The Records of the Parliaments of Scotland to 1707, K.M. Brown et al eds (St Andrews, 2007-2024), date accessed: 29 March 2024
[1594/4/55]1
Anent the chappell royall of Striviling
Oure soverane lord and estaitis of this present parliament, considdering that his majesties maist noble progenitouris of guid memorie, conforme to the example of uther civile and Christiane princes, foundit the chappell royall of Striviling and disponit certane landis, rentis and benefices thairto for interteynment of ane certane nowmer of musicianis to mak residence and service in his hienes hous and chappell at all tymes requisit, nevirtheless, be the inoportune sute of sindre personis in his majesties minoritie, the rentis of the said benefice ar sua alterit and disponit that the saidis musicianis ar not hable to mak residence, nor thair is na thing left to thame to leif upoun, bot that the said erectioun and fundatioun appearis alluterlie to decay; thairfoir his hienes and estaitis foirsaidis retretis, rescindis, cassis and annullis all takis, pensionis or uther dispositionis quhatsumevir maid be his hienes of the few males and dewties of few landis and of the dewties of the takis of teyndis of the said benefice or ony pert of the same to quhatsumevir persone or personis at ony tyme heirtofoir, and decernis the saidis takis, pensionis and uther dispositionis foirsaidis of the few males of the saidis landis and of the dewties of the takis of the teyndis thairof to be null, saulffand allanerlie and exceptand the assignationis maid to the ministeris resident and servand the cures of the kirkis of the said benefice.
- NAS, PA2/15, f.42v-43r.