The Records of the Parliaments of Scotland to 1707, K.M. Brown et al eds (St Andrews, 2007-2024), date accessed: 28 March 2024
[1584/5/31]1
Act for annexatioun of foirfaltit landis and rentis to the croun
The kingis majestie and his thrie estatis assemblit in this present parliament, considering the daylie incresce of the chargeis and expense of his hienes hous and the diminutioun of the rentis of his majesties proprietie, quhairon his said hous aucht to be intertenyit, hes thairfoir thocht convenient, statute and ordinit that the landis, lordshipis, baroneis and utheris rentis alreadie fallin, or how sone the same sall happin to fall and becum in his hienes handis be vertew of the eschaet throw the process and domis of foirfalture ordourlie led and deduceit aganis the personis found, or that heirefter sall happin to be found, culpable of the lait maist treasounable rebellioun and conspiracie attemptat and interprysit aganis his hienes persoun and estate, salbe annext unto his majesties croun, and presentlie, now as then and then as now, annexis the same thairto, followand the guid exemple of his predicessouris for the honorable support of his estate; and the saidis landis, lordshippis, baroneis and utheris rentis heirefter specifeit to remane perpetuallie with the croun may nather be gevin away in fie, franktenement in pensioun or ony uther disposition to ony persoun of quhat estate or degrie that ever they be of, without avise, decreit or deliverance of the haill parliament and, for great reasounable cause concerning the weilfair of the realme, first to be advisit and digestlie considerit be the haill estatis, and that alwayis sic infeftmentis as sall happin to be maid or grantit be his hienes of ony of the saidis landis and lordshippis salbe onlie in fewferme, for pament of sic yeirlie fewferme as his hienes and his counsell sall think reasounable, with the haill canis, customis and small dewties aucht and wont to be pait be the present tennentis and occupiaris to the proprietaris thairoff, for the better furnessing and sustentatioun of his hous; and albeit it sall happin oure soverane lord that now is, or ony of his successouris, kingis of Scotland, to annalie or dispone the saidis lordshippis, landis, castellis, townis, donationis and advocatioun of kirkis and hospitallis, with the pertinentis annext to the croun, as said is, utherwayis that the same alienationis and dispositionis sall be of nane availl, bot it salbe lefull to his hienes and his successouris to receave the same landis and rentis to thair awin hous quhairever it lykis thame, without ony proces off law, and the takis to refound and pay all proffittis that they have takin up agane to his hienes and his successouris use for all the tyme that they have had thame, with sic uther restrictionis as ar contenit in the actis of parliament maid be his maist noble predicessouris, kingis of Scotland, in thair annexationis to the croun.
- NAS, PA2/12, f.124v.