The Records of the Parliaments of Scotland to 1707, K.M. Brown et al eds (St Andrews, 2007-2024), date accessed: 28 March 2024
[1584/5/30]1
2Ane act anent the arreisting, intromissioun and sequestratioun of the eschaet guidis and debtis of the rebellis befoir they be convict or put to the horn
Forsamekle as be act of parliament it is providit that gif ony persoun or personis beis slanderit or suspect of treasoun, they salbe tane and remane in firmance and thair guidis under suir borrowis quhill the tyme they have tholit ane assise quhidder they be quyt or foull; and trew it is and of veritie that Archibald, erll of Angus, Johnne, erll of Mar, Maister Thomas Lyoun of Baldukie, maister of Glammes, with thair complices, quhilk laitlie tuik and detenit his hienes burgh and castell of Striveling, rasand oppin weir aganis his hienes and his auctoritie, ar sensyne pairtlie fled and remanis out of this realme and pairtlie remanis hid and coverit within the same, unapprehendit as yit; quhilkis having committit sa great and heiche treasounis as to be persewit and punissit thairfoir according to the lawis, bot becaus of the present difficultie to apprehend thair personis and that it is requisit that sic as ar out of the realme suld be sumound on thrie scoir dayis and sic as ar within upoun fourtie dayis warning to his hienes parliament to heir and sie thame decernit to have incurrit the crime of treasoun and lesemajestie, and thairfoir thair guidis, movable and unmovable, alsweill landis, benefices and offices as utheris thingis belangand to tham, to be confiscat to our soverane lord and thair personis to underly the panis of treasoun and last punisment appointit be the lawis of this realme; and they and thair freindis and favoraris in the meantyme sellis, annaleis, disponis, cancellis and puttis away thair guidis, geir and debtis, and gevis acquittancis and dischargeis to thair dettouris in manifest defraud of our soverane lord anent thair eschaetis, sua that litill or na thing thairof salbe left to cum to his hienes use and behalff gif the intromissioun of the samyn be left quhill they be convict or put to the horne for the said treasounable crymis; thairfoir our said soverane lord, with avise of his thrie estatis, hes statute and ordinit that all the guddis, gear and debtis, maillis, fermis, rentis, proffittis and dewties of landis and benefices pertending to the saidis personis, rebellis and conspiratouris and thair complices delaitit and suspectit as culpable of the said treasounable attemptatis, alsweill being outwith as within the realme, with the maillis, fermis, proffittis and dewties of thair landis, levingis, benefices, rentis and possessionis quhatsumevir of the terme of Witsounday nixtocum and siclike in tyme cumming, quhill farder ordour be takin, and the restis of all yeiris and termis preceding, salbe arreistit, uptakin and intromettit with be his hienes thesaurare, his deputtis and officiaris to be directit to that effect havand his power and commissioun, and that the same sall remane sequestrat in the handis of the said lord thesaurair ay and quhill the saidis personis culpable and suspect salbe tryit quite or fowll of the saidis treasounable crymis; with power alsua to the said lord thesaurare, be him selff and his saidis deputis and officiaris, to caus sell and mak pennie of sic of the eschaet guidis as can not be keipit without skaith or tynsell, and to caus charge, call and persew, poynd and distrenyie for the saidis debtis and maillis, fermis, proffitis and dewties of the landis, levingis, benefices, rentis and possessionis foirsaid of the said terme of Witsounday nixtocum and restis of the yeris and termis preceding, that he may be redelie answerit, obeyit and pait thairof, to remane sequestrat in his handis as said is quhill efter the said tryall, that incace the saidis personis salbe quyt of the saidis crymis thair awin guidis and geir or the availl thairof may be randerit and deliverit agane to thame, or utherwayis gif they be convict as fowll, that the saidis eschaet guidis intromettit with may be applyit to our soverane lordis use and maid compt of in his chekker, providing that na guidis, debtis nor rentis salbe intromettit with be the said thesaurare, his deputtis or officiaris belanging to ony personis that being chargeit, enteris and comperis personallie quhill first they be convict and proces ordourlie led aganis thame.
- NAS, PA2/12, ff.124r-v.
- Cross beside title.