[1592/4/52]¹

Legislation: private act

Exceptioun for the Duke of Lennox

²Oure soverane lord, with advise of the estatis of this present parliament, calling to remembrance how neir and attingent his hienes darrest cousing Ludovik, duike of Lennox, erll Darnelie, lord Torboltoun, Methven and Aubigny etc., is in blude and consanguinitie to his majestie, quhairthrow his hienes of dewtie is bund to have ane speciall care ower the said Ludovik, duk of Lennox, himself, his haill landis, rentis and leving, speciallie seing it was nocht his majesties will nor intentioun that the charteris, infeftmentis, giftis and dispositionis thairof maid, gevin and grantit be his majestie to him at ony tyme befoir suld be anywayes prejudgeit nor hurt be ony bypast revocationis, speciall or generall, maid be his hienes, bot the same sall stand and be effectuall to his hienes said darrest cousing, nochtwithstanding the saidis revocationis; thairfoir his majestie, with avise foirsaid, be the tennour heirof, willis, decernis and declaris all and sindrie the landis and utheris efterspecifiet, viz: all and haill the duikrie of Lennox, erledome, lordschippis, baronies, regalitie and utheris quhatsumevir thairof contenit in the infeftmment grantit to his hienes said darrest cousing thairupoun, the lordschippis of Methven and Balquhidder, it with mylnis, multuris, woddis, forrestis, fischingis, advocatioun, donatioun and richt of patronage of the provestrie of Methven and regalitie thairof, togidder with all charteris, preceptis and sasingis, giftis and dispositionis quhatsumevir maid, gevin and grantit be his majestie to his hienes said darrest cousing off the foirsaid dukrie, erledome, lordschippis and utheris abonerehersit at ony tyme bygane to have bene fra the beginning and to be heirefter speciallie exceptit and reservit furth of all and sindrie revocatiounis maid be oure said soverane lord at ony tyme befoir the day and date of thir presentis, in sic maner as gif speciall exceptionis and reservationis thairof haid bene speciallie insert and contenit in everie ane of the saidis revocationis, provyding alwayes that thair presentis onnawyis be prejudiciall to Schir Johnne Murray of Tullibardin, knicht, his infeftment of the landis of Balquhidder and utheris his landis specefiit in his said infeftment thairof with thair continentis, nor to the infeftmentis of fewferme maid and grantit be his majestie, with avise of his hienes comptrollaris, to Maister Gilbert Moncreif, his hienes mediciner, his aris and assignais quhatsumevir, off all and haill the landis of Myresyde and Bachiltoun and thair pertinentis lyand within the lordschip of Methven and schirefdome of Perth; quhilkis infeftmentis oure said soverane lord and estaitis foirsaidis decernis and declaris to be sufficient and valiable richtis and titles to the saidis Schir Johnne and Maister Gilbert for bruiking of the saidis landis with thair continentis, nochtwithstanding this exceptioun fra his hienes revocatioun, grantit in favouris of his hienes said darrest cousing, quhilk exceptioun his majestie and estatis foirsaidis findis and declaris nawyis to be derogatour or prejudiciall thairunto.