[1605/6/101]¹

²Erectioun of Dundrenan in favouris of Johne Murray

Oure soverane lord, with advyse and consent of the estaittis of this present parliament, remembering the gude, trew and thankfull service done be his majesties trustie and familiar servitour Johne Murray, grome of his majesteis bedchalmer, in continuall attendance upoun his majesteis sacrate persone, quhairin he hes behavit himself maist faithfullie and deutyfullie as is notour and weill knawin to the saidis estaittis; thairfoir, oure said soverane lord and estaittis of this present parliament dissolvis all and sindrie the landis, baroneis, touris, fortalices, maner places, mylnis, multuris, woddis, fischeingis, annualrentis, caynis, customes, casualiteis, emolumentis and dueteis quhatsumevir of the temporalitie of the abbacie of Drundrennan fra the act of annexatioun maid in his hienes parliament haldin at Edinburgh, the tuentie nynt day of Julii, the yeir of God j^M v^C fourscoir sevin yeiris, annexand the temporalitie of all benefices within this realme to the patrimonie of his hienes crowne, with the precinct, monasterie and manerplace of Dundrennan fra the said abbacie of Dundrennan and benefice thairof, quhairunto the samin pertenis and pertenit of auld, togidder with the haill spiritualitie of the kirkis of the samyn abbacie, viz: the kirkis of Dundrennane, alias Ririk, and Kirkmabrek, with all and sindrie teyndscheves, utheris teyndis, fruittis, rentis, proffeittis, proventis, emolumentis and dueteis quhatsumevir pertening and belanging thairto; and that the saidis estaittis of parliament findis it necessar and expedient that his majestie, be his hienes infeftment to be maid with advyse of his majesteis ordinar officiaris, sall gif, grant and dispone to the said Johne Murray and his airis maill and assignais quhatsumevir, all and sindrie the saidis landis, baroneis, touris, fortalices, manerplaces, mylnis, multuris, woddis, fischeingis, annualrentis, caynis, customes, casualiteis, emolumentis and dueteis quhatsumevir of the temporalitie of the said abbacie, kirkis of Dundrennan and Kirkmabrek, teyndscheves thairof, utheris teyndis, fruittis, rentis, proffeittis and emolumentis pertening thairto, with all richt, titill, interes and clame of richt quhilk his majestie, his predecessouris and successouris had, hes or onywayes may have or clame thairto, or ony pairt thairof be ony maner of way in tyme cumming, to be erectit, unit, maid, creat and incorporat in all and haill ane frie baronie, to be callit in all tyme cumming the baronie of Dundrennan, and ordinis the manerplace of Dundrennan to be the principall messuage of the said haill baronie of Dundrennan for taking seasing thairat in all tyme cumming. And lykwayes, the saidis estaittis suppresses and extinguisches perpetualie in all tyme cumming the said abbay and monasterie of Dundrennan, and declaris na persone, nor persones to be provydit thairto in ony tyme cumming heireftir; and ordinis ane infeftment to be past under his hienes great seall heirupoun, to be haldin of oure said soverane lord and his successouris in frie blenche, frie heretage and frie baronie for evir, gevand thairfoir yeirlie the said Johne Murray and his foirsaidis to oure said soverane lord and his successouris the sowme of fourtie pundis usuale money of this realme of Scotland yeirlie at the feist of Witsonday in name of blenche ferme alanerly, with ane speciall remitt and discharge, with consent of the collectour generall, of the haill thriddis of the said abbacie of Dundrennane, alsweill victuall as money, and of the haill monkis portionis of the samyn abbacie, becaus his majestie will be relevit and dischargeit of the sustentatioun of the ministerie of the kirkis thairof, and als decernis all pensionis disponit furth of the thriddis of the said abbacie in ony tyme bigane to be null in all tyme cumming. And oure said soverane lord and estaittis of parliament hes interponit and interponis thair consent and authoritie to the said dispositioun and to the infeftment to follow thairupoun, now as gif it wer alreadie maid and perfytit and than as now, as that deid quhilk is now and sall be in all tymes heireftir estemit and judgeit for the weill of oure said soverane lord and for ane seand proffeit and commoditie to his crowne and realme of Scotland for evir.