[1605/6/83]¹

²Act in favouris of the capitane and keiparis of the castell of Dunbartane

Oure soverane lord and estaittis of this present parliament, considering how necessar it is for the weill of Scotland that the castell of Dunbartane, quhilk is the key and speciall hald of that pairt of oure cuntrey, be intertenyit, thairfoir oure said soverane lord, with advyse and consent of the saidis estaittis, hes ratefeit and approvin and, be the tennour heirof, for his hienes and his successouris, ratefeis, appreves and perpetualie confermis the lettres of gift and dispositioun maid, gevin and grantit be oure said soverane lord, with advyse of his majesties cousing and counsaillour David, lord of Scone, comptroller to the captane, constable and keiparis of the said castell of Dunbartane present and to cum and thair successouris, off all and haill the fewfermes, proffeittis and dueteis of the landis of the Ile of Bute, lyand within the schirefdome thairof, extending to ellevine chalderis, fyftene bollis beir, ten chalderis of aittis, tuentie four bollis of meill, ane hundreth fourtie pundis silver maill and fourtie ane sufficient merkis to be uptakin be thame fra the fewaris, tennentis and possessouris of the landis of the Ile of Bute at the termes of payment useit and wont, as the foirsaidis lettres of gift, assignatioun and dispositioun thairin contenit, past under his hienes privie seall of the date at Quhythall, the last day of December, the yeir of God j^M vj^C and four yeiris, in thame selffis at mair lenth proportis in all and sindrie pointis, heidis, articlis, clauses, circumstances and conditionis thairof; and findis, decernis and declaris the foirsaidis lettres of gift, assignatioun and dispositioun thairin contenit to be ane perfyte, sufficient and valide richt and securitie to the captane, constable and keiparis of the said strenth and castell of Dunbartane present and to cum and thair successouris for bruiking and joising of the foirsaidis fewfermes and utheris dueteis thairin contenit, and that for all the dayes and termes sen the date thairof, and siclyk yeirlie and termelie in all tymes cumming siclyk and als frelie in all respectis as gif the fewfermes, silver maill and utheris dueteis exprest in the saidis lettres of gift had bene assignit be ane speciall act and statute of parliament for keiping of the said castell of Dunbartane, nochtwithstanding quhatsumevir act of parliament, statute or constitutioun maid in this present parliament or at ony tyme of befoir, quhilkis sall nawayes be hurtfull nor prejudiciall to the foirsaid lettres of gift, nor mak dirogatioun thairto in ony sorte; and willis and grantis that this present confirmatioun is and sall be of als great strenth, force and effect as gif the saidis lettres of gift had bene word be word ingrossit and insert heirin, quhairanent oure soverane lord, with advyse foirsaid, be thir presentis, dispenses; lyk as oure said soverane lord, with advyse and consent foirsaid, be the tennour heirof, statutis and ordanis that the foirsaidis fewfermes of victuall and silver maill and martis comprehendit in the foirnameit lettres of gift sall remane and abyd in all tyme cumming with the captane, constable and keiparis of the said strenth and castell of Dunbartane for sustening of thair charges in keiping thairof. Attoure oure said soverane lord and estaittis foirsaidis ratefeis, appreves and confermis the act of parliament maid in his hienes nynt parliament haldin at Edinburgh, the tuentie twa day of August, the yeir of God j^M v^C fourscoir four yeiris, anent the money and victuall assignit to the keiping of the castell of Edinburgh, Striviling, Dunbartane and Blaknes, insafar as the foirsaid act of parliament is extendit to the maillis, fermes, proffeittis and dueteis of the landis of Cardross and Mekill Cumray, to the pensioun, ferme, meill of Kirkpatrik and fyve hundreth and fyftie merkis out of the superplus of the thriddis of the benefices assignit for keiping of the said castell of Dunbartane and ordanit be the tennour of the samin act to remane and abyd in all tymes cumming with the captanes and keiparis of the said castell of Dunbartane for sustening of the charges of thair offices.