[A1382/6/1]*[print] [email] [cite] [preceding] [following]
Johannes illustris principis domini nostri regis Scotie primogenitus, comes de Carryk ac senescallus Scotie, universis ad quos presentes littere nostre pervenerint, et precipue domino terrarum de Fermartyne qui pro tempore fuerit ac ipsius ballivis, maris, firmarum receptoribus et ministris suis aliis, necnon ipsarum terrarum husbandis et incolis quibuscunque qui nunc terras ipsas incolunt et incolent in futurum, cuiuscunque status vel conditionis existant, salutem. Notum vobis facimus quod in generali consilio dicti domini nostri regis nostri genitoris tento apud Perth' sexto die mensis Junii ultimo preterito, in presencia ipsius domini nostri genitoris et nostra, presentibus pluribus ex majoribus prelatis, magnatibus et baronibus regni, et inter alios, dilecto consanguineo nostro domino Jacobo de Lyndesay milite, cui nos antea terras ipsas de Fermartyne donavimus, reverendus in Christo pater dominus Adam Dei gracia episcopus Aberdonensis graviter est conquestus quod husbandi seu incole ipsarum terrarum de Fermartyne non satisfecerunt sibi et ecclesie sue Aberdonensis debite de secundis decimis sibi et ecclesie sue debite de firmis terrarum ipsarum prout suis predecessoribus episcopis Aberdonensis respondere et satisfacere consueverunt et tenentur, sed eas solvere distulerunt et differunt excusantes se per nostras litteras et per mandatum domini Jacobi antedicti, censuram ecclesiasticam propter hoc in ipsos per dictum dominum episcopum promulgatam categorice indurati animo contempnentes, plus humanam quam divinam timentes offendere potestatem. Idemque dominus noster rex ibidem, ex deliberatione dicti consilii declaravit, quod intentionis sue non fuit sicut nec esse debuit quod per donationem per ipsum nobis factam de predictis terris de Fermartyn nec occasione ipsius jus ecclesie Aberdonensis vel episcoporum Aberdonensis qui pro tempore fuerint lederetur vel diminueretur in aliquo in solutione dictarum secundarum decimarum. Et nos eciam ibidem declaravimus quod, in donatione per nos facta dicto domino Jacobo de ipsis terris, intelleximus jus ecclesie Aberdonensis et episcoporum Aberdonensis qui pro tempore fuerint quo ad solutionem dictarum secundarum decimarum fuisse et esse exceptum. Et tam dictus dominus noster rex quam nos declaravimus ibidem quod occasione alicuius donationis per ipsum vel nos facte ipse, secunde decime non detinerentur ab aliquo nec cessaretur a solutione earundem, sed quod husbandi et incole distringerentur ad solutionem earundem sicut in litteris domini nostri regis super hoc confectis et magno sigillo suo sigillatis plenius continetur. Vobis igitur et vestrum cuilibet quantum possumus districtius et sub omni pena quam contra nos amittere poteritis seu aliquis vestrum amittere poterit precipimus et mandamus quatinus vos et vestrum quilibet quantum ad vos et vestrum quemlibet pertinet dicto domino episcopo et ministris suis de dictis secundis decimis debitis de ipsis terris de Fermartyne de terminis iam transactis post adventum dicti domini episcopi ad partes Scotie satisfaciatis eidem, et decetero in singulis terminis futuris respondeatis et satisfaciatis eidem absque dilatione, excusatione vel contradictione quacunque. Non obstantibus quibuscunque litteris nostris sub quacunque forma verborum inpetratis in contrarium vel impetrandis, seu mandato contrario ipsius domini Jacobi, vel alterius cuiuscunque aut inventione plegii, cum talis inventio plegii executionem mandati regii seu decreti ex deliberatione sui consilii impedire non debeat nec differre. Et nichilominus si dictus dominus episcopus per censuram ecclesiasticam contra non solventes procedat sustinebimus patienter. In premissorum testimonium has litteras nostras sigillo nostro sigillatas penes dictum dominum epicopum et ecclesiam suam Aberdonensis remansuras et vobis cum oportuerit o[ste]ndendas fieri fecimus patentes. Dat' apud Edynburgh' octavo die mensis Januarii anno Domini millesimo CCCmo octogesimo secundo.