[1607/3/43]¹

Erectioun of Kelso in favouris of Lord Roxburgh

32. Oure soverane lord and estaittis of this present parliament, calling to remembrance the gude, trew and memorable service done to his majestie and lieges be his trest cousing Robert, lord Roxburgh and his predecessouris in all tymes and at all necessar occasionis bigane, alsweill in tyme of peax as in tyme of weir, and als the great cair, earnest zeall and redines of the said lord to undirly all gude offices and services tending to his hienes honour, weill and proffeitt of the realme, not onlie in the dischargeing of the office of the wardanrie in the Middill Marches of this realme befoir the happie unioun of baith the realmes in his hienes persone, bot lykwayes in the executioun of divers utheris commissionis for quieting of the lait bordouris and repressing of all insolencie and disordour within the samin at all occasionis bigane upoun his great charges and expenses, in the quhilkis gude offices the said Robert, lord of Roxburgh hes dischargeit his duetie maist faithfullie, as is notourlie knawin to his majestie and estaittis of this present parliament, quhairupoun sufficient tryell hes bene tane befoir thame; and being of gude, deliberat mynd that the saidis gude offices and services done be the said Robert, lord of Roxburgh, with the great charges sustenit be him sall be in sum measure recompensit, and finding na better meane for the present than that the haill temporall landis and rentis, quhilkis pertenit of befoir to the abbacie of Kelso and cell of Lesmahago, quhilk is ane pendicle of the said abbacie, with the abbay places, closteris, yairdis, orchardis and all aismentis and commoditeis within the precinctis of the samin, with all and haill that pert of the towne landis and manis of Sproustoun, mylnis, mylnlandis, multuris, suckin and haill pairtis and pendiclis thairof, quhilkis pertenit of befoir to the priorie of Charterhouse as ane pairt of the patrimonie thairof, and now pertenis to his majestie be the act of annexatioun of the kirk landis within this realme to the crowne, with all and sindrie the teyndschewes, utheris teyndis, fruittis, rentis, proventis, emolumentis and dueteis, alsweill personages as vicarages, of all and sindrie the parochkirkis of the samin benefices sall be grantit and disponit to the said Robert, lord Roxburgh, his airis maill and assignais heretablie, as followis; as also considering that William, commendatar of Kelso, for mony gude and ressonable causes, with consent of his yconimus, hes resignit, renuncit and dimittit in his hienes handis all and haill the said benefice of Kelso and cell of Lesmahago, quhilk is ane pendicle thairof as said is, haill teyndis, fruittis and rentis of the kirkis of the samin (except heireftir exceptit) with the abbay places of Kelso and Lesmahago, closteris, houses, biggingis, yairdis, orchardis and all landis within the precinctis thairof, to the effect the samyn may be disponit be his majestie to the said Robert, lord Roxburgh and his foirsaidis, in maner and to the effect following, as the said dimissioun beiris; thairfoir his hienes, with advyse of the saidis estaittis of parliament, eftir sufficient tryell tane thairin be thame of the haill premises and that the samin ar sene, ressonable and proffitable causes for the weill of his majesteis crowne and realme, hes dissolvit and be thir presentis dissolvis all and sindrie temporall landis and rentis pertening of befoir to the said abbacie of Kelso and cell of Lesmahago, with that pairt foirsaid of all and haill the saidis landis, manis and towne of Sproustoun, mylnis, mylnlandis, multuris, suckin and haill pairtis and pendiclis thairof, fra the said act of annexatioun of the samin to the crowne, and fra all utheris actis of annexatioun quhatsumevir, exceptand alwayes furth and fra this present dissolutioun all and haill the landis of Bothill, with the myln of the samin, the landis of Toircleuch, the landis of Hairheid, with the toure, fortilice and maner place of the samin, and the landis of Bowscheilhill, with houses, biggingis, yairdis, toftis, croftis, pairtis, pendiclis, annexis, connexis, tennentis, tennandres, service of frie tennentis of the saidis haill landis, with thair pertinentis, lyand within the constabularie of Hadingtoun and schirefdome of Edinburgh, to Schir Johne Cokburne of Ormestoun, knycht, justice clerk, to be haldin of oure soverane lord in all tyme cumming, for the yeirlie payment of tuentie twa pundis tuelf penneis, conforme to his infeftment of the samin, the saidis Lord of Ormestoun, his airis and successouris in the saidis landis relievand the said Lord of Roxburgh and his successouris in the lordschip of Kelso of the said fewferme duetie yeirlie of tuentie tua pundis tuelf penneis at oure soverane lord and his hienes collectouris handis; and siclyk hes dissolvit and, be thir presentis, dissolvis all and sindrie the teyndscheves and utheris teyndis, fruittis, rentis, proventis and emolumentis, alsweill personage as vicarage, of all and sindrie the parochkirkis of the saidis benefices of Kelso and Lesmahago fra the saidis benefices and fundationis thairof quhairupoun the samin procedit, except the teyndis, personage and vicarage, of the kirkis of Home, Gordoun and Fogo, possessit be Alexander, erle of Home, lord Jedburgh and Douglas etc., and the teyndis of the landis and baronie of Broxfeild lyand within the parochin of Kelso, also pertening to the said erle, being the auld kyndlie possessionis of the house of Home, and lykwayes exceptand the kirk of Grenelaw and teyndis thairof, the patronage quhairof pertenis to George, erle of Dunbar, lord Berwick, be his hienes gift and dispositioun, quhilkis kirkis and teyndis respective foirsaidis sall nawayes be comprehendit under this present dissolutioun, bot is and sall be specialie exceptit thairfra and furth of the infeftment following; and lykwayes hes dissolvit and be thir presentis dissolvis the saidis abbay places, closteris, yairdis, orchardis and all aismentis and commoditeis within the precinctis of the samin fra the saidis benefices, and hes suppressit and, be thir presentis, suppressis the names and memoreis of the samin benefices for now and evir to the effect the samin haill temporall landis and rentis of the saidis benefices (except befoir exceptit), and that pairt of the saidis haill towne, landis and manis of Sproustoun, with thair foirsaidis, quhilkis pertenit of befoir to the said priorie of Charterhouse, with all and sindrie the teyndscheves, utheris teyndis, fruittis, rentis, proventis, emolumentis and dueteis, alsweill personages as vicarages, of all and sindrie the paroch kirkis of the samin benefices (except befoir exceptit), togidder alsua with the saidis abbay places, closteris, yairdis and all boundis within the precinctis of the samin may be grantit and disponit be his majestie to the said Robert, lord of Roxburgh, his airis maill and assignais foirsaidis, and may be erectit to thame be his hienes in ane haill and frie lordschip and baronie with all privileges, imuniteis and jurisdictionis pertening to ane frie lordschip and baronie haldin of his hienes and his successouris in frie blenche, for yeirlie payment of four hundreth merkis money of this realme in name of blenche ferme as for payment to the ministres serveing the cure at the saidis kirkis to be nominat and presentit and electit be his majestie and his successouris of thair yeirlie stipendis, to be modefeit be the commissionaris appointit to that effect, and thairfoir to be frie of payment of all monkis portionis, first fruittis, fyft penny, thrid and all utheris dueteis quhairunto his hienes, his predecessouris or successouris had, hes or ony wayes may have or pretend richt in ony tyme cumming be vertue of quhatsumevir law, statute, actis of parliament, counsaill or conventioun quhatsumevir maid or to be maid in the contrair, quhilkis his hienes and estaittis foirsaidis for the cause abone specefeit renunces and discharges for evir be thir presentis; ordaning the said lordschip to be callit in all tyme cumming the lordschip and baronie of Halidene, and that sufficient heretable infeftment may be grantit be his majestie thairupoun in favouris of the said Robert, lord of Roxburgh and his foirsaidis in sic dew and competent forme as efferis, for making of the quhilk infeftment, this act sall be ane sufficient warrand; quhilk infeftment lykwayes oure said soverane lord, with advyse of his saidis estaittis, now as gif the samin wer perfytit and maid and than as now, for his hienes and his successouris, ratefeis and apprevis for evir be thir presentis, reserveand alwayes and exceptand furth of this present act and erectioun foirsaid all regalitie and all privileges thairof gif ony be possessit be the abbottis and titularis of Kelso of befoir, to remane with oure soverane lord and his hienes successouris and thair crowne inseparablie in all tyme heireftir.