[1605/6/57]¹

²Act anent the dismembering of certane townis frome the kirk of Ellon and incorporating of the samyn to the kirk of Slaynis

Oure soverane lord and estaittis of parliament, considering that the paroch kirk of Ellon within the diocie of Aberdene is sua great and large ane parochin being, fourtene scoir of plewes or thairby, sua that the maist pairt of the parochineris within the said parochin may nocht commodiouslie resorte to the said paroche kirk of Ellon, as the inhabitantis of Nather Lisk pertening to the Erle of Erroll, Ovir Lisk, Belschampsie and Auchtmad pertening to the laird of Lisk, and Knapeisleisk pertening to the laird of Collistoun, they being sua far distant frome the said kirk of Ellone; for remede quhairof and for the saidis persones better ease, oure said soverane lord and estaittis foirsaidis annexis and incorporatis the foirsaidis speciall landis, lyand of auld within the said parochin of Ellon, to the paroch kirk of Slaynis in all tyme cumming, and dismemberis the foirsaidis haill speciall townis and everie ane of thame frome the said kirk of Ellone in all tyme cumming. And forder, the saidis estaittis declaris that nochtwithstanding of the premisses that the teyndis of the foirsaidis particular landis sall remane with the persones of Ellon, and that they, nor the patrone of the said kirk of Ellon, sall nawayes be astrictit to pay the minister of Slaynis ony pairt of his stipend althocht the foirsaidis peculiar townis be annexit to the said parochin of Slaynis.