[1585/12/70]¹

Ratificatioun to Waltir Dundas

Anent the supplicatioun presentit to oure soverane lord and thrie estaitis of this present parliament be Waltir Dundas, sone and appeirand air to George Dundas of that Ilk, makand mentioun that quhair his hienes and lordis of secreit counsall, understanding that the predicessouris of the house of Dundas, quhairunto the said Waltir is appeirand, war principall fundatouris of the place sumtyme possessit be the Carmeleit freiris upoun the south syde of the Quenis Ferry, and dottit the said place and maist pairt of the rentis pertening thairto furth of thair awin propir landis, and speciallie quhair the place, kirk and yairdis thairof ar situat with certane aikeris appointit for the buriall of the house of Dundas, in consideratioun heirof, his majestie, be advise of the lordis of secreit counsall, gaif, grantit and disponit to the said Waltir heretable, his airis and assignais, be chartour and precept under his hienes greit seill, all and haill the rentis, fermis of fewferme and utheris dewateis quhatsumevir quhilkis pertenit of auld to the said Carmeleit freiris and to thair place quhairevir the same lyis within this realme, togidder with the haill kirk and boundis of the said place, with the stepill and houses thairupoun, with pertinentis quhatsumevir quhilkis pertenit to the saidis freiris and place thairof; and for the mair corroboratioun of the saidis infeftmentis, requisite it is the samyn be confermit in parliament, thairfoir our said soverane lord and thrie estaitis of this present parliament, in consideratioun of the premisis, ratefeis, apprevis and perpetuallie confermis the foirsaid chairtor, precept and instrument of sesing grantit be his hienes, with advise foirsaid, of the foirnamit place, kirk, rentis pertening thairto and utheris abovespecifeit, in all the poyntis, clausis, articlis and conditionis thairof specifeit and contenit thairin.