[1617/5/46]¹

Act anent the chapter of the Bischop off the Yles

Oure soverane lord, understanding that the haill fundatioun and ancient evidentis and recordis of the bischoprik of the Yles hes bene this lang tyme bigane obscurit and supprest that na memorie remaynis quhat or how manye dignities wes in that sea and quha wes the memberis off that chaptoure, and his hienes being maist willing to restore the said sea and bischoprick of the Yles to the ancient integritie and to prowyid and establische the same with all memberis necesar, thairfoire his majestie, with advyse and consent of his hienes estaittis of this present parliament, statutes and ordanis that in all tyme cuming the persone of Sorbie in Terie, quha is also vicar of Icolmekill, salbe deane; the persone of Rothesay salbe subdene; the persone of Kilmorie in Arrane ane prebendar; the persone of Cumrie ane prebendar; the persoun of Killenew in Ylay ane prebendar; and the persone of Killean in Torsay in Mull ane prebendar; and they all to be convent, counsall and cheptoure of the said bischoprik in all tyme cuming. And efter the deceis or removeing of ony ane or mae of thame frome thair place, the intrant succeding to the said chairge or place to succeid also in that roume of the chaptoure or convent to the effect they may concur with the present bischop of the said bischoprik and his successoures for doing of all sick thingis as ar requisit for the glorie of God, the weill of the kirk within these boundis and his majesties honorable obedience.