[1605/6/54]¹

²Dissolutioun of Huntingtoure and Strathbrawne

Oure soverane lord and estaittis of parliament presentlie convenit, considering that the setting of the landis of the annexit propirtie in fewferme for payment of the auld rentall with augmentatioun is greatlie to his majesteis benefite and proffeitt, his hienes rentall thairby being maid sure, unchangeable, unalterable and nawayes hable to be disponit and annaleit, hes thairfoir dissolvit and be the tennour of this present act of parliament dissolvis frome the act of the annexatioun of the landis of the erledome of Gowrie and lordschip of Ruthven,³ [the haill landis perteining or belanging to the said earledome of Gowrie and lordschip of Ruthven],⁴ and in speciall the landis and lordschip of Huntingtour and the landis of Strathbrawne; and to the effect that the samin haill landis (except sic as ar heireftir particularlie enumerated) may be in fewferme lattin and heretablie disponit for payment of the auld duetie with augmentatioun of the rentall, and that the said act be extendit in ample forme with all clauses neidfull, it is alwayes declarit that the landis underwrittin: they ar to say, the landis of Cowgask, with the teyndschaves thairof, with mylnis, multuris, woddis, fischeingis, pairtis, pendiclis and pertinentis of the samim, the landis of Peill, Lethame, Eister Heichame, Goodlieburne, Hoill of Huntingtour, the landis of Halyland, Few and Wester Heichame, with the pertinentis of the same, being all of the said lordschip of Huntingtour, sall be dissolvit to the effect the samyn may be sett in blenche ferme (for payment of ane penny) to Johne, erle of Montrois etc., and that for mony great, ressonable and sene caussis mentionat in ane particular warrand maid for dissolutioun of the saidis landis.