[1592/4/112]¹

Ratificatioun of the exceptionis frome the generall act of annexatioun

²Forsamekle as in the act maid in the parliament haldin at Edinburgh, the tuentie nynt day of Julii, the yeir of God j^M v^C fourscoir sevin yeiris, anent the generall annexatioun of the kirklandis to the croun, thair wes dyvers landis, lordschippis and baronies speciallie exceptit, quhilkis wer declarit not to be comprehendit under the said annexatioun, thay ar to say: the superioritie and fewfermes of the landis of Tulloes, the mylne of Craquhie, mylne landis and sukin of the same; the landis of Corstoun, quhilkis pertenit to the abbay of Abirbrothok lyand within the schirefdome of Foirfar; the landis and lordschip of Torphechin; the erldome of Gowrie; the lordschip and leving of Deir, now callit the lordschip of Altrie; the landis and baronies of Newbotle with the utheris landis annexit thairto; the baronies of Bruchtoun and Kers; the burgh of the Cannogait and that pairt of the toun of Leith; the baronie of Auldhammer, als callit Quhyt Kirk, quhilkis pertenit to the abbacie of Haliruidhous; the landis and lordschip of Mussilburgh, quhilkis pertenit to the abbay of Dunferling; the baronie of Brunt Iland in annexis and connexis of the same in the patronage of the personage and vicarage of Waster Kinghorne, quhilkis landis and lordschippis ar disponit to dyvers personis as thair particuler infeftmentis beris; and als exceptit the haill remanent landis of the abbay of Dumfermling declarit as yit to abyd with the said abbay in the same stait quhairin thai than wer and ar not comprehendit in the annexatioun foirsaid, bot to remane with the said abbay quhill further ordour be tane; and als exceptit furth of the said annexatioun of kirklandis to the croun the infeftment of the temporalitie of Paislay and the priorie of Pluscarden and temporalitie thairof; and siclyk the temporalities of the abbacies of Coldinghame and Kelso and cell of Lesmahago, declarand thame yit to remane with the saidis abbayis and cell in the same estait quhairin thai wer, and that thai wer not comprehendit in the annexatioun foirsaid, bot to remane with thame quhill furder ordour be tane; and siclyk maner the superioritie and fewfermes of the landis of Lethame, lyand within the schirefdome of Fyff, being a part of the patrimonie of the archebischoprik of Sanctandrois, the landis undirwrittin quhilkis ar ane part of the temporatitie of the provestrie of Lincluden: thay ar to say, the fyve mark land of Litle Dryburgh; the fyve marik land of Drumjarg; the fyve mark land of Ernephillane; the fyve mark land of Ernecrago; the fyve mark land of Baronie; the fyve mark land of Mekle Dryburgh; the fyve mark land of Chapmantoun; the fyve mark land of Blakerne; the fyve mark land of Ermenyie; the fyve mark land of Culnotrie; the corne mylne of Corsmichaell; the fyve mark land of Garrantoun; the tua mark land and ane half of Blakperk, all lyand within the baronie of Corsmichael and stewartrie of Kircubreich; the xv £ land of Staikfurd; the xl £ land of Newtoun; the mark land of Cluny and Skellingholme; the sex mark land of Turrauchtie; the sex mark land of Drumgranis; the fyve mark land of Troqueir; the mark land of Slotheholme; the fyve mark land of Noneland; the fyve mark land of Cruifstanis; the sex mark land of Holme; the xx £ land of Marieholme; the four mark land of Noneholme, all lyand within the baronie of Drumsleit and stewartrie foirsaid; togidder with all castellis, towris, fortalices, maner places, housis, biggingis, orcheardis, yardis, mylnis, woddis, fischingis, partis, pendicles, annexis, connexis, outsettis, tennentis, tennandries and fermes of fewfermes, canys, custumes, services, casualities and utheris commodities quhatsumevir; and als hes declarit and declaris that it salbe lauchtfull to his hienes to use the superioritie and fewfermes of the landis of Lurg and Kincardin with sevintene akar of land, quhilkis landis ar of the abbacie and lordschip of Culross and the preceptorie of Santanthonis in Leith, and chaiplanrie of Sanct James at the new havin, landis, teyndis and annueilis of the same as sall seme guid to his hienes; as also the landis undirwrittin, quhilkis ar ane part of the patramonie of Northberuik: thay ar to say, all and haill the place quhair the abbay kirk and closter of Northberuik stuid befoir, quhilk is now ruinous and wes na parroch kirk; and als all and sindrie the landis of the Heuch of Northberuiklaw, the Law Medow, the mylne of Kinkyth, with the croftis thairof, the uther four croftis of land sumtyme occupiet be Robert Hume of Heuch with thair pertinentis lyand on the southsyde of the burgh of Northberuik; all and haill the wast part of the toun of Northberuik, callit the Nungait, lyand upoun the wast syd of the burne, callit the Clairtie Burne, with all and sindre landis, tenementis, housis, biggingis, outsettis, taillis, barnis, yardis and utheris pertinentis thairof; all and haill the tua husband landis in Benestoun with thair pertinentis, all lyand within the schirefdome of Edinburgh and constabularie of Hadingtoun; all and haill the landis of Monchryf, the landis of Alderny, the landis of the Grange with thair pertinentis, all lyand within the schirrefdome of Fyff, with housis, biggingis, fortalices, mansionis, yardis, orcheardis, fermes of fewferme, tennentis, tennandries, partis, pendicles and pertinentis of all and sindrie the saidis landis quhilk his majestie declaris ar nocht, nor sall nocht, be comprehendit in the said annexatioun. Quhilk act, and speciallie the saidis exceptionis thairin contenit, oure soverane lord and estaitis of parliament ratifies and apprevis in all the pointis and circumstandes thairof; and hes declarit and declaris the saidis landis, lordschippis and baronies to have bene and to be in all tyme cuming speciallie and expresslie exceptit fra the said generall annexatioun. Attour, oure said soverane lord and estaitis of parliament of thair certane knawlege ratifies and apprevis all and quhatsumevir infeftmentis maid be his hienes at ony tyme befoir the dait heirof, to quhatsumevir persoun or personis, thair aris and successoris of the foirnamit landis or ony pairt thairof and the procuratories and resignationis quhairupoun the samyn proceidit; and for his hienes and his successouris, decernis and ordanis the same to stand in full force, strenth and effect in tyme cuming to the personis quhilkis obtenit the samyn, nochtwithstanding quhatsumevir statute, ordinance or revocatioun maid in this present parliament or at ony tyme befoir the dait heirof.