[1605/6/56]¹

²Act anent the erectioun of the kirk of Leith benorth the brig in ane paroche kirk

Oure soverane lord and estaittis of this present parliament, considering that the inhabitantis of the north and south sydis of the watter and brig of Leith within the regalitie and baronie of Brochtoun hantit and maid repair of auld to thair paroch kirk of Halyrudhous, to preaching prayeris and to the celebratioun of the sacramentis, verie far distant frome thair habitationis, sua that it wes nocht habill for the maist part of thame to repair to thair said parochkirk of Halyrudhous at all tymes, being ageit and seiklie persones, quhairfoir the saidis inhabitantis of the north and south sydis of the said watter and brig of Leyth, upoun thair awin expenses and charges, hes biggit to thameselffis ane kirk upoun the north syd of the brig of Leith, and hes had ministeris serveing the cure thairat and ministring to thame the sacramentis thir tuentie yeiris bigane with the mair, lyk as they have presentlie ane minister serveing the cure thairof, they being ane thowsand communicantis quha cummis and hantis to the samin kirk, duelling within the said regalitie of Brochtoun; thairfoir oure said soverane lord and estaittis foirsaidis creatis and erectis the said kirk in ane paroch kirk to the saidis inhabitantis of the north and south pairtis of the said watter of Leith, to be callit in all tyme cumming the paroche kirk of Leyth benorth the brig, and geves and grantis to the samin paroch kirk and to the haill inhabitantis thairof all privileges, fredomes, liberteis and immuniteis belanging to ony paroch kirk within this kingdome, and dismemberis the samin in all tyme cumming frome the said parochin of Halyrudhous.