[1585/12/67]¹

Ratificatioun in favour of the bairnis of the Laird of Segy

²Oure soverane lord, with avise and consent of the thrie estaitis of this present parliament, ratefeis and apprevis and, for him and his successouris, perpetuallie confermis the lettre of tak and assedatioun sett be our said soverane lord, with advise of the lordis of counsell, to Johnne and James Meldrumis, sonis lauchfull to James Segie of Meldrum, younger, of all and haill the victuall underwrittin, assumit out of the places eftir specifeit during the space of thair lyftymes, of the quhilk lettre of tak the tennour fallowis:

James, be the grace of God, king of Scottis, to the lordis of our counsall, sessioun and chekker, wit ye us, understanding the guid, trew and acceptable service done to us be our trustie and weilbelovit counsallour James Meldrum of Segie, youngar, in tymes bigane, and willing to recompance the samyn in the persoun of his twa sonis, James and Johnne Meldrumis, for thair intertinement at the scoles, na occasioun being offerrit to haif recompansit thair said father utherwayis according to our guid will borne to him and his demeritis in awaitting upoun our service hithertillis, as we ar alwayis myndit, quhairas the same sall offer the selff, thairfoir settand and for maill lettand to James and Johnne Meldrumis, sonis lauchfull to the said James Meldrum of Segy, all and haill the victuall assumit out of the places underwrittin during the space of thair lyftymes, and the ane surviving the uther, the defunctis pairt eftir his deceise to accres to the uther being on lyfe, thair entrie thairto to be and begin at the instant crope and yeir of God j^M v^C lxxx fyve yeiris: that is to say, thrie chalderis beir, nyne bollis meill, sevin bollis quheit out of the superplus of Hadingtoun assumit upoun the kirk of Craill; sex chalder aittis out of the superplus of the bischoprik of Sanctandrois, fyve chalder and thrie bollis thairof assumit upoun Byrehill, and thrittene bollis upoun Kilrynnie; four chalderis beir out of the superplus of Dunkeld assumit upoun the kirk of Cargill; quhilk wictuall pertenit and was disponit of befoir to the said James Meldrum of Segy and now pertenis to our soverane lord and at our dispositioun be the simple dimissioun maid of the titill and rycht thairof in favouris of the saidis Johnne and James Meldrum, his sonis foirsaidis, with power to thame, thair factouris and servitouris in thair names, to intromet with and uptak the said wictuall and dispone thairupoun at thair plesure, and, gif neid beis, to call and persew thairfoir as accordis of the law, with all and sindrie commoditeis, fredomes etc., frelie, quietlie etc., but ony revocatioun; payand thairfoir yeirlie the said James and Johnne the sowme of fourtie pund to our collectour generall, present and for the tyme, at twa termes in the yeir, Witsounday and Martimes in winter, be equall portionis; commanding yow, the lordis of our counsall, sessioun and chakkar, to grant and direct sic lyk lettres for ansering and obeying of thame of the said victuall during the space foirsaid as thair said fader had of befoir be vertew of his said gift, dischairging alsua our collectour generall, present and to cum, and his depuitis, of all intromissioun thairwith during the space abonespecifeit; gevin under our privie seill at Striviling, the xiiij day of September the yeir of God j^M v^C fourscoir fyve yeiris, and of our regnne the nyntene yeir; and decernis and declairis the said lettre of tak and assedatioun to haif fuill strenth, force and effect in all tyme cuming, during the yeiris and termes contenit thairintill, swa that the said Johnne and James Meldrumis may peceable bruik and joyse the commoditeis, proffeittis and dewateis contenit in the said tak during the space specifeit thairintill without ony impediment.