The Records of the Parliaments of Scotland to 1707, K.M. Brown et al eds (St Andrews, 2007-2024), date accessed: 29 March 2024
[1605/6/59]1
2Act anent the erectioun of the kirk of Portingcraig
Oure soverane lord and estaittis of this present parliament, understanding the parochin of Lucharis within the schirefdome of Fyf to be of sa great and large boundis and so populous in the self sua that the paroch kirk thairof is nocht capable of the parochineris and induellaris within the said parochin, bot great numberes of thame, throw want of place and occasioun of heiring the word thir mony yeiris bigane, ather abydis at thair awin duelling houses on the Sabboth day, or resortis to utheris parochinnes, and als understanding ane kirk laitlie to be biggit within the towne of the Eist Ferrie of Portincraig, quhilk is the northmaist part of the said parochin, maist distant frome the said kirk of Lucharis and verie commodious to be maid ane paroch kirk for the inhabitantis of that north pairt of the said parochin, thairfoir oure said soverane lord, with speciall advyse and consent of the estaitis foirsaidis, erectis, creatis, makis and appointis the foirsaid kirk laitlie biggit in the Eist Ferrie of Portincraig to be ane paroch kirk in all tyme cumming, and to be callit the paroch kirk of Portincraig, and dismemberis and severis the samin kirk parochin and parochineris thairof in all tyme heireftir frome the foirsaid parochkirk of Lucharis and parochin thairof, quhairof it wes pairt and pendicle of befoir, and geves and grantis to the said paroch kirk of Portingcraig and parochineris thairof all privileges, fredomes, richtis, liberteis and immuniteis belanging to ony parochkirk within this realme.
- NAS, PA2/16, f.61v-62r.
- 'P 30' written in margin beside heading.