[1585/12/60]¹

Ane act in favour of the servandis of the Erll of Mar and Maister of Glammis

Oure soverane lord, understanding that be his hienes actis, maid be the advise of the thrie estaitis in this present parliament, thay have abolissit thair remembrance past of quhatsumevir offences done be his hienes nobilitie and speciallie be Johnne, erll of Mar, and Maister of Glammis, thair kyn, freindis and servandis heirtofoir, and to restoir and reposses thame in thair landis, leveingis, rowmes and possessiounis, fra the quhilk thay have bene debarrit and dispossessit be occasioun of civill trublis within this realme sen our said soverane lordis coronatioun, and seing thair hes bene greit nowmer of the said Erll of Maris dependaris and freindis quha last eftir thair exile and banesement war challancit and persewit maist rigoruslie for juning and assisting with thame in thair commoun interpryses, quhairof sum being put to the tryell of ane assyise, sum fast in prissoun and utheris ejectit furth of thair kyndlie rowmes and possessiounis for thair service, wer inducit of werry necessitie to renunce and overgife thair landis, rowmes and possessionis to sic as wes thair grittest enimeis and procurit thame to be persewit of thair lyves, to the effect thay mycht obtene thair leveingis, and becaus mony hes bene inducit upoun the apperand perrell of thair lyves to dispone thair rowmes and possessiounis and to renunce thair heretable rychtis and titillis to sic as now possesses thame, and that upoun titillis onerous and sowmes of money althocht thair was na sowme debursit nor payit thairfoir, bot gentill men constranit up confessis the same to strenth thair securitie, thairfoir, our said soverane lord, with advise of the thrie estaitis of this present parliament, statutis and ordanis that all and quhatsumevir personis that hes bene challencit and persewit for the service of the said erll and maister of Glammes to be reponit, restorit and integrat and, be the tennour heirof, reponis, restoris and redintegratis thame and ilkane of thame in the same rycht and titill thai had to thair leveingis befoir the saidis erll and lordis departing furth of this realme, notwithstanding of quhatsumevir transactionis and appointmentis thay wer forcit to mak to thair greit hurte for necessitie of the tyme, provyding alwayis that they salbe haldin to deburse and redeliver befoir thay obtene the possessioun² sic sowmes of money as thay haif ressavit, or as may be provin numerat be the donatouris of thame leveand or ony utheris, obteinaris of the same, and alswa provyding that this present act and ordinance on nawayis be prejudiciall to William Keyth, servitour to the kingis majestie, nor to Mathow Stewart of Mynto, knycht, anent thair rychtis of the landis and heretaigis perteining to William Cunynghame, sone to the laird of Drumquhassill.