[1585/12/39]¹

Act for repossessioun of ministaris and maisteris of collegis and scuilis

²Oure soverane lord, with advise and consent of his thre estaitis convenit in this present parliament, will and grantis and, for his hienes and his successouris, decernis and ordanis that all ministeris, maistiris of collegis and skuillis quhilkis departit furth of this realme at ony tyme within the space of thrie yeiris bipast salbe restorit and repossessit to ther benefices, landis, levingis, offices and posessionis and to thair guidis and debtis extant, to be bruikit, josit and occupiet be thame as befoir the trubillis intervenit, notwithstanding ony actis or proces led or maid aganis thame or dispositionis maid of that quhilk pertenit to thame of befoir, quhilkis his hienes willis and commandis to hawe na force to thair hinder or prejudice; and ordanis lettres to be direct for thair repossessioun in like maner as ar grantit for the noblemen and utheris, his hienes subjectis, laitlie ressavit to his majesties favour and obedience, providing that the rentis of the saidis collegis yit extant in the tennentis handis and on intromettit with befoir the last feist of Martimes during the said space, be disponit fruitfullie ad pios usus and the commoditie of the said collegis, be the sicht and advise of the lordis of his hienes chekker; and ordanis lettres to be directit heirupoun, if neid beis, in forme as effeiris.