[1585/12/58]¹

Ane act in favour of the Maister of Glamis

²Oure soverane lord and thrie estaitis of this present parliament willis and grantis and, for his hienes and successouris, perpetuallie decernis and ordanis that Thomas, maister of Glammis, is and salbe speciallie contenit and comprehendit in the generall act of restitutioun presentlie maid, and that all and quhatsumevir clausis, heidis, poyntis and articlis thairof sall be extendit in favour of him, his airis, successouris and posteritie and sall be to thame als sufficient in all respectis for the suirtie of thame, thair landis, lyff and guidis as gif he war speciallie nominat thairin, or as gif the haill heidis, poyntis and articlis of the said generall restitutioun and abbolitioun war speciallie heirin expressit. And forder, our soverane lord, in presens of his hienes estaitis of parliament, hes maid plane declaratioun that quhatevir laitlie fell oute be ony interpryse of the said Maister Thomas, that was only be occasioun of particular dissentioun betuix him and sum utheris of his hienes leigis, quhilk his henes knawis perfytlie never to haif tendit ather to the danger of his hienes maist noble persoun nor yit to the imparing of his honour and estait, quhairof his hienes, be his dewtifull behaviour, hes had sic guid pruif as he hes found the said Maister Thomas evir to have bene and to be his faithfull and trew subject.