[1592/4/104]¹

Ratificatioun of the landis and annuellis mortifiet to the ministrie and hospitall of Edinburgh

²Oure soverane lord, now efter his perfite aige of tuentie fyve yeris compleit, with avise of his estaitis in parliament, ratifies and apprevis the donationis and mortificationis maid be his hienes umquhile darrest mother in hir perfite aige and be his hienes self at dyvers tymes, of the landis, benefices and rentis dotit for sustentatioun of the ministrie within the burgh of Edinburgh, and for interteneying of the hospitallis thairof, and speciallie of all annuellis, landis and tenementis lyand within the fredome of the said burgh, foundat to quhatsumevir benefice, and of all landis and annuellis lyand outwith the libertie of the said burgh annexit to ony benefice, prebendarie or religious place situat within the fredome of the said burgh. And oure said soverane lord, for his pitifull zeale quhilk he hes to the sustentatioun of the hospitallis and ministrie within the said burgh, with advise of his saidis estaitis of parliament, now eftir his perfite aige of tuentie fyve yeris compleit, hes of new annexit to the commountie of the said burgh and thair successouris, in favouris of thair ministrie and hospitall, all and haill the saidis landis, tenementis, annuelrentis, proffittis and emolumentis foirsaidis, fewfermes, males and dewties thairof; and surrogattis thame in the full richt of all landis, annuelrentis and emolumentis situat within the fredome of the said burgh, quhilkis pertenit of befoir to quhatsumevir bischoip, abbot, priour or quhatsumevir ecclesiasticall persoun within this realme; and ordanis ane new infeftment to be exped thairupoun for thair securitie gif it be thocht expedient. And for the said godlie effect, his hienes dissolvis the generall annexatioun in that pairt insafar as the samyn may appeir to be extendit to ony of the premisis, or to the anexatioun maid ofbefoir in favouris of the said college and hospitall of the kirk of Dumbar,³ quhairof the kirk of Potie and Moncreiff ar pendicles, lyand within the schirefdome of Perth, the personage of Curry, and the ane half of the vicarage thairof pertening to the archedeine of Lowthiane, the landis, annuelrentis, housis, yardis and biggingis of the Trinitie College, situat within the said burgh of Edinburgh, alsweill pertening to the provest as to the prebendaris thairof and commoun landis and annuelrentis of the same; quhilk annexatioun his hienes, with advise of his saidis estaitis in parliament, ratifies and apprevis. As als his majestie, with avise of his saidis estaitis, off new annexis the uther half of the vicarage of Curry, to the quhilk na persoun is provydit, and the haill vicarage of the said kirk of Dumbarnie quhilk alsua vaikis be deprivatioun of [...], last possessour of the same, to remane with the provest, ballies, counsall and communitie of the said burgh and thair successouris in tyme cuming for sustentatioun of thair said ministrie and hospitall. And oure said soverane lord and estatis foirsaidis decernis and declaris that nane of thir particularis befoir writtin, disponit of befoir and newlie annexit for sustentatioun of the said ministrie and hospitall, wer, ar, or salbe evir comprehendit in the generall annexatioun of the ecclesiasticall landis and rentis to the crown, bot wer, ar and sall be exceptit thairfra. Lyk as his majestie and estaitis foirsaidis off new exceptis the samyne, nocht onlie fra the said annexatioun, bot fra all his hienes revocationis maid in tyme bypast or maid in this present parliament; and declaris alsua that the saidis provest, ballies, counsaill and communitie and thair successouris in all tymes cuming, hes and salhave sic full richt of propirtie and superioritie of the foirsaidis landis, annuelrentis and revenewis, tennentis and tenandries, and service of frie tennentis thairof, as haid the bischoipis, abbottis, priouris, freiris, monkis, nunis, chaiplanis and prebendaris to quhome the saidis landis and annuelrentis pertenit ofbefoir, nochtwithstanding ony act or constitutioun preceding the dait heirof.