[1585/12/54]¹

Ratificatioun of the capitanrie of the castell of Dunbartane to my lord Hammiltoun

²Oure soverane lord, with advise of the thrie estaitis of this present parliament, ratifeis and apprevis the gift maid and grantit be his hienes to his rycht traist cousing Johnne, lord Hammyltoun, of his majesteis castell of Dunbartane, with all munitioun and ordinance thairin, quhairof the tennour followis:

James, be the grace of God, king of Scottis, to the lordis of our counsall and sessioun and all utheris, our leigis and subdittis quhome it effeiris, quhais knawlege thir our lettres sall cum, greting. Wit ye us to have maid, constituit and ordanit and, be thir our lettres, makis, consitutis and ordanis our rycht, traist cousing and counsallour Johnne, lord Hammyltoun, capitane of our castell of Dunbartane, and giffis him the chairge and office thairof off all and sindrie feis, dewateis and casualeteis annexit, assignit or pertening thairto, and in speciall the rentis and levingis annext of auld to the keiping thairof, togidder with the sowme of fyve hundreth and fiftie markis augmentit and assignit thairto furth of the superplus of benefices within our realme, to be payit to him yeirlie be our collectour generall, his deputis and officiaris at the termis of payment usit and wount, beginnand his first payment at this instant yeir of God j^M v^C fourscoir fyve yeiris, and swa furth yeirlie induring his said charge and office, commanding our said collectour generall and his forsaidis to anser, obey and mak thankfull payment to the said Johnne, lord Hammyltoun, capitane forsaid, of the said sowme of the riddiest of thair intromissioun this present yeir and yeirlie in tyme cuming during his said office, to be thankfullie allowit to thame in thair comptis be the auditouris thairof, quhome we command to desease and allow to thame yeirlie, thir our lettres being anis schawin upoun compt and registrat in our rollis as effeiris; with power to our said rycht traist cousing and counsalour to use and exerce the said office, bruik and injoye the saidis feis, dewateis and casualiteis pertening thairto, siclyk and als frelie as ony uther capitane did or mycht have done be vertew of the said charge and office; quhairfoir we charge straitlie and commandis yow, the saidis lordis of our counsall and sessioun, that ye grant and direct our uthers lettres at the instance of our said capitane for ansering and obeying him of the saidis rentis and mony forsaidis of this instant yeir and yeirlie heireftir induring his said charge in forme as effeiris, gevin under our previe seill at Lynlythgw, the xxiiij day of December the yeir of God j^M v^C fourscoir fyve yeiris, and of our regnne the nyntene yeir.