[1584/5/34]¹

Approbatioun of the lait cunyie of allayit money

Forsamekle as efter guid consideratioun had be the kingis majestie, his nobilitie and estatis assemblit in the moneth of December, the yeir of God j^M v^C lxxxiij yeris, of the great skaith and inconvenient quhilk his hienes and the commoun weill sustenit throw diversitie of pryces of sylver of syndrie peceis of allayit money current amang his liegeis, be reasoun quhairof ane great quantitie of the same, and namelie of the tuelf pennie peceis, babeis and auld plakis, is found now to be decayit and wanting, previe personis frustrating his majestie of his richt and proffite (being ane of the speciall partis of the rentis and casualities pertening to the croun) in the unlawing, transporting, breking downe and fyning of the foirnamit kyndis of allayit money, alsweill furth of the realme as within the samyn; for remede quhairof, they have ordinit and concludit that all the tuelff pennie peceis, babeis and plakis, with the thrie pennie grottis and half plakis now current, suld be brocht in to the cunyey hous (not being fals and counterfitt) and brokin downe with all guidlie diligence, and thairof new money to be cunyeit of thrie pennie fyne in grottis at aucht penneis the pece, and halff grottis for four penneis, with twa granis of remede of fynes, alsweill abone as under; and that thair be ane hundreth threttie fyve of the saidis aucht pennie grottis or tua hundreth thriescoir and ten of four penny grottis in the merk wecht of the said money, with allowance of viij of the said viij d. grottis or sextene of the four penny grottis for remeid of wecht, alsweill havie as licht, upoun everie merk wecht of the said money passand the irnis, as the act maid thairupoun of the dait the [...] day of the moneth of December, the yeir abonewrittin and proclamatioun past thairupoun at lenth beris; of the quhilkis peceis ordinit to be cunyeit be the said act, wecht and fynes thairof thair hes bene sufficient pruiff and tryall takin and the assay thairof is extant in the handis of his majesties advocatt, being alreadie tryit and found guid, sua that the samyn correspondis in wecht and fynes to the tennour of the said act; in consideratioun quahirof, and that the samyn hes bene tryit and foundin guid as said is, our soverane lord and his thrie estatis in this present parliament ratifeis and apprevis the act foirsaid efter the forme and tennour thairof in all pointis.