chairgis, paynis and travellis sustenit be the said erle, his kin and freyndis be his majestie expres command and warrand in the pacifeing of the saidis yles of Kintyre and Jura, and reduceing of the samen and the inhabitantis thairoff to his majesties obedience, and that the pryces of the foirsaid victuell and custumes is raitit and extendit be the lordis of his majesties exchekquer to the saidis pryces efter dew tryell and consideratioun of the worth and avale of the samen; thairfore his majestie and estaittis of parliament hes dissolvit and be thir presentis dissolvis the foirsaidis landis and lordschip of Kintyre, comprehending the saidis yles of Jura and utheiris landes, yles and fischeingis contenit in the said infeftment and unite and annexit to the said lordschip of Kintyre of the date abovespecifit, fra his majesties croun, and fra all actis of annexatioun be the quhilk the samen or onie pairt thairof wes annexit to his hienes croun in onie tyme bigane, to the effect the samen may be giftit and disponit be oure soverane lord to the said Archbald, erle off Argyill and to the said James Campbell, his sone, thair airis maill and assigneyis, or to ather of thame upoun the resignatioun of the said earle, with ane gift de novo damus in maist ample forme, with all clauses neidfull, to be haldin of his majestie and his hienes successoures in fewferme for payment of the fewmaillis and fewfermes of money, victuell, kaynes and customes mentionat and contenit in the said infeftment, and upoun the provisiounes and restrictiounes thairin contenit, or of the pryces of the said victuell and customes to the quhilk the same is liquidat be the said act of chekquer in the optioun of the said Earle of Argyill and his said sone and thair foirsaidis, but prejudice alwayes to the said earle, his said sone and thair foirsaidis of the infeftment of tuentie chalder victuell of the saidis feufermes disponit to the said Earle of Ergyill be his majestie, conforme to ane speciall act of parliament maid be his majestie and estaittis of parliament in the moneth of August jM vjC and sevin yeiris, and infeftmentis following thairupoun; quhilkis tuenty chalderis victuell his majestie and estaittis decernis and ordanis to be deducit and defalkit of the saidis feuferme dewties. It is alwayes prowydit be oure soverane lord, with the consent of the estaittis of this present parliament, and it is declared that this said act of dissolutioun maid of the landis foirsaidis to the end ane new infeftment thairof may be gevin to the said Archibald, earle of Argyill and his said sone, and ather of thame and thair foirsaidis, is allanerlie with this qualitie and conditione: that the infeftment and seasing following thairupoun and haill landis thairin conteanit salbe subject, burdenit and affected with quhatsumevir dettis and soumes of monie awand be the said earle to his honorable freindis, they ar to say: Coline Campbell of Lundye, Schir Johnne Campbell of Cadell, knicht, Schir Jhonne Scringeour of Dudhope, knight, Schir James Campbell of Laweris, Coline and Archbald Campbellis, his brethir, and in payment of all soumes quhairin anye of the foirsaidis freyndis ar bound as cautioneris for the said earle. And that gif the saidis landis salbe disponit be his majestie to the said James, it salbe lauchfull to the saidis freyndis to poynd and appryse the saidis landis for the saidis dettis and soumes of money in lyik maner as thai might have done incace the saidis landis hade bene disponit to the said Earle of Argyill him selff. Lyik as the said James salhave the said infeftment and accept the same with the foirsaid burding and this conditioun and no utherwayis, reservand the landis of Scadell and all utheris landis pertening to the Merques of Hammiltoun within Kintyre haldin of the Bischope of Ergyill and kirk. And his majestie and estaittis ordanis infeftmentis to be exped heirupoun in dew forme in favoures of the said earle and his said sone, or ather off thame and thair foirsaidis, at the plesure of the said earle.
- NAS, PA2/19, f.24v-25r.
- Written superscript.