The Records of the Parliaments of Scotland to 1707, K.M. Brown et al eds (St Andrews, 2007-2024), date accessed: 28 March 2024
[1605/6/68]1
2Ratificatioun of the kirk of Nather Airlie in favouris of Schir Thomas Lyoun of Auldbar, knycht
Oure soverane lord and estaittis of this present parliament, for mony great and wechtie causes and considerationis, hes ratefeit and approvin and, be the tennour heirof, ratefeis, appreves and, for his hienes and his successouris, perpetualie confermis the act of parliament maid be his majestie, with advyse of his estaittis, in his hienes fourtene parliament haldin at Edinburgh, the aucht day of Junii the yeir of God jM vC fourscoir fourtene yeiris, anent the dissolutioun of the kirk of Nather Airlie, personage and vicarage thairof, togidder with all and sindrie chartouris maid and grantit be oure said soverane lord at ony tyme befoir the date heirof under his hienes great seall, to his hienes richt trest cousing and counsaillour Schir Thomas Lyoun of Auldbar, knicht, ane of the senatouris of his hienes college of justice, of the richt of the patronage, advocatioun and donatioun of the said parochkirk of Nather Airlie, personage and vicarage thairof, in all and sindrie heidis, pointis, articlis, clauses, circumstances, provisiounes and conditiounes expressit and contenit in the foirsaid act of parliament contening the dissolutioun of the foirsaid parochkirk and in the foirsaid chartour, or ony of thame, with the preceptis and instrumentis of seasing following upoun the saidis chartouris, and findis, decernis and declairis that the said parochkirk of Nather Airlie, personage and vicarage thairof, wes lauchfullie dissolvit fra the abbacie of Couper and patrimonie thairof be the said act of parliament maid the said aucht day of Junii jM vC fourscoir fourtene yeiris, and hes bene lauchfullie dissolvit thairfra continualie sensyne, and sall stand and remane dissolvit fra the said abbacie in all tyme tocum. And that oure said soverane, be vertue of the said act of parliament, hes full and indoubtit richt to erect the said parochkirk of Nather Airlie in ane severall rectorie and vicarage and to dispone to the said Schir Thomas Lyoun, his airis and assignais the heretable richt of the patronage, advocatioun and donatioun of the foirsaid paroch kirk of Nather Airlie, personage and vicarage thairof, and that the foirsaid act of parliament and the heretable chartouris maid be his hienes to the said Schir Thomas Lyoun and his foirsaidis of the richt of patronage, advocatioun and donatioun of the said parochkirk of Nether Airlie, personage and vicarage thairof, with the preceptis and instrumentis of seasing following thairupoun, ar perfyte, sufficient, lauchfull and valide richtis and securiteis to the said Schir Thomas Lyoun and his foirsaidis and utheris haveing richt of thame to bruik, joise and possess heretablie and perpetualie in all tyme cumming the richt of the said patronage, advocatioun and donatioun of the foirnameit paroche kirk of Nather Airlie, personage and vicarage thairof, and that siclyk and als frelie in all respectis as gif the said parochkirk, personage and vicarage thairof, had bene lauchfullie dimittit, dismemberit and dissolvit fra the said abbacie of Couper and patrimonie thairof be ane lauchfull [...], with consent of the convent and chaptour of the said abbacie of Couper, be ressone the said dissolutioun wes maid during the tyme that umquhile Leonard Leslie, commendatar of Couper, wes oure soverane lordis rebell and had remanit and abiddin under the proces of horning be the space of yeir and day, and that nochtwithstanding quhatsumevir lawes civill, cannoun or municipall, and nochtwithstanding quhatsumevir actis of parliament maid in this present parliament, or at ony tyme of befoir, quhilkis sall nawayes be hurtfull nor prejudiciall to the foirsaid act of dissolutioun dissolvand the kirk of Nather Airlie as said is, nor to the heretable infeftmentis grantit to the said Schir Thomas Lyoun of the richt of patronage, advocatioun and donatioun of the said parochkirk of Nather Airlie, personage nor vicarage thairof, nor mak dirogatioun thairto in ony sorte. And willis and grantis that this present ratificatioun and confirmatioun is and sall be of als great strenth, force and effect as gif the foirsaid act of dissolution of the date abonewrittin, with the heretable chartouris abonementionat maid to the said Schir Thomas, wer word be word ingrossit and insert heirin; quhairanent oure said soverane, with advise, for now and evir be thir presentis dispenses.
- NAS, PA2/16, f.63v-64r.
- 'P 39' written in margin beside heading.