[1585/12/13]¹

Ane act anent the alteratioun of the tymes of sitting of the college of justice

²Oure soverane lord, considering that for the better wynning of the cornis in the harvest seasoun thair is a greit vacance of the sittin of the sessioun and college of justice fra the last day of Julii to the xij day of November, and sindrie utheris particular vacances appointit in the tyme of superstitioun for feisting, and now, considering that the intermissioun of the sitting of the sessioun at sic tymes is monywayis unproffitable and neidles, and that it is na less convenient to haif sumtyme of vacance at the tymes of the sawing as of the scheiring, thairfoir our soverane lord, with advise of the thrie estaitis convenit in this present parliament, statutis and ordanis that the sessioun and college of justice in tyme cuming sall begin thair sitting, calling and administratioun of justice efter the greit vacance of hervest upoun the first day of November yeirlie, and sall sit thereftir everie day (the Sondayes exceptit) quhill the first day of Marche, and that the haill monethe of Marche salbe vacance for the ait seid; thaireftir the sessioun to convene and sit during the haill moneth of Aprile, the Sondayes exceptit, and at the end thairof, to ryise and vacance to be for the beir seid during the moneth of Maii; and thaireftir, to convene and sit agane continewallie, the Sondayes except, fra the last day of Maii quhill the fyftene day of August, dispensand with all utheris tymes and diettis appointit in tyme bigane be the institutioun of the college of justice or quhatsumevir uthir actis heirtofoir maid.