[1581/10/122]¹

The benefite of pacificatioun grantit to Johne Flemyng of Boghall

Oure soverane lord, of his speciall grace, with avise and consent of the thrie estatis of this present parliament, and upoun wechtie and guid considerationis tending to the establissing of peax and quietnes and to the universall obedience of his hienes auctoritie within this realme, hes gevin and grantit and, be the tennour heirof, gevis and grantis to Johne Flemyng of Boghall the lyke favour, grace and benefite of pacificatioun sua that he may bruik and enjoy the privilegeis and conditionis that ar contenit in the pacificatioun maid and accordit upoun at the burgh of Perth, the xxiij day of Februar the yeir of God j^M v^C lxxij yeiris, and declaris the samyn pacificatioun to be als largelie and favourablie extendit and interprete in favouris of the said Johne Flemyng for the suirtie of him, his lyf, landis and heretageis and possessionis, or as gif he had bene speciallie nominat and comprehendit in the said pacificatioun, or as gif the haill articles, clausis and conditionis of the said pacificatioun wer heirin expreslie specefeit. And for his better securitie, oure said soverane lord, with advise foirsaid, hes ratefeit, apprevit and, by the tennour heirof, ratefeis and apprevis the foirsaid pacificatioun gevin and grantit to the foirsaid Johne Flemyng of Boghall in maner abonewrittin, in all pointis, efter the forme and tennour thairof, and declaris the samyn to have full strenthe, force and effect in tyme cumming and extendis the samyn pacificatioun to him in all sortis, as the samyn is extendit to ony uther persoun of befoir obtenar of the like, providing alwayis that the samyn extend not to the murthouris of our soverane lordis father and tua regentis, nor the crymis of wichecraft and incest, bot be thir presentis speciallie and expreslie forbiddis the samyn, and ordinis the lordis of counsell to direct lettres heirupoun, gif neid beis, in forme as effeiris.