[1607/3/45]¹

Ratificatioun in favouris of the Laird of Balcarres

34. Oure soverane lord and estaittis of this present parliament, calling to rememberance the gude, trew and thankfull service done to his majestie and in the publict affairis of the realme of Scotland be his hienes umquhile faithfull and familiar counsallour Maister Johne Lyndsay of Balcarres, sumtyme his majesteis secretar and ane of the senatouris of his hienes college of justice, to the proffeitt and commoditie of his majesteis estait, royell and commoun weill of his said realme; thairfoir, and for uther gude causes and considerationis moveing his majestie and estaitis foirsaidis heirto, they have ratifeit, approvin and confirmit and, be the tennoure heirof, ratifeis, apprevis and confirmis ane chartour and infeftment (quhilk the saidis estaitis hes now sene, red and considerit and perfytlie understand), maid and grantit be oure said soverane lord undir his great seall of the date at Halyrudhous, the fyft day of Februar, the yeir of God j^M vj^C and thrie yeiris, to David Lyndsay, now of Balcarres, eldest lauchfull sone now on lyfe and air to the said umquhile Maister Johne, and to the said Davidis narrest and lauchfull airis maill quhatsumevir beirand and for to beir the armes and surname of Lyndsay, off all and sindrie the landis of Balneill, Eister Pitcorthie, Wester Pitcorthie and Lichtownislandis of Innerdovet, all and haill the landis and myln of Balcarres, and haill the landis of Balmakine and landis of Nather Cummerlandis, with thair maner places, fortalices, houses, biggingis, yairdis, coilis, coilheuchis, pasturages, commounteis, liberteis, pertinentis and utheris specefeit in the said chartour, off all and sindrie the landis and myln abonewrittin, togidder with the advocatioun, donatioun and richt of patronage of the parochkirk of Kilconquhair, personage and vicarage of the samyn, with the privileges and liberteis thairof, all lyand within the schirefdome of Fyf, quhilkis be vertue of the said chartour wer unitit, annexat and incorporat in ane haill and frie baronie to the said David Lyndsay and his foirsaidis, callit and to be callit in all tymes cummyng the baronie of Balcarres, to be haldin of oure said soverane lord and his successouris in fre heretage, fewferme and blenchferme respective, and in frie baronie for evir, as the said chartor maid and grantit thairupoun contening sindrie utheris heidis and articlis mair fullelie proportis, togidder with the procuratoreis and instrumentis of resgnatioun and dimissioun thairin mentionat quhairupoun the said chartour procedit, and als the instrumentis of seasing following thairupon gevin and grantit to the said David Lyndsay off all and sindrie the saidis landis, baronie and utheris abone rehersit, in all and sindrie thair heidis, clauses, articlis and contentis of the samyn, eftir the formes and tennouris thairof in all pointis, to the effect the said David Lyndsay and his airis maill foirsaidis may peciablie bruik, jois, possede, sett, use and dispone at thair plesure all and sindrie the saidis landis, baronie, myln and utheris quhatsumevir abonespecefeit comprehendit thairintill; togidder with the foirsaid advocatioun, donatioun and richt of patronage of the foirnameit paroch kirk of Kilconquhair, personage and vicarage thairof, with all and sindrie privileges and comoditeis appertening thairto, as thair awin propir landis, rentis and heretage in all tyme cummyng, in maner contenit in the said chartour and infeftment maid thairupoun. And to that effect oure said soverane lord, for his majestie and his saidis successouris and the estaitis foirsaidis, with ane consent, hes dissolvit and disunitit and, be the tennoure of this present act of parliament, dissolvis and disunitis the foirnamit paroch kirk of Kilconquhair, personage and vicarage of the samyn, with all and sindrie teyndscheves, utheris teyndis, manses, gleibis, rentis, proffeittis, emolumentis and utheris quhatsumevir thairof pertenig thairto of befoir, with the fundatioun of the samin, frome the abbacie and priorie of North Beruick and patrimonie thairof in all tymes cummig and, be the tennoure of this present act, erectis in ane rectorie and personage be the self and to be callit in all tyme cumming the personage of Kilconquhair; and the saidis advocatioun, donatioun and richt of patronage thairof sall appertene heretablie to the said David Lyndsay and his foirsaidis as unitit, annexat and incorporat in and to the said baronie of Balcarres in all tymes cumming; and declaris that this present ratificatioun and confirmatioun of the foirsaid chartour and infeftment sall be als valide and effectuall in all respectist to the said David Lyndsay and his foirsaidis as gif the samin chartour wer word be word at lenth insert heirintill, but prejudice alwayes to the Archibischop of Sanctandrous and his successouris, thair richtis of the superioritie of the landis of Wester Pitcorthie and Balmakine haldin of thame, quhairunto this present ratificatioun sall nawayes be extendit nor prejudiciall.