[1581/10/131]¹

The benefite of pacificatioun grantit to Patrik Thomesoun

Oure soverane lord of his speciall grace, with advise of the thrie estatis of this present parliament, and upoun wechtie and guid considerationis tending to the establissing of peax and quietnes and universall obedience of his hienes aucthoritie within this realme, hes gevin and grantit and, be the tennour heirof, gevis and grantis to Patrik Thomesoun, ypothecar, burges of Edinburgh, the like favoure, grace and benefite of pacificatioun sua that he may bruik and injoy the like privilege and conditionis as ar contenit in the pacificatioun maid and accordit upoun at Perth, the xxiij day of Februar, the yeir of God j^M v^C lxxij yeris, and ratefeit and apprevit sensyne in his hienes parliament haldin at Edinburgh in Aprill, the yeir of God j^M v^C lxxiij yeiris, and declaris the same pacificatioun to be als largelie and favorablie extendit and interprete in favouris of the said Patrik, for the suirtie of him, his lyf and bruking of his landis and guddis etc. as gif he had bene speciallie nominat and comprehendit thairin, or as gif the haill articles, clausis and conditionis of the samyn pacificatioun wer heirin speciallie expressit. And for his better securitie, our said soverane lord, with avise foirsaid, hes ratefeit and apprevit and, be the tennour heiroff, ratefeis and apprevis the foirsaid pacificatioun gevin and grantit to the said Patrik Thonsoun in maner abonewrittin, in all pointis, efter the forme and tennour thairof, and declaris the samyn to have full strenthe, force and effect in tyme cumming and extendis the samyn pacificatioun to him in all respectis as the samyn is extendit to ony uther persoun of befoir, obtenare of the like, providing alwayis that the samyn extend not to the murthouris of our soverane lord and tua regentis the Erllis of Murray and Lennox, nor to the crymis of wichecraft and incest, bot be thir presentis speciallie and expreslie exceptis the samyn. And forder, our said soverane lord, with advise foirsaid, decernis and declaris that, notwithstanding of the said benefite of pacificatioun grantit and presentlie confermit be his hienes to the said Patrik, yit the samyn sall tak na forder effect nor executioun for entering or repossessing of the said Patrik to the hous and tenement of land liand within the burgh of Edinburgh quhilk pertenit to his umquhill fader and now possessit be Jonet Adamesoun, relict of umquhill Maister James M^cGill of Rankelour Nethir, clerk of register, nor salbe contenit in the decreit arbitrall to be pronunceit thairanent be James Adamesoun, James Ross and Alexander Wduart, burgesis of Edinburgh, chosin for the pairt of the said Jonet and Maister James MackGill, now of Rankelour Nethir, his sone, and Robert Ker, youngar, Henrie Chartour, burges of the said burgh, and Maister Johne Kene, writter, chosin for the part of the said Patrik, and of Schir Robert Malvill of Murdocarny, knycht, as odman and ourisman to quhom it is presentlie submittit. And to the effect the said decreit salbe pronunceit and that baith the parteis may be the mair diligent to caus thair arbitratouris convene to that effect upoun the awcht day of December nixtocum in the kirk of Edinburgh, it is statute and ordinit that gif the defalt of the convening of the saidis arbitratouris be in defalt of the said Patrik, he sall tyne the benefite of the foirsaid pacificatioun sa far, as it may be extendit to his restitutioun to the said tenement; and incace it be in defalt of the saidis Jonet and Maister James, hir sone, in that cace the said Patrikis restitutioun salbe full and absolute in his favour without respect of thair satisfactioun; and ordinis lettres to be direct heirupoun, gif neid beis, in forme as effeiris.