[1592/4/30]¹

For punishement of slauchter within kirkis or kirkyairdis

²Item, forsamekle as crueltie and bluidsched is cumit to sic ane heicht within this land that the hous of the Lord and his sanctuary is not fre but filthely polutit and defylit thairwith in sic sort that commounlie all revenges of querrellis and deidlie feidis is now execute in kirkis and kirkyairdis at the tyme appoyntit to the service of God and teaching of his haly word thairin, quhairby divers personis, for feir of thair lyffes, dar not resort to the preaching of the Gospell. For remeid quhairof, the kingis majestie and estaittis of this present parliament statutes, ordanis and declaris that quhatsumevir persone or personis committis slauchter within any kirk or kirkyaird the tyme of prayeris, preaching or ministratioun of the sacramentis, that persone or personis, comitteris of the said slauchter, being ather denuncit rebellis or declairit fugitive for the same, the kingis majestie salhaif full power, not onlie to dispone upoun thair simple escheat of moveables, bot als upoun the lyverent of all and quhatsumevir thair landis, heretages, levingis, tackis, stedingis, roumes or possessionis etc.; and als declaris that quhatsumevir persone or personis salhappin to ressett ony of the saidis personis quha beis denucit rebellis or fugitive for the saidis slauchteris committit within the saidis kirkis or kirkyairdis, declaratour being first past upoun thair said ressett, the ressetteris of thame sall incur the samin pane and tinsale of thair lyverentis.