[1581/10/120]¹

Ratificatioun of the benefits of pacificatioun grantit to Alexander, lord Home

Oure soverane lord, with avise and consent of the thrie estatis of this present parliament, ratefeis, apprevis and confermis the act of pacificatioun under writtin, maid, gevin and grantit to Alexander, lord Home, sone lawfull and air apperant to umquhile Alexander, lord Home, that last decessit, of the quhilk the tennour followis:

In the parliament haldin at the castell of Striveling, within the great hall thairof, upoun the xxv day of Julii, the yeir of God j^M v^C lxxviij yeris, oure soverane lord, with advise and consent of the thrie estatis of this present parliament, for diverse considerationis moving thame tending to the quietnes of this realme, have gevin and grantit and, be the tennour of this present act, gevis and grantis to Alexander, lord Home, sone lawfull and apperant air to umquhill Alexander, lord Home, quha last decessit, the elyk favour, grace and the benefite of pacificatioun maid at Perthe upoun the xxiij day of Februare, the yeir of God j^M v^C lxxij yeiris, and ratefeit and apprevit in his hienes parliament haldin at Edinburgh in the moneth of Aprill nixt thairefter in the yeir of God j^M v^C lxxiij yeris, and willis the samyn be als amplie extendit in his favouris in all respectis, conditionis, clause and circumstanceis thairof as the said umquhill Alexander, lord Home, had bene expreslie comprehendit and contenit thairintill. As alsua his hienes, with avise foirsaid, willis and grantis that the said pacificatioun be maist amplie interprete and extendit to him in all clausis thairof as said is, and speciallie that this present act of parliament, according to the said pacificatioun, be sufficient to rescind and retrait, likas oure said soverane lord and estatis foirsaidis, be thir presentis, retractis and rescindis the proces of foirfalture led aganis the said umquhill Alexander, lord Home, for certane crymis and treasoun and lesemajestie committit be him, and to restoir and redintegrat as his hienes, with avise foirsaid, restoris and redintegratis the said Alexander, lord Home, sone and apparent air foirsaid, aganis the samyn, siclyke and als frelie in all respectis as gif the said proces of foirfalture had nevir bene led and dome of foirfalture had nevir bene gevin, efter the forme and tennour of the said pacificatioun, quhilk, and everie claus thairof, is heirin haldin pro expresso, and ordinis this present act to be extendit in competent and dew form as effeiris, restoring fullelie the memorie, honour and fame of the said umquhile Alexander Home in the persoun of the said Alexander Home, his sone and air apperant, lyke as our soverane lord and thrie estatis of parliament rehabilitatis and restoris the said Alexander thairto, and findis and declaris him hable to enter and succeid as air of the said umquhill Alexander, lord Home, be brevis of our soverane lordis chapell and utherwayis, to all landis, heretageis, possessionis, rowmis, takis, offices and utheris to the quhilkis the said umquhill Alexander, lord Home, had richt, notwithstanding the said proces of foirfalture or ony uther thing following thairupoun, providing alwayis that oure soverane lord be on nawayis prejugeit of the waird and mariage of the said Alexander, nor of the haill proffitis and comoditeis thairof, and siclike that all the provisionis of benefices, personageis, vicareis, chaiplanreis and prebendareis pertening to the said Lord Homis presentatioun and providit be our soverane lord and regent to quhatsumevir personis sen the leding of the said foirfalture of the said umquhile Alexander, lord Home, stand to the present possessouris thairof in full forme, force, strenth and effect; notwithstanding this present restitutioun and benefite, providing alwayis that incace the said umquhill lordis father be culpable of the murthouris of our soverane lordis umquhill fader and tua regentis that than and in that cace the benefit of this present act and restitutioun, now as than and than as now, to have bene of nane availl, force nor effect in all pointis, clausis and articles specefeit thairintill, efter the forme and tennour thairof (exceptand that pairt and claus thairof berand this provisioun: that all the provisionis of benefices, personageis, vicareis, chaiplanreis and prebendareis pertening to the said Lord Homis presentatioun and providit be our soverane lord and his hienes regent to quhatsmuevir personis sen the leading of the said foirfalture of the said umquhile Alexander, lord Home, stand to the present possessouris thairof in full forme, force and effect, notwithstanding the said restitutioun and benefite), quhilk claus our said soverane lord, with avise of his saidis thrie estatis of this present parliament, decernis and declaris to be secludit and not to be comprehendit in the said ratificatioun abone expremit, siclike and in the samyn maner as gif the samyn wer left out thairof, sua that the said Alexander, now lord Home, may bruik and jois and off new grant, gif and dispone all provisionis of benefices, personageis, vicaregeis, chaiplanreis and prebendareis pertening to his said umquhile fatheris presentatioun and providit be oure said soverane lord and his regent to quhatsumevir personis sen the leading of the said foirfalture upoun the said umquhile Alexander, lord Home, notwithstanding the said claus and provisioun contenit in the said ratificatioun of the dait abonewrittin, siclike and in the samyn maner as the said provisioun had not bene contenit thairintill.