[1592/4/106]¹

Act for erecting of the toun of Scraling in burgh of baronie

²Oure soverane lord, with avise of the estaitis of this present parliament, having considderatioun of the gude and thankfull service done to his majestie and umquhile oure darrest mother be umquhile Schir James Cokburne, father to Williame Cokburne, now of Skirling, and for dyvers utheris consideratiounis moving his majestie, and speciallie having consideratioun that thair is dyvers and sindrie inhabitantis within the schirefdome of Peiplis far distant fra the principall burgh of the said schire quhairby thay can not guidlie repair at the faires and marcat dayis of the said burgh for doing of thair lesume effayres and traffique of thair guidis, cornis and utheris merchandise; and that the toun of Skirling is ewest to the maist pairt of the said schirefdome farrest distant fra the said toun of Peiplis; thairfoir his majestie, with avise foirsaid, ordanis the said toun of Scraling to be erectit in ane frie burgh of barronie with all easmentis, liberties and commodities, and in als ample and large forme as ony burgh of baronie within this realme, with power to keip and proclame ane fair day to be observit within the said burgh upoun the fourt day of September yeirlie and ane mercat day oulklie upoun Fryday; and for the said Williamis better securitie, gif neid beis, ordanis ane new infeftment to be grantit to him upoun his awin resignatioun, off all and haill the landis and baronie of Skirling with toure, fortalice etc. and towne of the samyne, with erectioun of the same in ane frie burgh of baronie in maner foirsaid in ample and large forme; and in the meantyme ordanis publicatioun to be maid heirof at the mercat croces of the burghis of Peiplis and Lanerk and utheris places neidfull.