[1605/6/50]¹

²Ane acquittance and discharge to the Erle of Dunbar of the kingis jewellis and gardrob

The quhilk day, in presens of the haill estaittis of parliament, comperit personalie Schir Thomas Hammyltoun of Monkland, knycht, advocat to oure soverane lord, in his hienes name producit this acquittance, exoneratioun and discharge underwrittin, maid and grantit be his hienes to his trustie and weilbelovit counsaillour George, erle of Dunbar, lord Berwick, thesaurar to his majestie of this realme, and be vertue of the command gewin to the said lord advocat specefeit thairintill desyrit the samin to be ratefeit and approvin be the saidis estaittis and to be registrat in the buikis of parliament, to have the strenth, force and effect of ane act, sentence and decrete of the parliament of Scotland in all tyme cumming; the quhilk desyre the saidis estaittis thocht ressonable and hes ratefeit and approvin, lykas be the tennour of this present act, ratefeis and appreves the said acquittance, exoneratioun and discharge grantit be his hienes in favouris of the said Lord of Dunbar in the haill pointis, articlis and clauses thairof eftir the forme and tennour of the samin, berand and contenand as is underwrittin, and decernis and ordinis the samin acquittance, exoneratioun and discharge to be actit and registrat in the saidis buikis of parliament, to have the strenth, force and effect of ane act, sentence and decrete of the said parliament of Scotland, in all tyme cumming to remane thairin ad futuram rei memoriam, off the quhilk the tennour followes: James R[ex]. Forsamekill as upoun the long and assured pruif of the faithfull diligence, cair and discretioun of oure richt trustie and weilbelovit cousing and counsaillour the Erle of Dunbar, maister of oure gardrobe in Scotland, we have justlie judged him worthie of greater truste and imployment in offices and services of hier credit and importance, quhairin him self considering that the weiknes and infirmitie of his bodie culd nocht permitt him sufficientlie to discharge the burding of the saidis offices, nochtwithstanding his exceding willingnes and uttermost endevores thairanent, he thairfoir humblie requesting ws gratiouslie to accept in gude pairt his maist willing dimissioun of the said office of maister of gardrobe to the effect that we, making choice of sum of oure faithfull and approvit servandes, quha be thair health, age and greater leasure micht give ws satisfactioun in the faithfull discharge of the samin, oure service suld nocht in ony sorte be dissapointit in his defaulte; quhairby acknawlegeing that he preferrit the weill of oure service to ane gude pairt of his awin commoditie and credite and haveing at his desyre, upoun the ressonable considerationis foirsaidis, acceptit his dimissioun and thairupoun provydit oure trustie and weilbelovit servitour Schir James Hay, knycht, gentilman of oure bedchalmer, to the office of maister of oure robbis, to quhome, according to the charge of his office, the said Erle of Dunbar hes at oure speciall directioun and command delyverit the particular jowellis, robbis and apparrell specefeit in the said Schir James Hay his ticket of ressait of the samin. And becaus the said Erle of Dunbar hes maid particular delyverie of the jowellis eftirspecefeit, quhairof pairt ar layit in the toure and sum uther pairt ar contenit in the said Schir James Hay, his nochte of ressait: they are to say, the jewell callit the H, with the chane thairof and als with the rubie of the samyn. Item, ane jowell of gold with lettres J. A. R., crowned, joyned togidder in a knochtte with a crowne over thame, fullie furnessit with diamondis of sindrie cuttis and bignes with thrie round perlis pendant. Item, ane great ring of gold enameled sett with fyve diamondis with hand in hand in the middis, callit the espousall ring of Denmark. Item, ane cape band of gold contening tuentie thrie pieces, tuelf with tua pearlis in a pece, sex with lettres garneschit with diamondis and fyve with cinques of diamondis. Item, ane croce of gold sett with fyve diamondis; quhilkis, being the jowellis of most importance and valew that wer brocht furth of that oure kingdome with us, and nocht onlie they, but all utheris oure jowellis, precious stones, pearlis, goldsmith wark and utheris quhatsumevir quhilkis come in the said George, erle of Dunbar, his handis and keiping at ony tyme bigane, being all delyverit be him furth of his handis be oure speciall directioun and command, thairfoir we, for ws, oure airis, executouris and successouris, exoneris, quitclames, frelie simpliciter and perpetualie discharges the said Erle of Dunbar, his airis, executouris and assignais of all and sindrie oure jowellis particularlie abonerehersit for now and evir; and by these presentis, faithfullie promittis in the word of a prince to cause thir presentis be ratefeit, confermit and approvin be the estaittis of oure kingdome of Scotland in the nixt ensewing sessioun of parliament thairof, to quhome this oure present directioun and command sall be ane sufficient warrand for ratificatioun of the haill premisses, commanding heirby oure trustie and weilbelovit counsaillour Schir Thomas Hammyltoun of Monkland, knycht, oure advocat, to compeir in presens of oure commissionar and estaitis of oure said parliament of Scotland, and thair in oure name to present and delyver this oure discharge, to be ratefeit by oure saidis estaittis and to be registrat in the register of oure parliament, to have the strenth, force and effect of ane act, sentence and decrete thairof in all tyme cumming. In witnes quhairof we have signit thir presentis with oure hand at Whythall, the aucht day of Aprile, the yeir of God j^M vj^C and sex yeiris.