[1578/7/28]¹

The pacificatioun of Alexander Hepburne of Quhitsum

Oure soverane lord, with avise and consent of the thrie estaitis of parliament, for gude consideratiounis moving his hienes tending to the quietnes of his realme and of the speciall grace and favour, hes gevin and grantit and, be the tennour of this present act, with avise and consent foirsaid, geves and grantis to Alexander Hepburne of Quhitsum, knicht, the elyk grace, benefice and favour as is contenit in the pacificatioun maid at Perth, the xxiij day of Februar, the yeir of God j^M v^C lxxij yeiris, betuix his hienes commissionaris on that ane pairte, umquhile George, erll of Huntlie, Johne, commendatar of Aberbrothok, Claud, commendatar of Paislay and certane utheris, and ratefiit and apprevit in his hienes parliament haldin at Edinburgh, the [...] day of Aprile, the yeir of God j^M v^C lxxiij yeiris; and that the said pacificatioun and approbatioun thairof in parliament be als largelie extendit in favouris of the said Alexander, his airis and successouris, for saiftie of thair landis, lyffis and guidis as gif the said Alexander wer speciallie apprehendit and contenit thairin, notwithstanding the pretendit proces and dome of foirfaltour led and gevin aganis the said Alexander in the moneth of [...] the yeir of God j^M v^C lxvij yeiris, for certane crymes of tressone and lesemajestie committit be him as at mair lenth is contenit in the samin; quhilk proces and dome of foirfaltour, with all that followit thairupoun, oure said soverane lord and thrie estaitis of parliament rescindis, retreittis, cassis, annullis, restoris, redintegratis the said Sir Alexander fullelie aganis the samyn to his honour, fame and dignetie siclyk and alsfrelie as he wes in all respectis befoir the leding of the said proces; and decernis and declaris this present pacificatioun now grantit to the said Alexander to be als valide and sufficient in the selff in all tymes heirefter for reponing of him to his full richt, of his landis and estait of his persone as gif the said sentence of foirfaltour had bene reducit be ane speciall summondis, all parteis haiffand entres being speciallie callit thairto; and declaris alsua the said proces of foirfaltour of nane availl in all tymes cuming in sa far as the samin may be extendit in the said Alexanderis contrair, and that thir presentis be extendit in ample and dew forme as effeiris, providing that incaice the said Alexander be fund culpable of the slawchteris of umquhile our soverane lordis fader and his twa regentis that than and in that caice the benefite of this present act and restitutioun, than as now and now as than, to have bene and to be of nane availl, force nor effect.