[1621/6/59]*[print] [email] [cite] [preceding] [following]
Oure soverane lord and estaittis of this present parliament, understanding that be ane speciall act maid in his hienes parliament haldin at Peirthe in the moneth of Julii, the yeir of God jM vjC and sex yeiris, and for the causes thairin specifit, his majestie and estaittis of the said parliament dissolvit the landis and rentis of the temporalitie of the abbacie of Jedburghe and cell or pryourie of Cannabie annexit thairto fra the actis of annexatioun thairoff to his majesties croun and fra all uther actis of annexatioune thairoff quhatsumevir, to the effect the samen micht be disponit heretablie to umquhile Alexander, earle of Home, lord Dunglas, his aires maill and assigneyis thairin specifit, as in the said act of parliament at mair lenth is conteanit; lyik as the said umquhile Alexander, erle of Home, being lauchfullie prowydit to the spiritualitie of the saidis benefices with the kirkes, teyndis and utheris pertening thairto, maid dew and lauchfull resignatioun and dimissioun of the samene in the handis of his majestie, to the effect that his majestie might geve, grant and dispone the samen to the said umquhile Alexander, erle of Home, his airis maill and assigneyis heretablie, as the provisioun made to the said umquhile Alexander, erle of Home of the spiritualitie of the saidis benefices, procuratorie of dimissioun of the samen maid be him and ane instrument of dimissioun following thairupoun at mair lenth proportis. Upone the quhilk act of parliament and dimissioun, the said umquhile Alexander, erle of Home wes dewlie and heretablie infeft and seasit in the haill landis, teindis and utheris quhilkis pertenit of old to the saidis benefices, temporalitie and spiritualitie thairoff, be vertew and conforme to ane chartoure maid and grantit be his majestie under his hieghnes gryit seale to the said umquhile Alexander, erle of Home thairanent, off the date the tuentie day off Merche, the yeir of God jM vjC and ten yearis, as the samyne chartour, precept and instrument of seasing following thairupoun at mair lenth beiris. Thairfore, and for the gode, trew and thankfull service done to his majestye and his hienes maist noble progenitoures be the said umquhile Earle of Home and his predicessoures in tyme bygane, tending to the contentment of his majestie, tranquillitie and peace of this realme and weall of the liegis thairoff, oure said soverane lord and estaittis of this present parliament ratiefies and approvis the foirsaid act of dissolutioun off the landis and utheris quhilkis pertenit of auld to the temporalitie off the said abbacie of Jedburgh and cell or pryourie of Cannabie annexit thairto, the foirsaid procutorie of dimissioun maid be the foirsaid umquhile Alexander, erle of Home off the spiritualitie of the saidis benefices and instrument of resignatioune and dimissioun following thairupoun, the foirsaid chartour maid and grantit be his majestie to the said umquhile Erle of Home of the date abovewrittin, with the precept and instrument of seasing following upoun the samen, in all poyntis, articles and clauses thairin contened, with all that hes followit or may follow thairupoun in sua far allanerlie as the samyne concernis or may be extendit to the landis, teyndis and utheris quhilkis pertenit of auld to the saidis benefices off the abbacie of Jedburgh and cell or pryourie of Cannabie annexit thairto and na farder; declaring this present generall ratificatioun to be als valide, effectuall and sufficient in all respectis as giff the act of parliament, chartoure and utheris evidentis abovespecifit wer at lenth insert heirintill, anent the not inserting quhairoff his majestie and estaittis foirsaidis, be thir presentis, dispensses for evir. And farder, oure said soverane lord and estaittis of this present parliament, understanding that Schir David Home off Wodderburne, knycht, being lauchfullie prowydit to the spiritualitie off the saidis benefices of the abbacie of Jedburgh and cell or pryourie of Cannabie annexit thairto, with consent of the convent thairof, hes made ane lauchfull resignatioun and dimissioun thairof in the handis of his majestie, or gif the lordis of his hienes secreit counsell of the kingdome of Scotland, haveing his majesties full power and commissioun to ressave resignatories and dimissiounes in his majesties name to the effect that his majestie may gif, grant and dispone to his majesties right traist cousing James, now erle off Home, his airs maill and assigneyis quhatsumevir heretablie all and haill the abbacye places, clausteris, housis, biggingis, yairdis, orcheardis and all utheris lyand within the precinctis of the saidis abbacie of Jedburgh and cell or pryourie of Cannabie, and siclyik all and sindrie the teindschevis and utheris teindis, fructis, rentis, proventis, emolumentis and dewties pertening and belanging thairto sa far as concernes the spiritualitie thairof, as the provisioun maid to the said Schir David Home to the spiritualitie of the saidis benefices, procutorie of dimissioun off the samen maid be him with consent foirsaid and instrument of dimissioun following thairupoun at mair lenth proportis, thairfore oure said soverane lord and estaittis of this present parliament have of new dissolvit and, be the tennoure heirof, of new dissolvis all and sindrie the landis, baronies, castellis, toures, fortalices, maner place, housis, biggingis, yairdis, orcheartis, doucattis, milnes, multouris, woddis, fischeingis, coillis, coilheuchis, tennentis, tenandries, service of frie tennentis, feufermes, annexis, connexis, dependences, pairtis, pendicles and pertinentis quhatsumevir pertening and belonging of auld to the temporalitie of the said abbacie of Jedburgh and cell of Cannabie annexit thairto fra the said act of annexatioun made upoun the tuentie nynt day of Julii, the yeir of God jM vC fourescore sevin yeiris, annexand the temporalitie of all benefices within this realme to the patrimonie of his hienes croun; and siclyik hes off new dissolvit and, be thir presentis, off new dissolvis the saidis abbaye places, clausteris, housis, biggingis, yairdis, orcheartis and all utheris lying within the precinctis of the saidis abbacie of Jedburgh and cell or pryourie of Cannabie annexit thairto, and siclyik all and sindrie the teyndschevis, utheris teyndis, fruitis, rentis, proventis, emolumentis and dewties, alsueill of the personage as viccarage, of all and sindrie the paroches kirkes efterspecified pertening to the saidis abbacye of Jedburgh and cell or pryourie of Cannabie annexit thair to, to wit: all and sindrie the teyndschevis and utheris teyndis, personage and viccarage, of the kirkis of Jedburgh, Ekfurde, Howname, Oxnem, Hopkirk, Nisbite, Craling, Spittell and Cassiltoun, quhilkis ar kirkis of the said abbacye of Jedburgh lyand within the schirrefdome of Roxburgh, and all and sindrie the teyndschevis and utheris teyndis, personage and vicarage, of the kirkis of Wauchope and Cannabie, quhilkis ar kirkis of the said cell or pryourie of Cannabie lyand within the schirrefdome of Dumfries, fra the saidis abbacie of Jedburgh and cell or pryourie of Cannabie annexit thairto and fra the benefices thairof, quhairunto the samen pertenit of auld as the spiritualitie thairoff, to the effect that his majestie may gif, grant and dispone to the said James, erle of Home, his airis maill and assigneyis quhatsumevir heretablie all and sindrie the landis, baronies, castellis, toures, fortalices, maner places, housis, biggingis, yeardis, orcheardis, doucattis, milnes, multeris, woddis, fischeingis, coillis, coilheuchis, tennentis, tenandries, service of frie tennentis, fewfermes, annexis, connexis, dependences, pairtis, pendicles and pertinentis quhatsumevir pertening and belonging of auld to the temporalitie off the said abbacye of Jedburgh and cell of Cannabie annexit thairto, togidder with all and haill the foirsaidis abbey places, clausteris, housis, biggingis, yairdis, orcheartis and all utheris lyand within the precinctes of the saidis abbacie of Jedburgh and cell or pryourie of Cannabie annexit thairto, and siclyik with all and sindrie the foirsaidis teindscheavis, utheris teindis, fructis, rentis, proventis, emolumentis and dewties, alsueill of the personage as viccarage, of all and sindrie the paroche kirkis abovespecifiet pertening to the saidis abbay of Jedburgh and cell or pryourie of Cannabie annexit thairto, togidder with all rycht, tytill, entres and clame of richt quhilk his majestie, his predicessoures or successoures had, hes or onywayes may have or clame thairto, or ony pairt thairoff in tyme coming, and als to the effect that the samen may be erectit, unite and incorporat in ane haill and frie baronye, to be callit now and in all tyme coming the baronie of Jedburgh. Attoure, his majestie and estaittis foirsaidis, according to the tennoure of the foirsaid anteriour infeftment grantit to the said umquhile Alexander, earle of Home and of the act of parliament quhairupoun the samene proceidit, ordanis sufficient and qualifiet persounes to be nominat and presentit be his majestie and his successoures to serve the cure at the saidis kirkis and that thai, for thair stependis and honest sustentatioun, salhave thankfully payit to thame be the said James, erle of Home and his foirsaidis the yeirlie stependis underwrittin, viz: the minister serveing the cure at the said kirk of Edinburgh for the tyme sall have and ressave yeirlie for his sustentatioun aucht chalderis victuell, halff beir, halff ait meill, guid and sufficient merchandise with the haill viccarage, manse and gleib of the said kirk; the minister serveing the cure at the said kirk of Ekfurde for the tyme sall have and ressave yeirlie for his sustentatioun fyve chalderis victuell, halff beir, halff ait meill, gude and sufficient merchandise with the haill manse and gleib [...] viccarage of the said kirk; the minister serveing the cure at the kirk off Howneme for the tyme sall have and ressave yeirlie for his sustentatioun thrie chalderis victuell, halff beir, halff ait meill, gude and sufficient merchandise with the haill viccarage, manse and gleib off the samene kirk; the minister serveing the cure at the said kirk of Oxnem for the tyme salhave and ressave yeirlie for his sustentatioun thrie chalderis victuell, halff beir, halff ait meill, gude and sufficient merchandise with the haill viccarages of the said kirk of Oxnem and off the kirk off Prenderleithe, togidder with the manse and gleib off the said kirk off Oxnem; the minister serveing the cure at the said kirk of Hopkirk for the tyme sall have and ressave yearlie for his sustentatioun thrie chalderis victuell, half beir, halff ait meill, gude and sufficient merchandise, togidder with the viccarage, manse and glebe of the said kirk; the minister serveing the cure at the saidis kirkis of Nisbit, Craling and Spittell, unite be his majesties commissioneris, sall have and ressave yeirlie for his sustentatioun four chalderis victuell, halff beir, halff ait meill, gude and sufficient merchandise, togidder with the haill viccarages of the saidis kirkis and with the manse and gleib of the said kirk off Nisbite; the minister serveing the cure at the said kirk off Cassiltoun for the tyme sall have and ressave yeirlie for his sustentatioun the soume of sevin hundereth merkis usuall money of the said realme of Scotland; the minister serveing the cure at the saidis kirkis of Wauchope and Cannabie, unite togidder be the saidis lordis commissioneris, sall have and ressave yeirlie for his sustenatioune for serveing the cure at the saidis kirkis the soume of fyve hundereth merkis money abovewrittin. And lyikwayes to the effect that the saidis abbacie of Jedburgh and cell or pryourie of Cannabie annexit thairto may be suppressit and extinguischit perpetuallie in all tyme coming, and that na persoun nor persounes be prowydit thairto in na tyme heirefter, renunceand and dischargeand all right and tytill quhilkis his majestie or his successoures had, hes or may pretend in and to the monkis portiounes, thriddis, first yeiris fructis and fyft pennie of the saidis benefices be quhatsumevir rightis, actis of parliament or lawes of this realme, dischargeing his hienes collectoures present and to cum of all uplifting of the samene, revokeand, dischargeand and annulland all pensiounes disponit furthe of the thriddis off the said abbacie and cell thairof abovewrittin in any tyme bygane, and decernand the samen to be null in all tyme coming; ordaning the abbey place of Jedburgh to be the principall messuage off the said baronye for taking of seasing thairat in all tyme heirefter, and that the samen sesingis to be takin thairat sall stand and be sufficient seasingis for the abbey places, teyndis and utheris abovespecifit, with the pertinentis and for everie pairt thairoff, without anye uther speciall or particular seasing to be takin at anye uther pairt or place thairof, nochtwithstanding that the samene lyes not contigue togidder bot within severall schirefdomes and jurisdictiounes, to be haldin of oure said soverane lord and his successoures in frie blenche, fie, heretage and frie baronie for evir; payand thairfore yeirlie the said James, erle of Home, his aires maill and assigneyis foirsaidis to oure said soverane lord and his successoures the soume of tua hundereth merkis usuall money of the said realme of Scotland at the feist of Witsonday in name of blenche ferme, and siclyk payand to the ministeris present and to cum serveing the cures at the kirkis abovementionat the yeirlie stependis abovespecifit, ilk ane of thame for thair awin pairtis as is before dewydit; and als relevand the saidis ministeris of all taxatiounnes and impositiones imposit and to be imposed upone the saidis kirkis, and of the reparatiounne thairoff, and of the furnesing of the elementis of bread and wyne to the celebratione of the comunione within the samen kirkis in all tyme cuming allanerlie. With declaratione that it nawayes extendis to the pryourie off Restennethe nor to the right quhilk Thomas, earle of Melros hes to the kirk, landis and teyndis of the parochin of Dummenye, and with speciall provisioun that heirby the saidis landis ar not erectit in ane temporall lordschip.