[1587/7/117]¹

Ratificatioun to Maister Peter Young of Seytoun

²Oure soverane lord and his thre estaittis of parliament, remembring the lang, gude, trew and thankfull service done to his hienes be his weilbelovit and familiar servitour and counsallour, Maistir Peter Young of Seytoun, his graces maistir elimosinare, not onlie in his grite panes takin for institutioun of his grace in literature the tyme of his youth, bot als sen his hienes proceidit in yeiris in his continewall attendance upoun his majesties persoun and his effairis, alsweill within his realme as in forreyn cuntries, quhair it pleistit his majestie to direct the said Maistir Peter, ambassadour, in his wechtie caussis, specialie toward the King of Denmark, to quhome the said Maistir Peter wes laitlie directit of new in his secund viage be oure said soverane lord, and at this present is resident in performing of his hienes service committit to him; and oure said soverane lord, being of determinat mynd that the said Maistir Peter and his spous and bairnis sall brouk and enjoy the particulair giftis, feis and pensionis underwrittin, disponit to thame of befoir, in maner following, efter the forme and tennour of the dispositionis and giftis maid to thaime thairof, be sic securitie and force as the samin sall nevir be callit in questioun heirefter, bot that the said Maistir Peter, his spous and bairnis foirsaidis, without querrell or impediment to be maid be oure said soverane lord and his successouris, or onie uther particuler persoun pretendand to haif interes, sall peceable posses, bruik and injoy the saidis giftis, fees and pensionis quhairin standis the only support and releif quhilk the said Maistir Peter hes had for all his service bipast, and without the quhilk he is not hable to continew in his majesties service heirefter; thairfoir oure said soverane lord, now efter his perfite aige of xxj yeiris compleit, with avisis of his saidis thre estaittis in parliament, hes ratifiet, apprevit and for him and his successouris perpetuallie confirmit, lyk as his hienes, be the tennour heirof, with avise foirsaid, ratifies, apprevis and, for his hienes and his successouris, perpetuallie confirmis the giftis, feis and dispositioun quhatsumever maid be oure said soverane lord befoir to the said Maistir Peter for his lyvetyme and efter his deceis, incais he mak na dispositioun in his awin tyme to Hary, Peter, Robert, Patrik, Johne, Marie and Margret Youngis, his lauchfull bairnis, be equall portionis, and failyeing of ony ane of thame be deceis, the portioun of the persoun deceissand to accress to thame quha salhappin to remane onlyve, during all the dayes of the langest levaris to the saidis sevin bairnis, of all and haill soume of v^C merkis usuall money of this realme as for the few maillis of the lordschip of Torphechin awand yeirlie to oure said soverane lord be the Lord of Torphechin, his immediat tennent thairof, and with power to the said Maistir Peter to dispone the said pensioun, all or in pairt, to quhatsumever personis, ane or ma, at ony tyme befoir his deceis, quhilk dispositioun maid by him salbe of als gude strenth, force and validitie as gif thai wer contenit expreslie be thair names in the said Maistir Peteris gift, as the samin at mair lenth proportis. And alsua oure said soverane lord, with avise of the saidis thre estaittis in parliament, ratifies and apprevis the gift and dispositionis maid be his hienes to the said Maistir Peter for all the dayes of his lyvetyme, and efter his deceis to Hary and Peter Youngis, his sonnis lauchfull, equalie betuix thame for all the dayes of thair lyftymes, and failyeing of ony ane of thame be deceis, the portioun of the pensioun³ deceissand to accress to the uther levand for all the dayes of his lyftyme, with power to the said Maistir Peter to dispone the samin as said is of ane yeirlie pensioun of tua hundreth merkis usuall money of this realme yeirlie, to be upliftit and takin furth of the superplus of the thrid of the archiebischoprik of Glasgw and of the particuler places thairof quhairof the said Maistir Peter hes bene in possessioun of befoir. And siclyk oure said soverane lord and his thre estaittis in parliament ratifies, apprevis and, for him and his successouris, perpetuallie confermis the utheris giftis and dispostionis quhatsumever maid to the said maistir Peter for all the dayes of his lyvetym be umquhile James Boyd, archiebischop of Glasgw, off all and haill ane yeirlie pensioun of tua hundreth pundis money foirsaid, to be yeirlie upliftit furth of the tua part of the said archiebischoprik, for thankfull pament thairof thair is assignit to the said Maistir Peter the deweties of the kirk of Drymmen extending to j^C ij lib. xiij s. iiij d., and for the remanent thairof, certane temporall landis of the said archiebischoprik specialie mentionat in the said gift, quhilk wes confirmit be oure said soverane lord befoir be his lettres under his privie seill. As als oure said soverane lord and his saidis thre estaitis in parliament ratifies and apprevis the gift and dispositioun maid be umquhile Robert, erle of Merche, commendatair of the priorie of Sanctandrois for the tyme, ratifiet, apprevit and renewit be Lodovick, duke of Lennox, erle Dernelie, lord Tarbowtoun, Methven and Obegnie, now commendater of the said priorie, to the said Maistir Peter, Eliot Gib, his spous, James and Harie Youngis, thair sonis, and the langest levare of thame foure, of sevin chalderis beir and thre chalderis quheit, to be upliftit and takin furth of certane places, rowmes and landis pertening to the said priorie and specialie mentionat in the said gift, as the samin at mair lenth proportis. And likwyse oure said soverane lord and his saidis thre estaitis of this present parliament ratifies and apprevis the gift and constitutioun of the said Maistir Peter, his hienes maistir elimosinare, for all the dayes of his lyvetyme with the fie thairin contenit, and furder, oure said soverane lord, with avise of his saidis thre estaittis, now in his perfite aige, gevis, grantis and disponis to the said maistir Peter, his said spous and thair foirsaidis respective, all and sindrie the foirsaidis pensionis and giftis, with all richt, clame, title and entres that his hienes and his successouris may pretend thairto, with the said gift of the office of elimosinarie and fie thairin contenit, and will and grantis that the samin giftis, pensionis and fies nor nane of thame ar, or salbe, comprehendit under his hienes generall revocatioun, bot that the samin is, and salbe, [comprehendit under his hienes generall revocatioun, bot that the samin is, and salbe,]⁴ specialie exceptit thairfra, to the quhilk generalitie this speciale act sall mak and makis speciall derogatioun. As alsua oure said soverane lord, with avise of his saidis thre estaittis, will and grantis and, for him and his successouris, decernis and ordanis that all and sindrie the foirsaidis pensionis, gift of elimosinarie and fie thairin contenit salbe yeirlie payit to the said Peter and his said spous, his bairnis and uthers foirsaidis respective during thair lyftymes siclyk and alsfrely as thai have bene payit in tymebipast, and that notwithstanding the generall annexatioun of the kirklandis to the croun or ony assumptioun for oure soverane lordis thrid of ony of the landis and rowmes quhairof the said Maistir Peter and his foirsaidis hes bene in possessioun of befoir, and als that the generall restitutioun of all personis foirfaltit and convict of barratrie sall gif na rycht nor title to James Betoun, archiebischop of Glasgw, to querrell the said Maistir Peter nor his foirsaidis in the saidis pensionis quhilkis thai have to be upliftit furth of the said archiebischoprik, the effect of the quhilkis restitutionis sall nawyse extend to the pensionis foirsaidis, bot the samin irrevocablie sall stand in full force and strenth, and the archiebischop, quha may pretend richt be vertew of the said restitutioun, sall nawayes brouk the benefeit thairof, except he ratifie, appreve and renew the richt of the said pensionis to the said Maistir Peter and his foirsaidis in sic forme and ordour as the said Maistir Peter sall think expedient. And further, oure said soverane lord and his saidis thre estaittis in parliament, of thair certane knawlege, ratifiis and apprevis the alteratioun and change of the assumptioun of the landis of Eister Seytoun and half of Dikmounthlaw, liand within the regalitie and baronie of Abirbrothok and sherefdome of Forfair, now pertening heretablie to the said Maistir Peter and assumit of auld in a part of the thrid of the abbacie of Abirbrothok, becaus his hienes hes ressavit als mony als proffitable landis in recompance thairof, as at mair lenth is specifiit in the decreit gevin thairupoun be the lordis auditouris of his hienes chekker off the dait at Edinburgh, the xxiij day of Februar, the yeir of God j^M v^C fourescoir sex yeiris, quhilk decreit oure said soverane lord, with avise of the saidis thre estaittis in parliament, ordanis to stand in full strenth and force in all tym cuming.