The Records of the Parliaments of Scotland to 1707, K.M. Brown et al eds (St Andrews, 2007-2024), date accessed: 29 March 2024
[1592/4/155]1
Ratificatioun to Johnne Cheisholme, comptroller of the ordinance
2Forsamekle as oure soverane lord understandis that his hienes darrest mother of guid memorie gaif and disponit heretablie efter hir perfite aige and generall ratificatioun heretablie in fewferme to his hienes lovit servitour Johnne Cheisholme, comptrollar of his hienes artalyearie, all and haill his hienes landis callit the Kingis Wark in Leith, with housis, biggingis, cloisis and all uther places and pertinentis thairof, bak and befoir, lyand within the said toun of Leith and schiredome of Edinburgh, as at mair lenth is contenit in the infeftment maid to him thairof off the dait at Edinburgh, the xxj day of October, the yeir of God jM vC threscoir foure yeiris, and of his motheris regne the xxij yeir, the quhilk infeftment and dispositioun maid as said is his hienes darrest mother of guid memorie ratifiet and apprevit to the said Johne, his aris and assignais efter hir said perfite aige, in all pointis, clausis and articles, as the said act of parliament haldin at Edinburgh, the xix day of Aprile, the yeir of God jM vC threscoir sevin yeiris, in it self at lenth proportis; the quhilkis infeftment of few ferme maid to the said Johnne, his aris and assignais, and ratificatioun and confirmatioun of the daitis respective foirsaidis, oure soverane lord hes ratifiet and apprevit in all and quhatsumevir clausis, conditionis and articles, as his hienes charter under his greit seill of the dait at Halyruidhous, the xxij day of Maii, the yeir of God jM vC lxxxviij yeris, at mair lenth beris; thairfoir his hienes, with advise of his estaitis in this present parliament, for the ressonable causis contenit in the said first infeftment and ratificatioun thairof, and for the guid and faithfull service done to him be the said Johnne, ratifies, apprevis and confermis the said first infeftment gevin and disponit to him, his aris and assignais, and the said act of parliament and ratificatioun of the said infeftment contenit thairin, togidder with his said hienes charter of confirmatioun of the premisis of the daittis respective abonewrittin, in all and sindre pointis, passis, privilegis, clausis and conditionis contenit thairin, or ony ane thairof; and statutis and ordanis that the said Johnne and his foirsaidis sall bruik and joyse in all tyme heirefter the foirnamit landis callit the Kingis Wark, with all boundis, methis and merchis, efter the forme and tennour of his said first infeftment, but ony revocatioun, contradictioun or impediment to be maid to him or thame in ony wayis in tyme cuming, renunceand, quiteclamand and dischargeand, for his hienes and his successouris, all actioun and instance his hienes haid, hes or may have aganis the said Johnne or his foirsaidis anent the premisis for evir be thir presentis; and mairower, ordanis thir presentis to be of als greit force and effect to the said Johnne and his foirsaidis as gif the said first infeftment grantit to him be his hienes darrest mother, and the said act of parliament contenand the ratificatioun and confirmatioun thairof, togidder with the confirmatioun grantit be his hienes of the said infeftment and act of parliament, haid bene word be word and expreslie insert heirintill.
- NAS, PA2/14, ff.57r-v.
- Written in margin: 'P'.